സത്യത്തിലാരും തിരിച്ചറിഞ്ഞില്ല... സിപിഎം സംസ്ഥാന സമിതിയില് പി.ജയരാജന് വിമര്ശനം; മുമ്പ് പിജെ ആര്മിയുടെ പേരിലാണെങ്കില് ഇക്കുറി കണ്ണൂര് ജില്ലാ സെക്രട്ടേറിയറ്റിലുണ്ടായ വാക്കേറ്റത്തിന്റെ പേരില്; ഇത്തരം സംഭവങ്ങള് ആവര്ത്തിക്കരുതെന്ന് നിര്ദേശം
പിജെ ആര്മിയെ തള്ളിപ്പറഞ്ഞതോടെ തണുത്ത പി. ജയരാജന് വിഷയം വീണ്ടും ഉയര്ന്നു വന്നിരിക്കുകയാണ്. പി.ജയരാജനു സിപിഎം സംസ്ഥാന സമിതിയില് വിമര്ശനം. കണ്ണൂര് ജില്ലാ സെക്രട്ടേറിയറ്റിലുണ്ടായ വാക്കേറ്റത്തിന്റെ പേരിലാണ് പി.ജയരാജനും കെ.പി.സഹദേവും വിമര്ശിക്കപ്പെട്ടത്. മേലില് ഇത്തരം സംഭവങ്ങള് ആവര്ത്തിക്കരുതെന്ന് സംസ്ഥാന സമിതി നിര്ദേശിച്ചു.
കരിപ്പൂര് സ്വര്ണക്കടത്തുകേസ് ചര്ച്ച ചെയ്ത കണ്ണൂര് ജില്ലാ സെക്രട്ടേറിയറ്റ് യോഗത്തിലായിരുന്നു ജയരാജനും സഹദേവനും തമ്മില് ശക്തമായ വാക്പോര് നടന്നത്. അര്ജുന് ആയങ്കിയെ പോലെയുള്ളവര്ക്ക് പാര്ട്ടി ഓഫിസ് നിരങ്ങാന് അവസരം നല്കിയെന്ന സഹദേവന്റെ വിമര്ശനത്തെ തുടര്ന്നായിരുന്നു വാക്കേറ്റം. ഇക്കാര്യം മേല്ഘടകത്തിലേക്ക് റിപ്പോര്ട്ട് ചെയ്തു. തുടര്ന്നാണ് സംസ്ഥാന സമിതി യോഗത്തില് ഇരുവര്ക്കും വിമര്ശനമുണ്ടായത്.
വ്യക്തിപൂജ, ക്വട്ടേഷന് വിവാദങ്ങള് കണ്ണൂരിലെ സിപിഎമ്മിനെ വന് വിവാദത്തിലാക്കിയതു ചര്ച്ച ചെയ്യാനായി ചേര്ന്ന ജില്ലാ സെക്രട്ടേറിയറ്റ് യോഗത്തിലും തര്ക്കങ്ങള് പരിധി വിട്ടതോടെയാണ് സംസ്ഥാന കമ്മിറ്റിയുടെ ഇടപെടല്.
പി.ജയരാജനെതിരെ ഉയര്ന്ന വ്യക്തിപൂജാ വിവാദം അന്വേഷിക്കാന് ജില്ലാ കമ്മിറ്റി നിയോഗിച്ച കമ്മിഷന് പ്രതിസ്ഥാനത്ത് നിന്ന് അദ്ദേഹത്തെ ഒഴിവാക്കുകയും ഏതാനും പേര്ക്കെതിരെ നടപടിക്കു ശുപാര്ശ ചെയ്യുകയുമുണ്ടായി. ഇക്കാര്യം ജില്ലയിലെ പാര്ട്ടി പരിഗണിക്കാനിരിക്കെയാണ് സ്വര്ണക്കടത്ത് ക്വട്ടേഷന് വിവാദം ഉയരുന്നത്. അര്ജുന് ആയങ്കിയും ആകാശ് തില്ലങ്കേരിയും ജയരാജന്റെ പി.ജെ ആര്മിയുടെ ഭാഗമാണെന്ന ആക്ഷേപം ഉയര്ന്നു. ഇതെല്ലാം ചര്ച്ച ചെയ്യാനും ശുദ്ധീകരണ നടപടികള്ക്കും വേണ്ടി ചേര്ന്ന ജില്ലാ സെക്രട്ടേറിയറ്റ് യോഗത്തില് കെ.പി. സഹദേവന് ജയരാജനെതിരെ തിരിഞ്ഞിരുന്നു.
