കളഞ്ഞ് കിട്ടിയ പ്രണയ ലേഖനത്തിന്റെ ഉടമയെ സോഷ്യൽ മീഡിയയിൽ തിരയുകയാണ് ആലപ്പുഴ തിരുമലയിലെ ഒരു ദോശകമ്പനി എന്ന ഹോട്ടൽ. കഴിഞ്ഞ ദിവസം കട അടക്കാൻ തുടങ്ങുന്നതിനിടെ ആയിരുന്നു  കത്ത് കിട്ടുന്നത്. ഈ കാലത്തും പ്രണയ ലേഖനം എഴുതാൻ മനസ് കാണിച്ച ആ വ്യക്തിയെ തേടി കടയുടമ പോസ്റ്റിട്ടതോടെ സംഭവം വൈറലായി.

സുഹൃത്തുക്കളായ ശേഷം പ്രണയത്തിലായ ഒരാൾ എഴുതിയ കത്താണ്. വീട്ടിലെ പ്രശ്നങ്ങൾ വിവരിക്കുന്നുണ്ട്. കാത്തിരിക്കണം എന്നും കത്തിൽ ആവശ്യപ്പെടുന്നു. ഒരു പേപ്പറിന്റെ ഇരുവശത്തും മംഗ്ലീഷിലാണ് പ്രണയവും വിരഹവും എഴുതിയിരിക്കുന്നത്. ‘ഒരു പെൺകുട്ടി എഴുതിയ കത്താണ് എന്ന് ഉറപ്പ്. യദു എന്ന യുവാവിന് വേണ്ടി അച്ചു എന്ന പെൺകുട്ടിയാണ് കത്തെഴുതിയിരിക്കുന്നത്.

‘അച്ചുവിന്റെ സ്വന്തം യദുവിന്... എന്ന് പറഞ്ഞാണ് തുടക്കം. കത്ത് കളഞ്ഞ് കിട്ടിയെന്ന് അറിയിച്ച് പോസ്റ്റ് ഇട്ടതോടെ ഉടമസ്ഥാവകാശം പറഞ്ഞ് പലരും വിളിക്കാൻ തുടങ്ങി. ഇന്ന് മൂന്നുപേർ വിളിച്ചു. അതിൽ രണ്ടുപേർ പെൺകുട്ടികളാണ്. അവരുടേതാണ് കത്ത് എന്ന് അവകാശപ്പെടുന്നു. ചിലർ വിളിച്ചിട്ട് കത്തിലെ ഉള്ളടക്കം ചോദിക്കുന്നു. ആരു വന്നാലും കത്തിലെ ഉള്ളടക്കം ഇങ്ങോട്ട് പറഞ്ഞാൽ അയാൾക്ക് കത്ത് നൽ‌കും. അല്ലാതെ ഉള്ളടക്കം അറിയാൻ ആരും വിളിക്കേണ്ടെന്ന് കമ്പനി ഉടമ അജാസ് പറയുന്നു.

അച്ചുവിന്റെ സ്വന്തം യദുവിന്‌ …

അച്ചു യദുവിന് എഴുതിയ പ്രണയ ലേഖനം ദോശ കമ്പനിയിൽനിന്നും കളഞ്ഞു കിട്ടിയിട്ടുണ്ട് ..
നിങ്ങളുടെ പ്രണയം പൂവണിയാൻ ദോശ കമ്പനിക്കും അതിയായ ആഗ്രഹമുണ്ട്.. ആയതിനാൽ തിരിച്ചറിയൽ രേഖയുമായി വന്നാൽ ലെറ്റർ തിരികെ നൽകുന്നതാണ്…

എന്ന് സ്വന്തം ദോശ കമ്പനി
ഒപ്പ്
09-10-21
NB : യദുവിനെ കാത്ത് അച്ചുവിൻ്റെ പ്രണയ ലേഖനവും ഒപ്പം ദോശ കമ്പനിയുടെ പ്രണയ ദോശയും കാത്തിരിക്കുന്നു..
#share_till_this_reach_yedhu എന്നായിരുന്നു ദോശ കമ്പനി സമൂഹ മാധ്യമങ്ങളിൽ പങ്കുവച്ച കുറിപ്പിലുള്ളത്.