നായകളും മനുഷ്യനുമായി അഭേദ്യമായ ബന്ധമാണുള്ളത്. തനിക്ക് ചോറ് തരുന്നതിനുള്ള നന്ദി അവ എപ്പോഴും പ്രകടിപ്പിക്കാറുണ്ട്. തന്റെ യജമാനന്റേയും കുടുംബത്തിന്റേയും ജീവന് ഒരു പോറല്‍ പോലും ഏല്‍ക്കാതെ സ്വന്തം ജീവന്‍ നല്‍കി രക്ഷിച്ചിരിക്കുകയാണ് ടോമി എന്ന വളര്‍ത്തുനായ.

സ്വന്തം ജീവന്‍ കൊടുത്ത് ഉടമയെയും കുടുംബത്തെയും ഒറ്റയാനില്‍ നിന്നു രക്ഷിച്ച ടോമി നാട്ടിലെ താരമായി. കലി പൂണ്ടു പാഞ്ഞടുത്ത കാട്ടാന ടോമിയെ കൊമ്പില്‍ കോര്‍ത്തെടുത്തപ്പോഴും ആനയുടെ കണ്ണില്‍ മാന്തി നായ അഞ്ചംഗ കുടുംബത്തെ കാത്തു.

മറയൂരിലെ കാന്തല്ലൂരിലാണ് വീട് ആക്രമിക്കാനെത്തിയ ഒറ്റയാന്‍ വളര്‍ത്തുനായയെ കുത്തിക്കൊന്നത്. ചൊവ്വാഴ്ച അര്‍ധരാത്രിയോടെയാണ് സംഭവം. വനാതിര്‍ത്തിയിലെ കൃഷികള്‍ ചവിട്ടിമെതിച്ച ശേഷം ആന കാന്തല്ലൂര്‍ കുണ്ടകാട്ടില്‍ സോമന്റെ പറമ്പിലേക്കു കയറാന്‍ ശ്രമിക്കവേ കമ്പിവേലിയില്‍ കുരുങ്ങി. ഇതോടെ കലിയിളകിയ ആന വേലി തകര്‍ത്ത് സോമന്റെ വീടിനുനേരെ പാഞ്ഞടുത്തു. ആനയുടെ ചിന്നം വിളികേട്ട് പേടിച്ചരണ്ട് സോമനും ഭാര്യ ലിതിയ, മക്കള്‍ അഭിലാഷ്, അമൃത, സഹോദരി വത്സമ്മ എന്നിവരും വീടിനുള്ളില്‍ത്തന്നെ ഇരിക്കുകയായിരുന്നു.

മുറ്റത്തെത്തിയ ഒറ്റയാന്‍ വീടിന്റെ തൂണില്‍ പിടിച്ചു. പറമ്പില്‍ കെട്ടിയിട്ട വളര്‍ത്തുനായ ടോമി ഇതോടെ തുടല്‍ പൊട്ടിച്ച് ഓടിയെത്തുകയായിരുന്നു. നായ കാലില്‍ കടിച്ചതോടെ ആന നായയുടെ നേരെ പാഞ്ഞടുത്തു. വീണ്ടും കുരച്ചുകൊണ്ട് പ്രതിരോധിക്കാന്‍ ശ്രമിച്ച ടോമിയെ ആന കൊമ്പില്‍ കോര്‍ത്തെടുത്തു. വയറ്റില്‍ ആനക്കൊമ്പ് തുളഞ്ഞുകയറിയെങ്കിലും ആനയുടെ കണ്ണില്‍ ടോമി മാന്തി. ഇതോടെ നായയെ കുടഞ്ഞെറിഞ്ഞ് ആന സ്ഥലംവിട്ടു. ഗുരുതരമായി പരുക്കേറ്റ ടോമി ഇന്നലെ ഉച്ചയോടെ ചത്തു. ടോമിയുടെ വേര്‍പാട് കുടുംബത്തെ ഏറെ വേദനിപ്പിച്ചു.

