കക്കി ഡാം ഇന്ന് രാവിലെ 11ന് തുറക്കും. ജില്ലയുണ്ടായ അതിശക്തമായ മഴയുടെ അടിസ്ഥാനത്തിലാണ് ഈ തീരുമാനം. ഇന്ന് രാവിലെ 11 മണിയോടെ ഡാം തുറക്കുമെന്നാണ് റിപ്പോര്‍ട്ട്. നാല് ഷട്ടറുകളുള്ളതില്‍ 2 എണ്ണമാണ് ഇന്ന് തുറക്കുക.

പത്തനംതിട്ട ജില്ലയിലെ കക്കി അണക്കെട്ടില്‍നിന്ന് തിങ്കളാഴ്ച 11 മുതല്‍ നിയന്ത്രിതതോതില്‍ വെള്ളം തുറന്നുവിടാന്‍ കെ.എസ്.ഇ.ബി. തീരുമാനം. പമ്പ ഡാമിന്റെയും ഒന്നോ രണ്ടോ ഷട്ടര്‍ തുറന്നേക്കും.

ഞായറാഴ്ച വൈകുന്നേരം കക്കിയിലെ ജലനിരപ്പ് 978.83 മീറ്റര്‍ കവിഞ്ഞിരുന്നു. ഈ നിരപ്പിലെത്തിയാല്‍ തുറന്നുവിട്ട് ജലവിതാനം നിയന്ത്രിക്കണം.

ഒന്നോ രണ്ടോ ഷട്ടറുകള്‍ തുറക്കും. ജനവാസകേന്ദ്രങ്ങളില്‍ നദിയില്‍ 15 സെന്റീമീറ്ററില്‍ താഴെ വെള്ളമുയരുന്ന തരത്തിലായിരിക്കണം തുറന്നുവിടേണ്ടതെന്ന് നിര്‍ദേശിച്ചിട്ടുണ്ട്. പത്തനംതിട്ടയിലെയും ആലപ്പുഴയിലെയും ജില്ലാ ദുരന്തനിവാരണ അതോറിറ്റികളുടെ മേല്‍നോട്ടത്തിലാവും ഇത്.

അണക്കെട്ടുകളിലെ ജലവിതാനത്തെപ്പറ്റി വിലയിരുത്താന്‍ മന്ത്രി കെ. കൃഷ്ണന്‍കുട്ടിയുടെ നേതൃത്വത്തില്‍ കെ.എസ്.ഇ.ബി. ഡയറക്ടര്‍മാരുടെയും ഉന്നത ഉദ്യോഗസ്ഥരുടെയും യോഗം ചേര്‍ന്നിരുന്നു. ഇതില്‍ കക്കി ഉള്‍പ്പെടെയുള്ളവ അടുത്ത ദിവസങ്ങളില്‍ തുറക്കേണ്ട സാഹചര്യമില്ലെന്നാണ് വിലയിരുത്തിയത്. എന്നാല്‍, 20 മുതല്‍ വീണ്ടും മഴ പെയ്യുമെന്ന മുന്നറിയിപ്പ് കാരണമാണ് പിന്നീട് തുറക്കാന്‍ തീരുമാനിച്ചത്.

ലോവര്‍ പെരിയാര്‍, ബാണാസുരസാഗര്‍, ഷോളയാര്‍ എന്നിവിടങ്ങളിലും ചുവപ്പുജാഗ്രതയാണ്. തുറക്കാതെ വൈദ്യുതോത്പാദനം കൂട്ടി ഈ അണക്കെട്ടുകളിലെ ജലനിരപ്പ് നിയന്ത്രിക്കാനാണ് തീരുമാനം. കനത്ത മഴ പെയ്താല്‍ തീരുമാനം പുനഃപരിശോധിക്കും.

വിതരണവിഭാഗം ഓഫീസര്‍മാരുടെ അവധി കെ.എസ്.ഇ.ബി. റദ്ദാക്കി. ഇനിയൊരു അറിയിപ്പുണ്ടാകുന്നതുവരെ അവര്‍ തുടരണം.


ദുരന്ത സാധ്യതയുള്ള പ്രദേശങ്ങളിലെ ജനങ്ങളെ സുരക്ഷിത സ്ഥാനങ്ങളിലേയ്ക്ക് മാറ്റേണ്ട സാഹചര്യത്തില്‍ റവന്യൂ, തദ്ദേശസ്വയംഭരണം, പോലീസ്, ജലസേചനം, ആര്‍ടിഒ, ഫിഷറീസ്,ജലഗതാഗതം എന്നീ വകുപ്പുകളും കെഎസ്ഇബി, വാട്ടര്‍ അതോറിറ്റി, കെഎസ്ആര്‍ടിസി എന്നിവയും ചേര്‍ന്ന് നടപടി സ്വീകരിക്കണമെന്ന് കളക്ടര്‍ നിര്‍ദേശിച്ചു.



കക്കി ഡാം തുറന്നാല്‍ താഴ്ന്ന പ്രദേശങ്ങളില്‍ നിന്നും ജനങ്ങളെ ആദ്യം മാറ്റുമെന്ന് മന്ത്രി സജി ചെറിയാന്‍ അറിയിച്ചിരുന്നു. പ്രളയത്തിന്റെ സാധ്യതയില്ല. 2018ലും ഡാം തുറന്നപ്പോള്‍ അറിയിപ്പ് നല്‍കിയിരുന്നു. ഇത്തവണയും അതുണ്ടാകും. 2018ന് സമാനമായ സ്ഥിതിയല്ല ഇപ്പോള്‍. പഞ്ചായത്ത് തലത്തില്‍ ജനകീയയോഗങ്ങള്‍ വിളിക്കുമെന്നും മന്ത്രി .