മലങ്കര ഓര്‍ത്തഡോക്സ് സഭയുടെ ഒമ്പതാമത് കാതോലിക്കായും സഭാധ്യക്ഷനുമായി ബസേലിയോസ് മാര്‍ത്തോമ്മ മാത്യൂസ് തൃതീയന്‍ കാതോലിക്കാ ബാവ സ്ഥാനാരോഹണം ചെയ്തു. ഇന്നു രാവിലെ പരുമല സെമിനാരി ദേവാലയത്തില്‍ നടന്ന വിശുദ്ധ കുര്‍ബാനമധ്യേയായിരുന്നു സ്ഥാനാരോഹണ ശുശ്രൂഷ. സഭയുടെ സീനിയര്‍ മെത്രാപ്പോലീത്ത കുര്യാക്കോസ് മാര്‍ ക്ലീമിസ് മുഖ്യകാര്‍മികത്വം വഹിച്ചു.

സഭയിലെ എല്ലാ മെത്രാപ്പോലീത്തമാരും സഹോദരീസഭാമെത്രാപ്പോലീത്തമാരും സഹകാര്‍മികരായിരുന്നു.കാതോലിക്കാ സ്ഥാനത്തേക്കും മലങ്കര മെത്രാപ്പോലീത്ത സ്ഥാനത്തേക്കും സഭ സുന്നഹദോസും മാനേജിംഗ് കമ്മിറ്റിയും ശിപാര്‍ശ ചെയ്ത ഡോ.മാത്യൂസ് മാര്‍ സേവേറിയോസ് മെത്രാപ്പോലീത്തയെ ഇന്നലെ പരുമലയില്‍ ചേര്‍ന്ന മലങ്കര സുറിയാനി ക്രിസ്ത്യാനി അസോസിയേഷനാണ് തെരഞ്ഞെടുത്തത്.

അസോസിയേഷന്‍ വേദിയില്‍ തന്നെ മാത്യൂസ് മാര്‍ സേവേറിയോസ് മലങ്കര മെത്രാപ്പോലീത്തയുടെ സ്ഥാന ചിഹ്നങ്ങള്‍ സ്വീകരിച്ച് ചുമതലയേറ്റു. തുടര്‍ന്ന് പരുമല പള്ളിയില്‍ പ്രാര്‍ഥന നടത്തി. സുന്നഹദോസ് ചേര്‍ന്ന് തെരഞ്ഞെടുപ്പ് അംഗീകരിച്ചതോടെയാണ് ഇന്ന് കാതോലിക്കാ ബാവയുടെ സ്ഥാനാരോഹണ ശുശ്രൂഷ നടന്നത്. ബസേലിയോസ് മാര്‍ത്തോമ്മ മാത്യൂസ് തൃതീയന്‍ എന്ന പേര് അദ്ദേഹം സ്വീകരിച്ചു.



വിശുദ്ധ കുര്‍ബാനയ്ക്ക് കുര്യാക്കോസ് മാര്‍ ക്ലീമിസ് മെത്രാപ്പോലീത്ത മുഖ്യകാര്‍മികത്വം വഹിച്ചു. കുര്‍ബാന മധ്യേ ഡോ.യൂഹാനോന്‍ മാര്‍ മിലിത്തിയോസ് മെത്രാപ്പോലീത്ത വചനശുശ്രൂഷ നടത്തി. തുടര്‍ന്ന് പരിശുദ്ധാത്മവാസത്തിനുവേണ്ടിയുള്ള പ്രാര്‍ഥനയോടെ ശുശ്രൂഷകള്‍ ആരംഭിച്ചു. ശുശ്രൂഷാ മധ്യേ നിയുക്ത കാതോലിക്കയില്‍ നിന്നു സമ്മതപത്രം സ്വീകരിക്കുകയും സഭാ പാരമ്പര്യപ്രകാരമുള്ള പേര് നല്‍കി മുഖ്യകാര്‍മികന്‍ പൗരസ്ത്യ കാതോലിക്കാ സ്ഥാനത്തേക്ക് അദ്ദേഹത്തെ അഭിഷേകം ചെയ്തു.

മുഖ്യകാര്‍മികന്‍ പുതിയ കാതോലിക്കായുടെ നാമകരണം നടത്തി സ്ഥാനാരോഹണ പ്രഖ്യാപനം നടത്തി.