ബാലികാ ദിനത്തിൽ കാട്ടാക്കട എം എൽ എ ഐ ബി സതീഷ് പങ്കു വച്ച ഫെയ്‌സ്ബുക്ക് കുറിപ്പ് ശ്രദ്ധേയമാകുന്നു. കുറിപ്പിന്റെ പൂർണ്ണ രൂപം ഇങ്ങനെ; 2012 മുതൽ ഐക്യരാഷ്ട്ര സഭ എല്ലാ വർഷവും ഒക്ടോബർ 11 ബാലികാ ദിനമായാണ് കണക്കാക്കുന്നത്. എഫ് ബി യിൽ ഇന്നലെ കണ്ണിലുടക്കിയ ഒരു കാഴ്ച പങ്കുവയ്ക്കുകയാണ്.

കോട്ടയം സ്വദേശിനി ദിയ ജോസഫ് ആണ് കഥാപാത്രം. കഴിഞ്ഞ പ്ലസ് ടൂ പരീക്ഷയിൽ 98% മാർക്ക് സ്കോർ ചെയ്തശേഷം ബുള്ളറ്റ് മെക്കാനിക്കായ അച്ഛനോടൊപ്പം തകരാറിലായ ബുള്ളറ്റുകളുടെ പ്രശ്നങ്ങൾ പരിഹരിക്കുന്ന തിരക്കിലാണവളിപ്പോൾ...

ഇടയ്ക്കൊക്കെ അൽപം ഓയിലും ഗ്രീസുമൊക്കെ ആ കയ്യിൽ പുരളും, പിണങ്ങി നിൽക്കുന്ന ബുള്ളറ്റിന്റെ യന്ത്രങ്ങളോട് മല്ലിടുമ്പോൾ അൽപം മസിൽപ്പവറും പുറത്തെടുക്കണം.....ദിയക്ക് പരിഭവമില്ല .....സന്തോഷം മാത്രം.....അച്ഛനെ സഹായിക്കുന്നതിലും ..... സ്വയം ഒരു പാത വെട്ടിതെളിക്കുന്നതിലും....

ഇന്ന് സ്ത്രീകൾ കടന്നുചെല്ലാത്ത തൊഴിൽ മേഖലകൾ കുറവെന്നു തന്നെ പറയാം. തെങ്ങുകയറ്റം മുതൽ രാജ്യത്തിന്റെ പ്രതിരോധ സേനയിൽ വരെ അവരുണ്ട്. ദിയയെ പോലുള്ള മിടുമിടുക്കികൾ പുതിയ പുതിയ മേഖലകളിലേക്ക് സ്വയം ഇറങ്ങി വരുന്നത് കാണുമ്പോൾ വളരെ സന്തോഷം.

ഒരു ദിവസത്തേക്ക് മാത്രം മേനി നിറയെ സ്വർണ്ണവും വാരി വിതറി- ജീവിതകാലം മുഴുവൻ അടുക്കളകളിൽ കുടുങ്ങി നിൽക്കേണ്ടവർ മാത്രമല്ല തങ്ങളെന്ന ബോധ്യം ഇന്നത്തെ എല്ലാ പെൺകുട്ടികൾക്കുമുണ്ട്.

ഇത് സംരംഭങ്ങളുടെയും , സംരംഭകരുടെയും കൂടി കാലമാണ്. മണ്ഡലത്തിനകത്ത് സംരംഭങ്ങൾ വിജയകരമാക്കുവാൻ കഠിനാധ്വാനം ചെയ്യുന്ന പെൺകുട്ടികളെ അറിയാം എന്ന് പറയുന്നതിൽ അഭിമാനം.

കാട്ടാക്കട നിയോജക മണ്ഡലത്തിലെ സംരംഭങ്ങൾക്ക് പ്രോത്സാഹനം നൽകുവാൻ " കാട്ടാൽ ഇൻഡസ്ട്രിയൽ ഡവലപ്പ്മെന്റ് കൗൺസിൽ " രൂപീകരിക്കുന്നതിനുള്ള പരിശ്രമത്തിന്റെ അവസാന ഘട്ടത്തിലാണിപ്പോൾ. സംരംഭകർക്ക് ഒരു സഹായമായി അത് ഉടൻ പ്രവർത്തിപഥത്തിലെത്തും.

കഴിഞ്ഞ തവണ അനിവാര്യമായ പെണ്ണിടങ്ങൾക്കായി "ഒപ്പം " എന്ന പദ്ധതിക്ക് തുടക്കം കുറിച്ചപ്പോഴും ലക്ഷ്യംവച്ചത് ആർജവമുള്ള പെൺരൂപങ്ങളാണ്. ഇന്നത്തെ ബാലികമാർ നാളത്തെ വനിതകളാണ്. അവരെ "അടുക്കളയിൽ നിന്ന് അരങ്ങത്തേക്ക് " പ്രത്യേകിച്ച് ആനയിക്കേണ്ട കാര്യമൊന്നുമില്ല .....

കാരണം ഇപ്പോഴെ അവർ അരങ്ങത്തു തന്നെയാണ് .....അടുക്കളയിൽ കുരുങ്ങാൻ അവർക്ക് നേരമില്ല ....വരാനിരിക്കുന്നത് പെൺകുട്ടികളുടെ കാലമാണ് .... ഹൃദയത്തിൽ 916(Nine One Six) തിളക്കമുള്ള നല്ല ഉശിരുള്ള പെൺമക്കളുടെ കാലം....പ്രതീക്ഷയോടെ....

ഐ.ബി സതീഷ്