ഇന്ത്യയെ പ്രകോപിപ്പിക്കുന്ന നടപടികളുമായി വീണ്ടും ചൈന. ഇന്ത്യ ചൈന അതിര്‍ത്തി സംഘര്‍ഷത്തെക്കുറിച്ച് ചൈനീസ് മാദ്ധ്യമങ്ങള്‍ വലിയ പ്രചരണമാണ് നടത്തുന്നത്. ഇന്ത്യന്‍ സൈനികരെ തടഞ്ഞുവയ്ക്കുന്നതും കണ്ണുകെട്ടി നടത്തിക്കുന്നതുമായ ദൃശ്യങ്ങളാണ് ചൈനീസ് മാദ്ധ്യമങ്ങള്‍ പ്രചരിപ്പിക്കുന്നത്. ചൈനയുടെ പൊള്ളത്തരങ്ങള്‍ പൊളിച്ചടുക്കാനുള്ള ശ്രമത്തിലാണ് ഇന്ത്യ.

പ്രചരിപ്പിക്കുന്ന വീഡിയോകളെക്കുറിച്ചും ഫോട്ടോകളെക്കുറിച്ചും കേന്ദ്രസര്‍ക്കാര്‍ വിശദീകരിക്കണമെന്ന് കോണ്‍ഗ്രസ് ആവശ്യപ്പെട്ടു. യൂത്ത് കോണ്‍ഗ്രസ് നേതാവ് ബി.വി.ശ്രീനിവാസ് ഉള്‍പ്പടെയുള്ളവര്‍ ദൃശ്യങ്ങള്‍ ട്വീറ്റ് ചെയ്തിട്ടുണ്ട്.

ഗല്‍വാന്‍ താഴ് വരയില്‍ കഴിഞ്ഞ വര്‍ഷം നടന്ന സംഭവം എന്ന നിലയിലാണ് ദൃശ്യങ്ങള്‍. വിഷയത്തില്‍ കേന്ദ്ര സര്‍ക്കാര്‍ ഔദ്യോഗികമായി പ്രതികരിച്ചിട്ടില്ലെങ്കിലും വസ്തുതയറിയാന്‍ ശ്രമിക്കുന്നുണ്ട്. അതേ സമയം ഇന്ത്യ ചൈന അതിര്‍ത്തി തര്‍ക്കത്തില്‍ പതിമൂന്നാം വട്ട കമാന്‍ഡര്‍ തല ചര്‍ച്ച ധാരണയില്‍ എത്താതെ പിരിഞ്ഞു. ചുസുല്‍ മോള്‍ഡ അതിര്‍ത്തിയില്‍ വച്ചാണ് ചര്‍ച്ച നടന്നത്. ഒക്ടോബര്‍ ഒന്‍പതിന് ഇന്ത്യയും ചൈനയും തമ്മില്‍ സംഘര്‍ഷം ഉണ്ടായതായി റിപ്പോര്‍ട്ടുകള്‍ ഉണ്ടായിരുന്നു.

അതേസമയം ജമ്മുകാശ്മീരില്‍ നടക്കുന്ന ആക്രമണങ്ങളുടെ പശ്ചാത്തലത്തില്‍ പാകിസ്ഥാന് മുന്നറിയിപ്പുമായി കേന്ദ്ര ആഭ്യന്തരമന്ത്രി അമിത് ഷാ. അതിര്‍ത്തി ലംഘനം തുടര്‍ന്നാല്‍ ഇനിയും മിന്നലാക്രമണങ്ങള്‍ നടത്താന്‍ മടിക്കില്ലെന്നും അമിത് ഷാ പറഞ്ഞു. ഗോവയില്‍ നടന്ന ഒരു ചടങ്ങില്‍ സംസാരിക്കുകയായിരുന്നു ആഭ്യന്തര മന്ത്രി.