സംസ്ഥാനത്തിന്റെ പല മലയോര പ്രദേശത്തും കാട്ടാനയുടെ ആക്രമണം രൂക്ഷമാണ്. ഓരോ ദിവസവും പല റിപ്പോര്‍ട്ടുകളാണ് പുറത്ത് വരുന്നത്.
കഴിഞ്ഞ ദിവസം നെടുങ്കണ്ടത്തിനടുത്ത് ശൂലപ്പാറക്കുടിയില്‍ കാട്ടാനയാക്രമണത്തില്‍ നാല് വീടുകള്‍ തകര്‍ന്നു. ആര്‍ക്കും പരിക്കില്ല. കോമ്പയാര്‍ ശൂലപ്പാറ മന്നാക്കുടിയിലാണ് ശനിയാഴ്ച കാട്ടാനകൂട്ടം ആക്രമണം നടത്തിയത്. വൈകിട്ട് അഞ്ച് മണിയോടെ അതിര്‍ത്തിയില്‍ എത്തിയ രണ്ടു കുട്ടിയാനകളും പിടിയാനയുമടങ്ങുന്ന സംഘമാണ് വീടുകള്‍ ആക്രമിച്ചത്. നാലു വീടുകള്‍ പൂര്‍ണമായും തകര്‍ത്തു. വീട്ടിലുള്ളവര്‍ മുന്‍കൂട്ടി മാറിയതിനാല്‍ വലിയ ദുരന്തമൊഴിവായി. വീട് നഷ്ടപ്പെട്ടവരെ താത്കാലികമായി അയല്‍ വീടുകളിലയ്ക്ക് മാറ്റി പാര്‍പ്പിച്ചു. രാത്രി ഒമ്പതോടെ കാട്ടാനകള്‍ തമിഴ്‌നാട് വനത്തിലേക്ക് തിരികെ പോയി. വനം വകുപ്പ് സംഘം സംഭവസ്ഥലത്ത് നിലയുറപ്പിച്ചിട്ടുണ്ട്. ഇന്നലെ സമീപ പ്രദേശമായ മാന്‍കുത്തിമേട് മന്നാക്കുടിയിലും ആക്രമണം നടത്തിയിരുന്നു.

അലനല്ലൂര്‍ തിരുവിഴാംകുന്ന് കന്നുകാലി ഗവേഷണ കേന്ദ്രത്തികത്ത് രണ്ടു മാസത്തോളമായി വിഹരിക്കുന്ന കാട്ടാനകള്‍ ക്ഷേത്രമതില്‍ തകര്‍ത്തിരുന്നു. ഫാമിനകത്തെ അരിമ്പ്രക്കുന്ന് ശ്രീ കരിങ്കാളി ക്ഷേത്രത്തിന്റെ ഒരുവശത്തെ ചുറ്റുമതിലാണ് ശനിയാഴ്ച രാത്രി കാട്ടാനകള്‍ തകര്‍ത്തത്. ഞായറാഴ്ച രാവിലെ ക്ഷേത്രത്തിലെത്തിയപ്പോഴാണ് മതില്‍ തകര്‍ന്ന് കിടക്കുന്നത് കണ്ടതെന്ന് ക്ഷേത്രക്കമ്മിറ്റി അംഗങ്ങള്‍ പറഞ്ഞു.

അതേസമയം, പരിസര പ്രദേശമായ ഇരട്ടവാരി ഗ്രാമവും കാട്ടാനകളെ കൊണ്ട് പൊറുതിമുട്ടിയിരിക്കുകയാണ്. ഇന്നലെ രാവിലെ കാട്ടാനകള്‍ കാര്‍ഷെഡ് തകര്‍ത്തു. ഇരട്ടവാരി പരിയാത്ത് ജോയിയുടെ വീടിനോട് ചേര്‍ന്ന് നിര്‍മ്മിച്ചിട്ടുള്ള കാര്‍ ഷെഡാണ് തകര്‍ക്കാന്‍ ശ്രമിച്ചത്. ബഹളം വെച്ചതിനെ തുടര്‍ന്ന് കാട്ടാനകള്‍ ഒഴിഞ്ഞുപോയതിനാല്‍ ഷെഡ് കാറിന് മുകളില്‍ വീഴാതെ രക്ഷപ്പെട്ടതായി ജോയി പറഞ്ഞു.