പറഞ്ഞ് തീര്‍ക്കാമായിരുന്ന രണ്ടാം വിവാഹക്കാര്യം ചാനല്‍ ചര്‍ച്ചകളിലൂടെ പറഞ്ഞ് കോമ്പ്രമൈസ് ഇല്ലാതാക്കിയതിന് പിന്നാലെ ടി. സിദ്ദിഖിനെതിരെ കെപിസിസിയുടെ നടപടിയും. സിദ്ദിക്കുമായി ബന്ധപ്പെട്ട വിഷയങ്ങളെ സംബന്ധിച്ച് കെ. പി. സി. സി നിയോഗിച്ച അന്വേഷണക്കമ്മിഷന്റെ റിപ്പോര്‍ട്ട് ഈയാഴ്ച സമര്‍പ്പിക്കും. സിദ്ധിക്കിന്റെ അപക്വമായ നടപടികളാണ് വിഷയം വഷളാക്കിയതെന്നാണ് കെ. പി. സി. സി. പ്രസിഡന്റ് വി. എം. സുധീരന് കൈമാറുന്ന റിപ്പോര്‍ട്ടിലെ ഉള്ളടക്കമെന്നാണ് സൂചന.
സിദ്ധിക്കിന്റെ രാഷ്ട്രീയ ഭാവി തന്നെ ഇതോടെ തുലാസിലായേക്കും. കെ. പി. സി. സി വൈസ് പ്രസിഡന്റ് ഭാരതീപുരം ശശി കണ്‍വീനറും ജനറല്‍ സെക്രട്ടറി ബി. ബാബുപ്രസാദ്, സെക്രട്ടറി മാന്നാര്‍ അബ്ദുള്‍ ലത്തീഫ് എന്നിവര്‍ അംഗങ്ങളുമായുള്ള കമ്മിഷന്‍ അഞ്ച് തവണ നടത്തിയ സിറ്റിംഗിലൂടെ കണ്ടെത്തിയ വിവരങ്ങള്‍ ഉള്‍പ്പെടുത്തിയുള്ള റിപ്പോര്‍ട്ടിന്റെ കരട് തയ്യാറായി അവസാന മിനുക്ക് പണിയിലാണ്.
സിദ്ധിക്ക്, ആദ്യഭാര്യ നസീമ, എം. ഐ. ഷാനവാസ് എം. പി, കോഴിക്കോട് ഡി. സി. സി. പ്രസിഡന്റ് കെ. സി. അബു, കെ. പി. സി. സി സെക്രട്ടറി ജയന്ത്, കോഴിക്കോട് ലോക്‌സഭാ മണ്ഡലം യൂത്ത്‌കോണ്‍ഗ്രസ് പ്രസിഡന്റ് പി. പി. നൗഷാദ് എന്നിവരില്‍ നിന്നാണ് തെളിവെടുത്തത്. എല്ലാ സിറ്റിംഗും കെ. പി. സി. സി ആസ്ഥാനത്ത് വച്ചാണ് നടത്തിയത്.
നസീമ ഉള്‍പ്പെടെയുള്ളവരുടെ മൊഴി കോഴിക്കോട്ട് വച്ച് എടുക്കുന്നതിനാണ് നിശ്ചയിച്ചിരുന്നതെങ്കിലും അത്തരം സന്ദര്‍ഭം സംഘര്‍ഷത്തിന് വഴിതെളിച്ചേക്കുമെന്ന നിഗമനത്തില്‍ കെ. പി. സി. സി ആസ്ഥാനത്ത് മാത്രം സിറ്റിംഗ് നടത്തിയാല്‍ മതിയെന്ന് തീരുമാനിക്കുകയായിരുന്നു
മുഖ്യമന്ത്രിയുടെ അടുപ്പക്കാരിലൊരാളായി അറിയപ്പെടുന്ന ടി. സിദ്ദിക്ക് ഭാര്യ നസീമയെ മൊഴിചൊല്ലി തൊട്ടടുത്ത ദിവസംതന്നെ മറ്റൊരുവിവാഹം നടത്തിയതോടെയാണ് പ്രശ്‌നങ്ങള്‍ മാദ്ധ്യമശ്രദ്ധ നേടിയത്. കാസര്‍കോട് ലോക്‌സഭാ തിരഞ്ഞെടുപ്പില്‍ കാന്‍സര്‍ ബാധിച്ച തന്റെ പേര് പറഞ്ഞ് സഹതാപം പിടിച്ച് പറ്റി പണസമാഹരണം നടത്തി ഒടുവില്‍ മൊഞ്ചത്തിയായ മറ്റൊരു യുവതിയെക്കണ്ടപ്പോള്‍ തന്നെ മൊഴിചൊല്ലിയെന്നതുള്‍പ്പടെ ഗുരുതരമായ ആരോപണങ്ങളായിരുന്നു നസീമ ഉന്നയിച്ചത്. നസീമയെയും കുട്ടികളെയും കോഴിക്കോട്ട് റസ്‌റ്റോറന്റില്‍ കണ്ടുമുട്ടിയപ്പോള്‍ ഉണ്ടായ വാക്കേറ്റവും വിവാദം കൊഴുക്കാന്‍ ഇടയാക്കിയിരുന്നു. സിദ്ദിക്കിനെതിരെ നസീമ ഗാര്‍ഹിക പീഡനത്തിന് കേസ് കൊടുത്തതോടെ കാര്യങ്ങള്‍ കൂടുതല്‍ ഗുരുതരമായി. സ്വന്തം പാര്‍ട്ടിക്കാരനായ എം. ഐ ഷാനവാസ് എം. പിയും ചില കോണ്‍ഗ്രസ് നേതാക്കളും കുടുംബപ്രശ്‌നം വഷളാക്കിയെന്ന് സിദ്ദിക്ക് സോഷ്യല്‍ മീഡിയ വഴി ആരോപണം ഉന്നയിച്ചതോടെ പ്രശ്‌നം കൈവിട്ടുപോയി.
ഇതിനിടെ സിദ്ദിക്കിന്റെ കുടുംബപ്രശ്‌നം പാര്‍ട്ടിക്ക് പൊതുജനമദ്ധ്യത്തില്‍ ഏറെ നാണക്കേടുണ്ടാക്കിയെന്ന് തുറന്നടിച്ച് മഹിളാകോണ്‍ഗ്രസ് സംസ്ഥാന അദ്ധ്യക്ഷ അഡ്വ. ബിന്ദുകൃഷ്ണയും രംഗത്തെത്തി. തുടര്‍ന്ന് മേയ് 24 ന് സിദ്ദിക്ക് കെ. പി. സി. സി. ജനറല്‍ സെക്രട്ടറി സ്ഥാനം രാജിവച്ചു. മേയ് 28 ന് സിദ്ദിക്ക് വിഷയത്തില്‍ കെ. പി. സി. സി ഭാരവാഹികളെ ഉള്‍പ്പെടുത്തി അന്വേഷണക്കമ്മിഷനെ കെ. പി. സി. സി പ്രസിഡന്റ് വി. എം. സുധീരന്‍ നിയോഗിക്കുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha