അവാര്‍ഡുകള്‍ പ്രഖ്യാപിക്കുമ്പോള്‍ പലപ്പോഴും യുവ താരങ്ങളെ തഴയുകയാണ് പതിവ്. അവാര്‍ഡിനുള്ളില്‍ പഴയ താരങ്ങളും പുതിയ താരങ്ങളും തമ്മില്‍ ഇഞ്ചോടിഞ്ച് പൊരുതിയാല്‍ യുവ താരങ്ങള്‍ക്ക് ഇനിയും അവസരം ലഭിക്കുമല്ലോ എന്ന് കണ്ട് അവരെ തഴഞ്ഞ് അറിയപ്പെടുന്ന താരങ്ങള്‍ക്ക് അവാര്‍ഡ് നല്‍കുകയാണ് പതിവ്. എന്നാല്‍ ഇക്കുറി ആ പതിവെല്ലാം തെറ്റി.
മലയാളത്തിന്റെ മഹാനടന്‍ മമ്മൂട്ടിയെ നിവിന്‍ പോളിയും സുദേവ് നായരും മഹാ നടി മഞ്ജു വാര്യരെ നസ്‌റിയയും വെട്ടി.
അഭിനയ ചക്രവര്‍ത്തിയായ മമ്മൂട്ടിയുടെയും ശോഭന കഴിഞ്ഞ് വന്ന മികച്ച നടിയെന്ന ഖ്യാതിയുള്ള മഞ്ജു വാര്യരുടെയും അഭിനയ ചാതുരിയെ മറികടന്നാണ് യുവതലമുറയിലെ നിവിന്‍ പോളിയും സുദേവ് നായരും നസ്രിയ നസീമും മത്സരത്തില്‍ ഒന്നാമതെത്തിയത്.
ചലച്ചിത്ര പുരസ്‌കാര നിര്‍ണയ വാര്‍ത്തകള്‍ പുറത്തു വന്നതുമുതല്‍ ഏറെ ചര്‍ച്ച ചെയ്യപ്പെട്ടത് മമ്മൂട്ടിയുടെയും നിവിന്‍ പോളിയുടെയും പേരുകളായിരുന്നു. നിവിനെ വെട്ടി മമ്മൂട്ടിയും ലെനയെ വെട്ടി മഞ്ജൂ വാര്യറും അവാര്‍ഡ് നേടുമെന്നായിരുന്നു വാര്‍ത്തകള്‍. സുദേവ് നായര്‍ എന്ന പേര് ആരും പ്രതീക്ഷിച്ചതുമില്ല. അതുപോലെ തന്നെയാണ് നസ്രിയയുടെ കാര്യവും. ആദ്യം മുതല്‍ ചര്‍ച്ചകളില്‍ നിറഞ്ഞു നിന്നത് മഞ്ജു വാര്യരുടെ പേരായിരുന്നു. നസ്രിയ എന്ന പേര് ആരും പറഞ്ഞു കേട്ടതുപോലുമില്ല.
വേണു സംവിധാനം ചെയ്ത മുന്നറിയിപ്പിലെ ജയില്‍പ്പുള്ളിയുടെ വേഷം സമീപകാലത്ത് മമ്മൂട്ടി അവതരിപ്പിച്ച ഏറ്റവും മികച്ച കഥാപാത്രങ്ങളില്‍ ഒന്നായിരുന്നു. ദേശീയ പുരസ്‌കാരത്തിനുള്ള മത്സരത്തിന്റെ അവസാന ഘട്ടത്തില്‍ വരെ എത്തിയതാണ് മുന്നറിയിപ്പിലെ മമ്മൂട്ടിയുടെ ഈ പ്രകടനം. അതുകൊണ്ട് തന്നെ സംസ്ഥാന അവാര്‍ഡ് മമ്മൂട്ടി ഏറെ ഉറപ്പിച്ചതായിരുന്നു. ഇതിനിടെയാണ് നിവിന്‍ പോളി മമ്മൂട്ടിയുടെ പ്രകടനത്തിന് വിലങ്ങു തടിയായി എത്തിയത്.
1983ല്‍ മൂന്നു കാലഘട്ടം അവതരിപ്പിക്കുകയും ബാംഗ്ലൂര്‍ ഡേയ്‌സില്‍ നാട്ടിന്‍പുറത്തുകാരനായ സോഫ്റ്റ്‌വെയര്‍ എന്‍ജിനിയറുടെ വേഷം മനോഹരമാക്കുകയും ചെയ്ത നിവിന്‍ പോളി മമ്മൂട്ടിയുടെ ജയില്‍പുള്ളിയേക്കാള്‍ മികച്ചുനിന്നുവെന്ന വിലയിരുത്തലാണ് ജൂറി നടത്തിയത്. മമ്മൂട്ടിക്ക് മികച്ച അവാര്‍ഡ് നല്‍കാതെ പ്രത്യേക പുരസ്‌ക്കാരം നല്‍കാനായിരുന്നു തീരുമാനം. എന്നാല്‍ അത് നിവിന്‍ പോളിയെ മഹത്വവത്കരിക്കുമെന്നതിനാലും മമ്മൂട്ടിയെ അപമാനിക്കലാകുമെന്ന വിധത്തിലേക്കും കാര്യങ്ങള്‍ നീങ്ങിയതോടെയാണ് അതില്‍ നിന്നും മമ്മൂട്ടിയെ ഒഴിവാക്കിയത്.
സുദേവ് നായരെന്ന പേരും മലയാളികള്‍ക്ക് പുതിയതാണ്. പുനെ ഫിലിം ഇന്‍സ്റ്റിറ്റിയുട്ട് വിദ്യാര്‍ത്ഥിയായ സുദേവ് എന്ന യുവതാരവും മമ്മൂട്ടിയുടെ പരിചയസമ്പത്തിനെ മറികടന്ന് പുരസ്‌കാര നേട്ടത്തിലെത്തിയത് കരുത്തുറ്റ അഭിനയമികവു കൊണ്ടു തന്നെയാണ്. എം ബി പത്മകുമാര്‍ സംവിധാനം ചെയ്ത മൈ ലൈഫ് പാര്‍ട്ണറിലെ അഭിനയത്തിനാണ് ഈ യുവനടന്‍ പുരസ്‌കാരം സ്വന്തമാക്കിയത്. സുദേവിന്റെ ആദ്യ ചിത്രം കൂടിയാണിത്.
അവസാന നിമിഷ അപ്രതീക്ഷിതമായാണ് നസ്രിയയുടെ പേര് മികച്ച നടിയുടെതായി പുറത്തുവന്നത്. മഞ്ജു വാര്യരുടെ തിരിച്ചുവരവിന്റെ പേരില്‍ ഏറെ ആഘോഷിക്കപ്പെട്ട ചിത്രമാണ് റോഷന്‍ ആന്‍ഡ്രൂസ് സംവിധാനം ചെയ്ത ഹൗ ഓള്‍ഡ് ആര്‍ യൂ. ചിത്രത്തിലെ അഭിനയത്തിന് മഞ്ജു മികച്ച നടിക്കുള്ള പുരസ്‌കാരത്തിന് അവസാന റൗണ്ടു വരെ മത്സരത്തിനുണ്ടായിരുന്നു. എന്നാല്‍, ഓം ശാന്തി ഓശാന എന്ന ജനപ്രിയ ചിത്രത്തിലെ കുട്ടിത്തം വിട്ടുമാറാത്ത നായികയെ പ്രേക്ഷകരുടെ മനസില്‍ പ്രതിഷ്ഠിച്ച നസ്രിയയെ ജൂറിയും അംഗീകരിക്കുകയായിരുന്നു.
പരിചയ സമ്പത്തിനെയും മറികടന്ന തന്മയത്വത്തോടെയുള്ള അഭിനയം തന്നെയാണ് നിവിനും സുദേവിനും നസ്രിയക്കും തുണയായത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha