ജർമനിയെ കീഴടക്കി ഇന്ത്യൻ പുരുഷ ടീം 41 വർഷങ്ങൾക്ക് ശേഷമാണ് ടോക്യോയിൽ നിന്നും ഒരു ഒളിമ്പിക് മെഡൽ ഇന്ത്യയിലെത്തിച്ചത്. അതും ഒരു മലയാളി കൂടി നേടിയ സുവർണ്ണ നേട്ടം. പ്രോത്സാഹനം എന്ന നിലയിൽ സർക്കാരിന്റെ വക നിരവധി സമ്മാനങ്ങൾ കൊടുക്കേണ്ട അവസരമായിരുന്നു അത്.എന്നാൽ വലിയ രീതിയിൽ പ്രഖ്യാപനങ്ങൾ ഇത് വരെ നടന്നിട്ടില്ല.ഇപ്പോൾ ഈ വിഷയത്തിൽ പ്രതികരണവുമായി രംഗത്ത് വന്നിരിക്കുകയാണ് ശ്രീജേഷ്.

കേരളം തനിക്ക് പാരിതോഷികം പ്രഖ്യാപിക്കാത്തതിനെക്കുറിച്ച്‌ അറിയില്ലെന്ന് പിആര്‍ ശ്രീജേഷ് പറഞ്ഞു . വിഷയത്തില്‍ കൂടുതല്‍ പ്രതികരണങ്ങൾ അദ്ദേഹം നടത്തിയിട്ടില്ല. സ്‌കൂളുകളില്‍ സ്‌പോര്‍ട്‌സ് നിര്‍ബന്ധമാക്കണമെന്നും കായികതാരങ്ങളെ പ്രോത്സാഹിപ്പിക്കുന്നതാണ് കേന്ദ്രനയമെന്നും പിആര്‍ ശ്രീജേഷ് തുറന്നടിച്ചു.

ശ്രീജേഷിന് പാരിതോഷികം നല്‍കാത്തതില്‍ നിരവധി ആൾക്കാർ വിമർശനം ഉയർത്തിയിരുന്നു. മുതിര്‍ന്ന കായികതാരം അഞ്ജു ബോബി ജോര്‍ജ് സംസ്ഥാന സര്‍ക്കാരിനെതിരെ പ്രതിക്കരിച്ചിരുന്നു . സര്‍ക്കാര്‍ നിലപാട് നിരാശാ ജനകമാണെന്നും തന്നോടും ഇത് തന്നെയാണ് കാട്ടിയതെന്നും അഞ്ജു പറഞ്ഞു.

ശ്രീജേഷിനെ തിരസ്‌കരിക്കരുതെന്നും ഉചിതമായ പാരിതോഷികം പ്രഖ്യാപിക്കണമെന്നും വോളീബാള്‍ ഇതിഹാസം ടോം ജോസഫ് തുറന്നടിച്ചിരുന്നു . കേരള സര്‍ക്കാര്‍ മറ്റു സംസ്ഥാനങ്ങളെ കണ്ടുപഠിക്കണമെന്ന് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ തുറന്നടിച്ചു.

അതേസമയം സംരംഭകനും വിപിഎസ് ഹെല്‍ത്ത് കെയര്‍ ഗ്രൂപ്പ് സ്ഥാപകനുമായ ഡോ. ഷംഷീര്‍ വയലില്‍ ശ്രീജേഷിന് ഒരുകോടി രൂപ പാരിതോഷികം പ്രഖ്യാപിച്ചിരുന്നു . അടുത്ത ദിവസം കേരളത്തിലെത്തുന്ന ശ്രീജേഷിന് കൊച്ചിയില്‍ നടക്കുന്ന പ്രത്യേക ചടങ്ങില്‍ വിപിഎസ് ഹെല്‍ത്ത്‌കെയര്‍ പ്രതിനിധികള്‍ തുക കൈമാറും.

ഇന്ത്യയിലേക്ക് ഇത്തവണത്തെ ഒളിമ്പിക്സിൽ നിരവധി മെഡലുകൾ താരങ്ങൾ സ്വന്തമാക്കി. അവരുടെ സർക്കാരുകൾ എല്ലാം അവർക്ക് തക്കതായ പ്രതിഫലവും പ്രോത്സാഹനവും നൽകി. നീരജ് ചോപ്രയ്ക്ക് ഹരിയാന സർക്കാർ ആറുകോടിയാണ് പാരിതോഷികം പ്രഖ്യാപിച്ചത്.

ഹോക്കിയിൽ ജയിച്ച പുരുഷ ടീമംഗങ്ങൾക്ക് പഞ്ചാബ് സർക്കാർ ഒരു കോടി രൂപ വീതം പാരിതോഷികം പ്രഖ്യാപിച്ചു. മീരഭായി ചാനുവിനും സർക്കാർ സാമ്പത്തിക സഹായങ്ങളും പാരിതോഷികങ്ങളും നൽകി. എന്നിട്ടും കേരളത്തിൽ നിന്നും ഇത്രയും വലിയ നേട്ടം കൊയ്ത ഒരു വ്യക്തിക്ക് വേണ്ട രീതിയിലുള്ള പരിഗണന നൽകിയില്ല എന്നത് വളരെ ആശ്ചര്യകരമായ കാര്യമാണ്.