മലയാളിയടക്കം അഞ്ച് സൈനികര്‍ ഇന്നലെ വീരമൃത്യുവരിച്ച വാര്‍ത്ത ഞെട്ടലോടെയാണ് ഇന്ത്യ കേട്ടത്. രണ്ട് സൈനികര്‍ക്ക് പരിക്കേറ്റിരുന്നു. കൊല്ലം ഓടനാവട്ടം കുടവട്ടൂര്‍ ശില്പാലയത്തില്‍ ഹര കുമാറിന്റെയും ബീനയുടെയും മകന്‍ വൈശാഖ് (25) ആണ് വീരമൃത്യു വരിച്ച മലയാളി.

പൂഞ്ച് ജില്ലയില്‍പ്പെട്ട സുരന്‍കോട്ട് ഡി.കെ.ജി (ദേരാ കി ഗലി) വന മേഖലയില്‍ ആയുധധാരികളായ അഞ്ച് ഭീകരര്‍ ഒളിച്ചിരിക്കുന്നെന്ന രഹസ്യാന്വേഷണ റിപ്പോര്‍ട്ടിന്റെ അടിസ്ഥാനത്തില്‍ തെരച്ചില്‍ നടത്തുന്നതിനിടെയാണ് അഞ്ചു പേരും വീരമൃത്യു വരിച്ചത്. ഭീകരര്‍ ഒളിഞ്ഞിരുന്ന് വെടിയുതിര്‍ക്കുകയായിരുന്നു.

അതേസമയം ഭീകരര്‍ക്ക് സൈന്യം കനത്ത തിരിച്ചടി നല്‍കി. ഷോപ്പിയാനില്‍ മൂന്ന് ഭീകരരെ സൈന്യം വധിച്ചു. രാത്രി മുഴുവന്‍ നീണ്ട ഏറ്റുമുട്ടലിലാണ് ലക്ഷ്‌കര്‍ ഭീകരരെ വധിച്ചത്. ഇവരില്‍ നിന്ന് ആയുധങ്ങള്‍ പിടിച്ചെടുത്തു. ഷോപ്പിയാനിലെ ഖെരിപോരയില്‍ ഏറ്റുമുട്ടല്‍ തുടരുന്നു. കഴിഞ്ഞ 48 മണിക്കൂറിനിടെ അഞ്ച് കൊടും ഭീകരരെയാണ് സൈന്യം വധിച്ചത്.

ജമ്മു കശ്മീരിലെ പൂഞ്ചില്‍ നിയന്ത്രണ രേഖയില്‍ ഭീകരരുമായുള്ള ഏറ്റുമുട്ടലില്‍ മലയാളി ഉള്‍പ്പെടെ 5 ഇന്ത്യന്‍ സൈനികര്‍ ഇന്നലെയാണ് വീരമൃത്യു വരിച്ചത്. കൊല്ലം ഓടനാവട്ടം കുടവട്ടൂര്‍ ആശാന്‍മുക്കില്‍ ശില്‍പാലയത്തില്‍ (മാടമ്പള്ളിയില്‍) ഹരികുമാറിന്റെയും ബീനാകുമാരിയുടെയും മകന്‍ ജവാന്‍ എച്ച്. വൈശാഖ് (അക്കു 24), പഞ്ചാബ് സ്വദേശികളായ നായിബ് സുബേദാര്‍ ജസ്‌വിന്ദര്‍ സിങ്, ജവാന്‍ മന്‍ദീപ് സിങ്, ജവാന്‍ ഗജ്ജന്‍ സിങ്, യുപി സ്വദേശി ജവാന്‍ സരജ് സിങ് എന്നിവരാണു വീരമൃത്യു വരിച്ചത്.