പ്രധാനമന്ത്രി നരേന്ദ്ര മോദിയുടേയും മുന്‍ പ്രതിരോധ മന്ത്രി മനോഹര്‍ പരീക്കറുടേയും നേതൃത്വത്തില്‍ നടന്ന മിന്നലാക്രമണം സുപ്രധാന നടപടിയായിരുന്നു. തീവ്രവാദികളും നുഴഞ്ഞു കയറ്റക്കാരും അതിര്‍ത്തിയില്‍ വന്ന് ആക്രമണം നടത്താറുണ്ടായിരുന്നു. ഇന്ത്യയുടെ അതിര്‍ത്തികള്‍ ഭേദിക്കരുതെന്ന് ഞങ്ങള്‍ ഇതിലൂടെ സന്ദേശം നല്‍കി. ചര്‍ച്ചകള്‍ നടത്തിയിരുന്ന ഒരു കാലമുണ്ടായിരുന്നു. എന്നാലിപ്പോള്‍ പരസ്പരം പ്രതികരിക്കേണ്ട കാലമാണെന്നും അമിത് ഷാ പറഞ്ഞു.

അതേസമയം ദക്ഷിണ ഏഷ്യയില്‍ സമാധാനം നിലനില്ക്കണമെങ്കില്‍ കശ്മീര്‍ വിഷയം പരിഹരിക്കണമെന്ന് പാക് വിദേശകാര്യമന്ത്രി മുഹമ്മദ് ഖുറേഷി. ഏഷ്യയിലെ കോണ്‍ഫറന്‍സ് ഓണ്‍ ഇന്ററാക്ഷന്‍ ആന്റ് കോണ്‍ഫിഡന്‍സ് ബില്‍ഡിംഗിംഗ് മെഷേഴ്‌സിന്റെ (സിഐസിഎ) ആറാമത് മന്ത്രിസഭ യോഗത്തില്‍ സംസാരിക്കുകയായിരുന്നു ഖുറേഷി.

യു.എന്‍ സുരക്ഷാ കൗണ്‍സിലിന്റെ പ്രമേയങ്ങള്‍ക്കും കശ്മീരിലെ ജനങ്ങളുടെ ആഗ്രഹങ്ങള്‍ക്കും അംഗീകാരം നല്‍കണം. ഇന്ത്യയ്ക്കും പാകിസ്ഥാനുമിടയിലുള്ള കശ്മീര്‍ വിഷയം പരിഹരിക്കാതെ ദക്ഷിണ ഏഷ്യയില്‍ സമാധാനാന്തരീക്ഷമുണ്ടാവാന്‍ സാദ്ധ്യതയില്ലെന്നും ഖുറേഷി പറഞ്ഞു. യുദ്ധക്കെടുതിയില്‍ വലയുന്ന അഫ്ഗാനിസ്ഥാനില്‍ സ്ഥിരതയും വികസനവും ഉറപ്പുവരുത്തണമെന്നും ഖുറേഷി ലോക രാജ്യങ്ങളോട് ആവശ്യപ്പെട്ടു. ഏഷ്യയില്‍ സമാധാനം നിലനിറുത്തുന്നതില്‍ സി.ഐ.സി.എ നിര്‍ണായക പങ്ക് വഹിച്ചിട്ടുണ്ടെന്നും പാക് മന്ത്രി കൂട്ടിച്ചേര്‍ത്തു.

അതേസമയം മുന്‍ പ്രധാനമന്ത്രി ഇന്ദിരാഗാന്ധിയെ പുകഴ്ത്തി പ്രതിരോധമന്ത്രി രാജ്‌നാഥ് സിംഗ് രംഗത്തെത്തി. ഇന്ദിരാ ഗാന്ധി വര്‍ഷങ്ങളോളം രാജ്യത്തെ നയിക്കുക മാത്രമല്ല ചെയ്തത്, യുദ്ധസമയത്തും അവര്‍ രാജ്യത്തെ മുന്നില്‍ നിന്ന് നയിച്ചെന്ന് രാജ്‌നാഥ് സിംഗ് പറഞ്ഞു.