പ്രീതിയെ ഭര്‍തൃഗൃഹത്തില്‍ മരിച്ച നിലയില്‍ കണ്ടെത്തിയ സംഭവത്തില്‍ ഭര്‍ത്താവിന്റെ അമ്മയും അറസ്റ്റില്‍. കൊട്ടാരക്കര സ്വദേശിനിയായ പ്രീതിയെ ഭര്‍തൃവീട്ടില്‍ തൂങ്ങി മരിച്ച നിലയില്‍ കണ്ടെത്തിയ സംഭവത്തില്‍ പ്രീതിയുടെ ഭര്‍ത്താവ് അഖിലിനെ അറസ്റ്റ് ചെയ്തതിന് പിന്നാലെയാണ് അമ്മ സുധയെയും പോലീസ് അറസ്റ്റ് ചെയ്തത്. വന്‍ തുക സ്ത്രീധനം വാങ്ങിയ പ്രതിയും മാതാവും വീണ്ടും പണം ആവശ്യപ്പെട്ട് മാനസികമായും ശാരീരികമായും പീഡിപ്പിച്ചെന്നാണ് പ്രീതിയുടെ ബന്ധുക്കളുടെ പരാതി.

2015 ലാണ് കൊട്ടാരക്കര സ്വദേശിനി പ്രീതിയും പൂനെ മലയാളിയായ അഖിലും തമ്മിലുള്ള വിവാഹം നടന്നത്. 120 പവന്‍ സ്വര്‍ണവും 85 ലക്ഷം രൂപയുമാണ് അഖിലിന് സ്ത്രീധനമായി നല്‍കിയത്. പിന്നീട് ബിസിനസില്‍ തിരിച്ചടിയുണ്ടായെന്നും സാമ്ബത്തിക ബാധ്യതകള്‍ തീര്‍ത്ത് തരണമെന്നും അഖില്‍ ആവശ്യപ്പെട്ടതായി പ്രീതിയുടെ അച്ഛന്‍ പറഞ്ഞു.സാമ്ബത്തികമായി സഹായിച്ചെങ്കിലും വീണ്ടും ആവശ്യങ്ങള്‍ കൂടി വരികയായിരുന്നു. പണം കിട്ടാതായതോടെ മകളെ ശാരീരികമായും മാനസികമായും പീഡിപ്പിച്ചെന്നും അച്ഛന്‍ മദുസൂദനനന്‍ പിള്ള വ്യക്തമാക്കി.