വെള്ളക്കെട്ടിലൂടെ ബസ് ഓടിച്ച് യാത്രക്കാരുടെ ജീവന് ഭീഷണിയുണ്ടാക്കിയതിന് സസ്‌പെന്‍ഷനിലായ കെ.എസ്.ആര്‍.ടി.സി. ഡ്രൈവര്‍ എസ്. ജയദീപ് സോഷ്യല്‍ മീഡിയയിലെ താരമാകുകയാണ്. ചാനലുകളിലെല്ലാം ജയദീപ് നിറഞ്ഞു നിന്നു. താന്‍ ജനങ്ങളുടെ ജീവന്‍ രക്ഷിക്കാനാണ് ശ്രമിച്ചത്. അല്ലെങ്കില്‍ ജനങ്ങളും കണ്ടക്ടറും തന്നെ കൈ വയ്ക്കില്ലേ എന്നും ചോദിക്കുന്നു. അന്നത്തെ ദിവസം രാവിലെ 6 മണിക്ക് ചായ കുടിച്ചതാണ്. ഇല്ലാത്തത് കൊണ്ടല്ല സമയം കിട്ടാത്തതിനാല്‍. എന്നിട്ടും ഇതു തന്നെ കിട്ടി.

മാത്രമല്ല അധികൃതര്‍ക്കെതിരേ പരിഹാസവുമായി ജയദീപ് രംഗത്തെത്തി. കെ.എസ്.ആര്‍.ടി.സി.യിലെ കൊണാണ്ടന്‍മാര്‍ അറിയാന്‍ എന്ന് സംബോധന ചെയ്തുതുടങ്ങുന്ന പോസ്റ്റില്‍, തനിക്ക് ആവശ്യമുള്ളപ്പോള്‍ അവധിതരാത്തതും ഇപ്പോള്‍ സസ്‌പെന്‍ഡ് ചെയ്തതുകൊണ്ട് അവധിപോലെയായതും വിശദീകരിക്കുന്നു. ഏതുതൊഴിലും അറിയാവുന്നവനാണ് താനെന്നുപറഞ്ഞ് അച്ഛന്റെ മുടിവെട്ടിക്കൊടുക്കുന്ന ഒരു വീഡിയോയും ഒപ്പമുണ്ട്.

യാത്രക്കാരുടെ ജീവന്‍ രക്ഷിച്ചതിന് സസ്‌പെന്‍ഷന്‍ ലഭിച്ചതിന്റെ സന്തോഷം കൊണ്ട് തബല കൊട്ടുന്നെന്ന തലക്കെട്ടോടെ മറ്റൊരു വീഡിയോയും പോസ്റ്റുചെയ്തിട്ടുണ്ട്. തനിക്ക് ചാടി നീന്തിപ്പോകാന്‍ അറിയാഞ്ഞിട്ടല്ലെന്നും എല്ലാവരെയും പള്ളിമുറ്റത്ത് കയറ്റി രക്ഷിക്കണമെന്നതായിരുന്നു ലക്ഷ്യമെന്നും വിശദമാക്കുന്നുണ്ട്. മുന്നോട്ടുപോകുമ്പോള്‍ യാത്രക്കാര്‍ തന്നെ ചീത്തവിളിക്കുന്നില്ലെന്നത് സാക്ഷ്യപ്പെടുത്തി സംഭവസമയത്തെ വീഡിയോയും പോസ്റ്റുചെയ്തിട്ടുണ്ട്.

ഈരാറ്റുപേട്ടപൂഞ്ഞാര്‍ റൂട്ടില്‍, പൂഞ്ഞാര്‍ സെയ്ന്റ് മേരീസ് പള്ളിക്കുസമീപത്തെ വെള്ളക്കെട്ടിലാണ് ജയദീപ് ഓടിച്ച കെ.എസ്.ആര്‍.ടി.സി. ബസ് കഴിഞ്ഞദിവസം കുടുങ്ങിയത്. അധികം വെള്ളമില്ലാതിരുന്ന റോഡിലൂടെ പോകാമെന്ന പ്രതീക്ഷയിലാണ് ബസ് മുന്നോട്ടെടുത്തതെന്നാണ് ജയദീപ് പറയുന്നത്.

ചെറിയ വണ്ടികള്‍ക്ക് പോകാന്‍ ബസ് ഇടയ്ക്ക് നിര്‍ത്തിക്കൊടുത്തു. ഇതിനിടെ മീനച്ചിലാറ്റില്‍നിന്ന് ഇരച്ചെത്തിയ വെള്ളത്തില്‍ ബസ് നിന്നുപോയി. പിന്നീട് ബസ് സ്റ്റാര്‍ട്ടായില്ല. നാട്ടുകാരാണ് ഒരാള്‍ പൊക്കത്തിലുള്ള വെള്ളത്തിലൂടെ യാത്രക്കാരെ സുരക്ഷിതസ്ഥാനത്തേക്കു മാറ്റിയത്. വടം ഉപയോഗിച്ചാണ് ബസ് വെള്ളത്തില്‍നിന്ന് വലിച്ചുകയറ്റിയത്.

ശക്തമായ മഴയില്‍ വെള്ളക്കെട്ടില്‍ പാതി മുങ്ങിയ കെഎസ്ആര്‍ടിസി ബസിന്റെ വീഡിയോ ദൃശ്യങ്ങള്‍ സോഷ്യല്‍ മീഡിയയില്‍ ഉള്‍പ്പെടെ വൈറലായിരുന്നു. എന്നാല്‍ തന്നെ സസ്‌പെന്‍ഡ് ചെയ്!ത നടപടിയെ പരിഹസിച്ച് സോഷ്യല്‍ മീഡിയയിലൂടെ രംഗത്തെത്തിയിരിക്കുകയാണ് ജയദീപ്. തന്റെ ഫേസ് ബുക്ക് പേജിലൂടെ രൂക്ഷമായ ഭാഷയിലുള്ള നിരവധി പോസ്റ്റുകളാണ് അദ്ദേഹം ഇതുസംബന്ധിച്ച് പങ്കുവയ്ക്കുന്നത്.

ഒരു അവധി ചോദിച്ചാല്‍ തരാന്‍ വലിയ വാലായിരുന്നവന്‍ ഇനി വേറെ ആളെ വിളിച്ച് ഓടിക്കട്ടെ. അല്ലെങ്കില്‍ അവന്‍ ഓടിക്കട്ടെ. അവനൊക്കെ റിട്ടയര്‍ ചെയ്തു കഴിയുമ്പോള്‍ അറ്റാക്ക് ഒന്നും വരാതെ ജീവിച്ചിരുന്നാല്‍ വല്ലോ സ്‌കൂള്‍ ബസോ, ഓട്ടോറിക്ഷയോ , ഓടിച്ച് അരി മേടിക്കേണ്ടതല്ലേ? ഒരു പ്രാക്ടീസാകട്ടെ. ഞാന്‍ വീട്ടുകാര്യങ്ങള്‍ നോക്കി TS No 50 ല്‍ ഉം പോയി സുഖിച്ച് വിശ്രമിക്കട്ടെ.

പ്രതിസന്ധി ഘട്ടത്തില്‍ ആത്മധൈര്യത്തോടെയാണ് താന്‍ പെരുമാറിയതെന്ന് ജയദീപ് പറഞ്ഞു. വേണമെങ്കില്‍ തനിക്ക് നീന്തി രക്ഷപ്പെടാമായിരുന്നു. എന്നാല്‍ എല്ലാവരെയും പള്ളിമുറ്റത്ത് കയറ്റി രക്ഷിക്കണമെന്നതായിരുന്നു തന്റെ ലക്ഷ്യം. യാത്രക്കാര്‍ തന്നെ ചീത്തപറഞ്ഞോ എന്ന കാര്യവും പരിശോധിക്കണമെന്നും ജയദീപ് പറഞ്ഞു. സസ്‌പെന്‍ഡ് ചെയ്ത നടപടിക്കെതിരേയും ജയദീപ് രൂക്ഷമായി പ്രതികരിച്ചു. ഒരു അവധി ചോദിച്ചാല്‍ പോലും തരാന്‍ ബുദ്ധിമുട്ടായിരുന്നു. ഇനി മറ്റൊരാളെവച്ച് ബസ് ഓടിക്കട്ടെയെന്നും ജയദീപ് ഫേസ്ബുക്കില്‍ കുറിച്ചു.