അതിര്‍ത്തിയിലെ സുരാന്‍കോട്ട് വനമേഖലയില്‍ ഭീകരര്‍ ഒളിവില്‍ കഴിയുന്നുണ്ടെന്ന രഹസ്യ വിവരത്തെത്തുടര്‍ന്ന് ഇന്നലെ പുലര്‍ച്ചെ തിരച്ചില്‍ നടത്തുന്നതിനിടെയായിരുന്നു ഭീകരാക്രമണം. ഒളിച്ചിരുന്ന ഭീകരര്‍ സൈനികര്‍ക്കു നേരെ വെടിയുതിര്‍ക്കുകയായിരുന്നു. ഗുരുതരമായി പരുക്കേറ്റ സൈനികരെ ഉടന്‍ ആശുപത്രിയിലെത്തിച്ചെങ്കിലും രക്ഷിക്കാനായില്ല. ഭീകരരെ പിടികൂടാന്‍ കൂടുതല്‍ ഭടന്മാര്‍ സ്ഥലത്തേക്കു കുതിച്ചു. വനമേഖല വളഞ്ഞ് അവര്‍ തിരച്ചില്‍ നടത്തി. 2 കിലോമീറ്റര്‍ അകലെയുണ്ടായ മറ്റൊരു ഏറ്റുമുട്ടലില്‍ ഒരു സൈനികനു പരുക്കേറ്റു.

പാക്ക് അധിനിവേശ കശ്മീരില്‍ നിന്ന് വന്‍ ആയുധശേഖരവുമായി ഏതാനും ദിവസങ്ങള്‍ മുന്‍പാണു ഭീകരര്‍ ഇന്ത്യയിലേക്കു നുഴഞ്ഞുകയറിയത്. ശൈത്യകാലം ആരംഭിക്കുന്നതിനു മുന്‍പ് പരമാവധി ഭീകരരെ അതിര്‍ത്തി കടത്തി ഇന്ത്യയിലേക്കു വിടാനാണു പാക്ക് ശ്രമം. പാക്ക് സേനയുടെ സഹായവും ഇവര്‍ക്കു ലഭിക്കുന്നുണ്ട്.

വടക്കന്‍ കശ്മീരിലെ ബന്ദിപുരയിലുണ്ടായ ഏറ്റുമുട്ടലില്‍ ലഷ്‌കര്‍ ഭീകരന്‍ ഇംതിയാസ് അഹമ്മദ് ദറിനെ സേന വധിച്ചു. കശ്മീരിലെ ഷാഗുന്ദില്‍ കഴിഞ്ഞ ദിവസം ടാക്‌സി ഡ്രൈവര്‍ മുഹമ്മദ് ഷാഫി ലോണിനെ കൊലപ്പെടുത്തിയതിനു പിന്നില്‍ ദര്‍ ആണ്. കശ്മീരില്‍ ഹിന്ദു, സിഖ് മതസ്ഥരെ കഴിഞ്ഞ ദിവസങ്ങളില്‍ കൊലപ്പെടുത്തിയതിലും ഇയാള്‍ക്കു പങ്കുണ്ടെന്നാണു വിവരം.

ദക്ഷിണ കശ്മീരിലെ അനന്ത്‌നാഗിലുണ്ടായ ഏറ്റുമുട്ടലില്‍ മറ്റൊരു ഭീകരനെയും സേന വധിച്ചു. ഷോപിയനില്‍ ഭീകരരുടെ സാന്നിധ്യം സംബന്ധിച്ച രഹസ്യ വിവരത്തെത്തുടര്‍ന്ന് ഇന്നലെ രാത്രി സേനയും പൊലീസും തിരച്ചില്‍ ആരംഭിച്ചു. അതിലാണ് മൂന്ന് ഭീകരരെ വധിച്ചത്.

വീരമൃത്യു വരിച്ച മലയാളി ജവാന്‍ എച്ച്. വൈശാഖിന്റെ (അക്കു) മൃതദേഹം ഇന്നു വൈകിട്ട് നാട്ടിലെത്തിക്കുമെന്നാണ് വിവരം. രാവിലെ കശ്മീരിലെ രജൗറിയില്‍ സേനയുടെ അന്തിമോപചാരം അര്‍പ്പിക്കും. 2017 ല്‍ മാറാഠി റജിമെന്റില്‍ സൈനിക സേവനം ആരംഭിച്ച വൈശാഖ് പഞ്ചാബില്‍ നിന്ന് 7 മാസം മുന്‍പാണ് ജമ്മുവില്‍ എത്തിയത്. അവിവാഹിതനായ വൈശാഖ് 2 മാസം മുന്‍പാണ് അവധിക്ക് നാട്ടില്‍ വന്നു മടങ്ങിയത്.