എറണാകുളം തൃപ്പുണിത്തുറ പേട്ടയില്‍ വീടിനോട് ചേര്‍ന്നുള്ള ഫര്‍ണീച്ചര്‍ നിര്‍മ്മാണ കേന്ദ്രത്തില്‍ തീപ്പിടിച്ച്‌ ഒരാള്‍ മരിച്ചു. ഇന്ന് പുലര്‍ച്ചെയായിരുന്നു സംഭവം. പെരുമ്പാവൂര്‍ സ്വദേശി സലാവുദ്ദീന്റെ ഉടമസ്ഥതയിലുള്ള സ്ഥലത്താണ് തീപ്പിടുത്തമുണ്ടായത്.അഗ്‌നിശമനസേന സ്ഥലത്തെത്തി തീയണച്ചു. വര്‍ക്ക് ഷോപ്പിനോട് ചേര്‍ന്നുള്ള വീട്ടില്‍ താമസിച്ചിരുന്ന സലാവുദ്ദീനേയും കുടുംബത്തെയും രക്ഷപ്പെടുത്തി.

തീപ്പടിത്തത്തിന്റെ കാരണം വ്യക്തമല്ല. മരിച്ചയാളെ തിരിച്ചറിഞ്ഞിട്ടില്ല. ഗുരുതരമായി പൊള്ളലേറ്റ ഇയാളെ തൃപ്പൂണിത്തുറ താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

മരിച്ചയാള്‍ കടയില്‍ ജോലി ചെയ്യുന്നയാളല്ലെന്ന് ഉടമ പറഞ്ഞു. കടയ്ക്ക് മുന്നില്‍ ഉറങ്ങിക്കിടന്ന ആരെങ്കിലുമാണോ അതോ തീപിടിച്ചതറിഞ്ഞ് രക്ഷാപ്രവര്‍ത്തനത്തിന് എത്തിയ ആളാണോ മരിച്ചതെന്നാണ് പൊലീസ് സംശയിക്കുന്നത്.സംഭവത്തില്‍ അന്വേഷണമാരംഭിച്ചിട്ടുണ്ട്. മൃതദേഹം തൃപ്പൂണിത്തുറ താലൂക്ക് ആശുപത്രിയില്‍ സൂക്ഷിച്ചിരിക്കുകയാണ്. ഷോട്ട് സര്‍ക്യൂട്ടായിരിക്കും അപകട കാരണമെന്നാണ് പ്രാഥമിക നിഗമനം. തൃപ്പൂണിത്തുറ ഫയര്‍ഫോഴ്‌സില്‍ നിന്നും രണ്ട് യൂണിറ്റെത്തിയാണ് രക്ഷാപ്രവര്‍ത്തനം നടത്തിയത്. വീടിന് പുറത്തുകിടന്ന വാഹനവും കത്തിനശിച്ചിട്ടുണ്ട്

.