നീന്തല്‍ പരിശീലനത്തിനിടെ മൂന്നു കുട്ടികള്‍ മുങ്ങിപ്പോയി... രക്ഷാശ്രമത്തിനിടെ നീന്തല്‍ വിദഗ്ധന് ദാരുണാന്ത്യം. വടകര മാഹി കനാലിലാണ് ദുരന്തമുണ്ടായത്.

അരയക്കൂല്‍ താഴെ തട്ടാറത്ത് താഴെകുനി സ്വദേശി സഹീര്‍(42) ആണ് മരിച്ചത്. ചെമ്മരത്തൂര്‍ ഭാഗത്ത് നീന്തല്‍ പഠിക്കുന്നതിനിടെ മുങ്ങിയ കുട്ടിയെ രക്ഷപ്പെടുന്നതിനിടെയാണ് സഹീര്‍ അപകടത്തില്‍പ്പെട്ടത്. ഇന്നലെ വൈകിട്ടോടെയാണ് അപകടം.

മൂന്ന് കുട്ടികളെ രക്ഷപ്പെടുത്തിയതിന് ശേഷം കുഴഞ്ഞ് വീണതാണെന്നാണ് കരുതുന്നത്. മുങ്ങി കാണാതായ സഹീറിനെ ഒന്നര മണിക്കൂറിന് ശേഷം നാട്ടുകാരും ഫയര്‍ഫോഴ്സും നടത്തിയ തിരച്ചിലിന് ഒടുവിലാണ് മൃതദേഹം കണ്ടെത്തിയത്. കനാലില്‍ ഒഴുക്കില്‍പ്പെട്ടവരെ രക്ഷിച്ച സഹീറിന്റെ ദാരുണാന്ത്യം നാടിനെ തീരാസങ്കടത്തിലാഴ്ത്തി.


മൃതദേഹം വടകര താലൂക് ആശുപത്രിയിലേക്ക് മാറ്റി. പോസ്റ്റ് മോര്‍ട്ടത്തിന് ശേഷം മൃതദേഹം ബന്ധുക്കള്‍ക്ക് വിട്ടുനല്‍കും. അപകടസ്ഥലത്ത് നാല് മീറ്ററോളം ആഴമുണ്ടായിരുന്നു.

ചുഴിയുള്ള ഭാഗവുമാണിത്. ഈ പ്രദേശത്ത് ഇതിന് മുന്‍പ് നാല് പേര്‍ മുങ്ങി മരിച്ചിരുന്നു. ആഴമുള്ള കനാലില്‍ അപകട സാധ്യത മുന്നറിയിപ്പ് പോലുമില്ലെന്നും പരാതിയുണ്ട്. സംഭവത്തില്‍ പൊലീസ് കേസെടുത്ത് അന്വേഷണം തുടങ്ങി.