ജയരാജന് സംസ്ഥാന കമ്മിറ്റിക്കു കൈമാറിയ കത്തിനെ ചൊല്ലിയും വാദപ്രതിവാദമുണ്ടായി. ഇതേ തുടര്ന്ന് ജില്ലാ സെക്രട്ടേറിയറ്റ് യോഗം അല്പസമയം നിര്ത്തിവയ്ക്കേണ്ടി വന്നു. പാര്ട്ടി രീതിക്കും മര്യാദയ്ക്കും ചേരാത്ത തരത്തിലുള്ള വാദപ്രതിവാദങ്ങള് യോഗത്തില് നടന്നു. പ്രശ്നപരിഹാര നടപടികള് ചര്ച്ച ചെയ്യാനുള്ള ശ്രമവും അലങ്കോലമായതാണ് നേതൃത്വത്തിന്റെ നീരസത്തിനു കാരണമായത്.
കമ്മിറ്റിയില് പങ്കെടുത്ത കേന്ദ്രകമ്മിറ്റി അംഗം എം.വി.ഗോവിന്ദന് ഇക്കാര്യം സംസ്ഥാന നേതൃത്വത്തിനു റിപ്പോര്ട്ട് ചെയ്തു. ഉള്പ്പാര്ട്ടി ശുദ്ധീകരണത്തിന് എല്ലാ തരത്തിലും സഹായകരമായ സമീപനമാണ് മുതിര്ന്ന നേതാക്കളില് നിന്നു പ്രതീക്ഷിക്കുന്നതെന്ന് സംസ്ഥാന നേതൃത്വം ചൂണ്ടിക്കാട്ടി. അതേസമയം പുറത്ത് പരസ്യപ്പെടുത്തേണ്ട ഒരു അച്ചടക്ക നടപടിയും ജയരാജനെതിരെ ഉണ്ടായിട്ടില്ലെന്നു പാര്ട്ടി നേതൃത്വം വിശദീകരിച്ചു.
അതേസമയം പി.സതീദേവിയെ വനിതാ കമ്മിഷന് അധ്യക്ഷയാക്കാന് സംസ്ഥാന സെക്രട്ടേറിയറ്റില് ധാരണയായി. അടുത്തമാസം രണ്ടാമത്തെ ആഴ്ച സിപിഎം ബ്രാഞ്ച് സമ്മേളനങ്ങള് തുടങ്ങാനും തീരുമാനിച്ചു. ഡിസംബറിലും ജനുവരിയിലുമായി ജില്ലാ സമ്മേളനങ്ങള് തീര്ക്കും. ഓണം കഴിഞ്ഞ് ജില്ലാകമ്മിറ്റികള് യോഗം ചേര്ന്ന് സമ്മേളന തീയതികള് തീരുമാനിക്കും. ലോക്കല് തലംവരെ സമ്മേളനങ്ങളോടനുബന്ധിച്ചുള്ള പൊതുപരിപാടികള് ഓണ്ലൈനായി നടത്തും. ജില്ലാ തലം വരെ സമ്മേളനങ്ങളില് പ്രതിനിധികളുടെ എണ്ണം കുറയ്ക്കാനും തീരുമാനമായി.
"
https://www.facebook.com/Malayalivartha
