അന്വേഷണം തട്ടിപ്പിന് കൂട്ടുനിന്നവരിലേക്ക്.... മോന്‍സണെ ഏതെങ്കിലും നിലയില്‍ സഹായിച്ചവര്‍ക്കെതിരെയും ഇടനിലക്കാര്‍ക്കെതിരെയും അന്വേഷണം ഉണ്ടാകുമെന്ന് മുഖ്യമന്ത്രി .

10 കോടി തട്ടിയെടുത്തെന്ന പ്രാഥമികകേസും തുടര്‍ന്നുവന്ന ആറ് കേസിലും മോന്‍സണ്‍ മാത്രമാണ് പ്രതി. പണം തട്ടിയെടുത്തെന്ന് മുഖ്യമന്ത്രിക്ക് പരാതി സമര്‍പ്പിച്ചവര്‍ മോന്‍സണെ സഹായിച്ചവരുടെയും മാധ്യസ്ഥ്യം നിന്നവരുടെയും പേരുകള്‍ വ്യക്തമാക്കിയിട്ടുണ്ട്. പരാതിക്കാര്‍ കൈമാറിയ വിഡിയോ, ഓഡിയോ ക്ലിപ്പുകളിലും പുറത്തുവന്ന ചിത്രങ്ങളുമേ അന്വേഷണ സംഘത്തിന്റെ പക്കലുള്ളൂ.

എന്നാല്‍, മോന്‍സണിന് സംരക്ഷണവും പണം കൈമാറുന്നതിന് ഇടനില നില്‍ക്കുകയും കേസുകള്‍ ഒത്തുതീര്‍ക്കാന്‍ ഇടപെടുകയും ചെയ്ത പൊലീസുകാരുടെ പേരുകള്‍ നേരത്തേ വെളിപ്പെട്ടിരുന്നു.മോന്‍സണിന്റെ സാമ്പത്തിക ഇടപാടുകളില്‍ തെളിവുകളുണ്ടാക്കുന്നതില്‍ ഊന്നിയുള്ള ഊര്‍ജിത അന്വേഷണമാണ് ഇപ്പോള്‍ ക്രൈംബ്രാഞ്ച് പല ടീമായി തിരിഞ്ഞ് നടത്തുന്നത്.

ഇത് കണ്ടെത്തുന്നതോടെ ഇയാളുടെ ബിനാമികളെയും പണം വാങ്ങിയവരെയും വെളിച്ചത്തുകൊണ്ടുവരാന്‍ കഴിയുമെന്നാണ് കരുതുന്നത്. മോന്‍സണ്‍ ഒറ്റക്ക് ഇത്രയും തുക തട്ടിയെടുത്തുവെന്നത് അന്വേഷണസംഘത്തിനും വിശ്വാസമായിട്ടില്ല. മോന്‍സണെ സഹായിച്ചവരുണ്ടാകാം എന്നാണ് ഇവര്‍ കരുതുന്നത്.

അതേസമയം മോന്‍സണ്‍ മാവുങ്കലിന്റെ ശബ്ദ സാമ്പിളുകളില്‍ ശാസ്ത്രീയ പരിശോധന നടത്തുന്നു. പരാതിക്കാര്‍ സമര്‍പ്പിച്ച െതളിവുകളും ഇയാളുടെ പക്കല്‍നിന്ന് കണ്ടെടുത്ത ഡിജിറ്റല്‍ രേഖകളും ഒന്നാണെന്ന് ശാസ്ത്രീയമായി തെളിയിക്കുന്നതിന്റെ ഭാഗമാണ് പരിശോധന.

മോന്‍സണ്‍ അറസ്റ്റിലായ ഉടന്‍ സ്റ്റുഡിയോയില്‍ എത്തിച്ച് ഇയാളുടെ ശബ്ദസാമ്പിളുകള്‍ ക്രൈംബ്രാഞ്ച് സംഘം ശേഖരിച്ചിരുന്നു. ഇയാളുമായി പരാതിക്കാര്‍ സംസാരിച്ച ഫോണ്‍റെക്കോഡുകളില്‍ പണം വാങ്ങിയതിന് തെളിവുകളുണ്ടെന്നാണ് കരുതുന്നത്. ഇത് കോടതിയില്‍ തെളിയിക്കാനാണ് പരിശോധന നടത്തുന്നത്.