ദേശീയ തലത്തിലും സംസ്ഥാനങ്ങളിലും കോണ്‍ഗ്രസുമായി സഖ്യം വേണമെന്ന് സിപിഎം ജനറല്‍ സെക്രട്ടറി സീതാറാം യെച്ചൂരി. കോണ്‍ഗ്രസുമായി ഒരു കച്ചവടവും വേണ്ടെന്ന് പിണറായി വിജയനും പ്രകാശ് കാരാട്ടും. കോണ്‍ഗ്രസ് സഖ്യവിഷയത്തില്‍ കേരള ഘടകവും ബംഗാള്‍ ഘടകവും ചേരി തിരിഞ്ഞതോടെ പോളിറ്റ് ബ്യൂറോയില്‍ ഇക്കാര്യം തീരുമാനമെടുക്കാതെ പിരിഞ്ഞു.


ബംഗാളില്‍ വംശനാശം നേരിട്ടുകൊണ്ടിരിക്കുന്ന സിപിഎം അവിടെ തൃണമൂല്‍ കോണ്‍ഗ്രസിന്റെയും ബിജെപിയുടെയും തല്ലുകൊണ്ടുമടുത്ത സാഹചര്യത്തില്‍ കോണ്‍ഗ്രസിനെ കൂടെ കൂട്ടാതെ പിടിച്ചു നില്‍ക്കാനാവില്ലെന്ന് വ്യക്തമായ നിലപാടെടുത്തു. എന്നാല്‍ കേരളത്തില്‍ കോണ്‍ഗ്രസ് ഒന്നാം ശത്രവായതിനാല്‍ ഒരു സഖ്യവും ഇവിടെ വേണ്ടെന്നാണ് പിണറായി വിജയനും ഇദ്ദേഹത്തെ പിന്‍തുണയ്ക്കുന്ന വിഭാഗവും പറയുന്നത്.



കോണ്‍ഗ്രസുമായി ഭാവിയില്‍ സഖ്യമുണ്ടാക്കുന്നതു സംബന്ധിച്ചു കഴിഞ്ഞ ദിവസം ചേര്‍ന്ന സിപിഎം പൊളിറ്റ്ബ്യൂറോ യോഗത്തില്‍ കടുത്ത ഭിന്നതയാണ് ഉരുത്തിരിഞ്ഞിരിക്കുന്നത്. കോണ്‍ഗ്രസ് സഖ്യത്തെ കേരളത്തില്‍ നിന്നുള്ള നേതാക്കള്‍ ഒന്നടങ്കം എതിര്‍ത്തപ്പോള്‍, കോണ്‍ഗ്രസിനെ ഒഴിവാക്കി പ്രതിപക്ഷ ഐക്യം സാധ്യമാവില്ലെന്നു പശ്ചിമ ബംഗാള്‍ ഘടകം വാദിച്ചു. അടുത്ത വര്‍ഷം കണ്ണൂരില്‍ ചേരുന്ന പാര്‍ട്ടി കോണ്‍ഗ്രസില്‍ അവതരിപ്പിക്കേണ്ട രാഷ്ട്രീയ പ്രമേയം ചര്‍ച്ച ചെയ്ത യോഗത്തിലാണു സഖ്യം സംബന്ധിച്ച് ഭിന്നതയുയര്‍ന്നത്. അടുത്ത സിപിഎം പാര്‍ട്ടി കോണ്‍ഗ്രസിന്റെ സംസ്ഥാന സമ്മേളനത്തിലും ദേശീയ സമ്മേളനത്തിലും ചൂടേറിയ ചര്‍ച്ചയായി മാറുമെന്ന് തീര്‍ച്ചയായി.




സിപിഎം - കോണ്‍ഗ്രസ് സഖ്യം സംബന്ധിച്ച അന്തിമ തീരുമാനം ഈ മാസം 22 മുതല്‍ 24 വരെ ചേരുന്ന കേന്ദ്ര കമ്മിറ്റിക്കു വിട്ടിരിക്കുകയാണ്.
വര്‍ഗീയതയെ നേരിടുന്നതില്‍ കോണ്‍ഗ്രസ് വന്‍പരാജയമാണെന്നു കേരളത്തില്‍ നിന്നുള്ള നേതാക്കള്‍ വിമര്‍ശിച്ചു. കോണ്‍ഗ്രസുമായി കൈകോര്‍ക്കുന്നതു ഗുണം ചെയ്യില്ലെന്നും സംസ്ഥാനങ്ങളിലെ രാഷ്ട്രീയ സാഹചര്യങ്ങളുടെ അടിസ്ഥാനത്തില്‍ പ്രാദേശിക കക്ഷികളുമായി
സഖ്യമുണ്ടാക്കണമെന്നും ഇവര്‍ ആവശ്യപ്പെട്ടു.



കോണ്‍ഗ്രസുമായി സഖ്യത്തില്‍ മത്സരിച്ച ബംഗാള്‍ നിയമസഭാ തിരഞ്ഞെടുപ്പില്‍ പാര്‍ട്ടി നേരിട്ട പരാജയവും കേരളത്തില്‍നിന്നുള്ള മുതിര്‍ന്ന സഖാക്കള്‍ ചൂണ്ടിക്കാട്ടി. മൂന്നു പതിറ്റാണ്ട് ബംഗാള്‍ ഭരിച്ച സിപിഎമ്മിന് കഴിഞ്ഞ നിയമസഭാ തെരഞ്ഞെടുപ്പില്‍ കച്ചിയടിക്കാനായില്ല. കോണ്‍ഗ്രസിനു ലഭിച്ച വിജയം പോലും കിട്ടാതെ ബംഗാള്‍ രാഷ്ട്രീയ ഭൂപടത്തില്‍ നിന്ന് സിപിഎം പുറത്തായിക്കഴിഞ്ഞു. തൃപൂരയിലും നിലവില്‍ സിപിഎം വട്ടപ്പൂജ്യമാണ്.



എന്നാല്‍, പ്രതിപക്ഷ നിരയിലെ ഏറ്റവും വലിയ കക്ഷിയായ കോണ്‍ഗ്രസിനെ ഒഴിവാക്കിയുള്ള പ്രതിപക്ഷ സഖ്യം ഫലം ചെയ്യില്ലെന്നും കോണ്‍ഗ്രസിനെ അകറ്റി നിര്‍ത്തിയുള്ള മൂന്നാം മുന്നണി പ്രായോഗികമല്ലെന്നുമാണ് ജനറല്‍ സെക്രട്ടറി യെച്ചൂരിയെ പിന്തുണയ്ക്കുന്ന മറുഭാഗം വാദിക്കുന്നത്. നിലവിലെ രാഷ്ട്രീയ സാഹചര്യത്തില്‍ അടുത്ത ലോക് സഭാ തെരഞ്ഞെടുപ്പിലും ബിജെപി വന്‍ഭൂരിപക്ഷത്തോടെ അധികാരത്തിലെത്തും. കോ്ണ്‍ഗ്രസുമായി സഖ്യമില്ലെങ്കിലും നിലവിലെ രാഷ്ടീയ സാഹചര്യത്തില്‍ കേരളത്തില്‍ പത്തിലേറെ
സീറ്റുകള്‍ വാങ്ങിയെടുക്കാനാകുമെന്നാണ് സിപിഎമ്മിന്റെ പ്രതീക്ഷ.



കോണ്‍ഗ്രസില്‍ നിലവിലുള്ള 42 സീറ്റില്‍ നിന്നും 25 സീറ്റിലേക്ക് ലോക്സഭയില്‍ ചെറുതാകുമെന്നാണ് സിപിഎം കേരള ഘടകത്തിന്റെ നീരീക്ഷണം. അതേ സമയം മമത ബാനര്‍ജിയുടെ നേതൃത്വത്തില്‍ ദേശീയ പ്രതിപക്ഷസഖ്യം ഇന്ത്യയില്‍ ഒരുങ്ങുന്ന സാഹചര്യത്തില്‍ കോണ്‍ഗ്രസ് ഈ സഖ്യത്തെ പിന്‍തുണയ്ക്കുമെന്നാണ് സൂചന. കോണ്‍ഗ്രസ് മമതയെ പിന്‍തുണയ്ക്കുന്ന സാഹചര്യം ഒഴിവാക്കാന്‍ കോണ്‍ഗ്രസിനൊപ്പം കൂടുകയാണ് നേട്ടമെന്നാണ് സിപിഎം വിലയിരുത്തല്‍.



എന്നാല്‍ മഹാരാഷ്ട്ര, ഒറീസ, തമിഴ് നാട്, ബിഹാര്‍ ഉള്‍പ്പെടെ വിവിധ സംസ്ഥാനങ്ങളില്‍ കോണ്‍ഗ്രസ് പ്രാദേശിക പാര്‍ട്ടികളുമായി സഖ്യം ചേര്‍ന്നു കൊണ്ടിരിക്കുകയാണ്. ഈ നിലയില്‍ ബിജെപിയെ ചെറുക്കാന്‍ സിപിഎം നിലപാട് മാറ്റേണ്ടത് അനിവാര്യമാണ്.

ഇന്ത്യയില്‍ ഒരു പ്രതിപക്ഷം എന്ന നിലയില്‍പോലും വളരാന്‍ കോണ്‍ഗ്രസിന് കഴിയുന്നില്ലെന്നും നിലവിലെ നേതൃത്വത്തില്‍ കോ്ണ്‍ഗ്രസ് ഇന്ത്യയില്‍ രക്ഷപ്പെടില്ലെന്നുമാണ് സിപിഎമ്മിലെ വിലയിരുത്തല്‍. എന്നാല്‍ ബംഗാളിലെ സാഹചര്യം കേരളത്തിലെ സാഹചര്യത്തില്‍ നിന്ന് വ്യത്യസ്തമാണെന്നും അവിടെ സിപിഎമ്മിന് തിരിച്ചുവരവിനുള്ള സാധ്യത പോലുമില്ലെന്നുമാണ് അവിടെനിന്നുള്ള നേതാക്കളുടെ പക്ഷം.

കണ്ണൂര്‍ പാര്‍ട്ടി കോണ്‍ഗ്രസിലെ ഏറ്റവും ചൂടേറിയ ചര്‍ച്ച കോണ്‍ഗ്രസ്-സിപിഎം സഖ്യത്തെ സംബന്ധിച്ചാകുമെന്ന് വ്യക്തമായിരിക്കുന്നു.