കുഴപ്പമായെന്നാ തോന്നണെ... തിരുവനന്തപുരം കോര്പറേഷന് മേയര് ആര്യാ രാജേന്ദ്രനെതിരെ നടത്തി വന്ന സമരത്തില് നാണംകെട്ട സിപിഎമ്മിന് പിടിവള്ളിയായി കെ. മുരളീധരന്; മുരളീധരന്റെ പരാമര്ശം സത്രീവിരുദ്ധം അറസ്റ്റ് ചെയ്യണമെന്ന് ആനാവൂര്; പന്തം കൊളുത്തി പ്രകടനം നടത്തി പ്രതിഷേധിച്ചു
തിരുവനന്തപുരം കോര്പറേഷനും മേയര് ആര്യ രാജേന്ദ്രനും എതിരായി ബിജെപിയും കോണ്ഗ്രസും സമരം ചെയ്യാന് തുടങ്ങിയിട്ട് നാളുകളേറെയായി. ഒന്ന് പ്രതിരോധിക്കാന് പോലും സിപിഎമ്മിനായില്ല. ഇപ്പോഴിതാ കെ. മുരളീധരന് എംപിയുടെ വായില് നിന്നും വീണ വാക്കുകള് സിപിഎമ്മിന് ജീവന് നല്കിയിരിക്കുകയാണ്. യുവ മേയറെ രക്ഷിക്കാന് കിട്ടിയ അവസരം പന്തം കൊളുത്തി പ്രകടനം നടത്തി അവര് ആരംഭിച്ചു.
മേയര് ആര്യാ രാജേന്ദ്രനെതിരേ അപകീര്ത്തികരമായ പരാമര്ശം നടത്തിയ കെ. മുരളീധരന് എംപിയെ വിമര്ശിച്ച് സിപിഎം തിരുവനന്തപുരം ജില്ലാ സെക്രട്ടറി ആനാവൂര് നാഗപ്പന് തന്നെ രംഗത്തെത്തി. മുരളീധരന്റെ പ്രസ്താവന അങ്ങേയറ്റം സ്ത്രീവിരുദ്ധവും തരംതാണതുമാണ്. മേയറെ അപമാനിച്ച മുരളീധരനെ അറസ്റ്റ് ചെയ്യണമെന്നും ആനാവൂര് ആവശ്യപ്പെട്ടു. ഫെയ്സ്ബുക്ക് കുറിപ്പിലൂടെയാണ് അദ്ദേഹത്തിന്റെ പ്രതികരണം.
കാണാന് നല്ല സൗന്ദര്യമുണ്ട്. പക്ഷെ ആര്യാ രാജേന്ദ്രന്റെ വായില്നിന്ന് പുറത്തുവരുന്നത് കൊടുങ്ങല്ലൂര് ഭരണിപ്പാട്ടിനേക്കാള് ഭയാനകമായ വര്ത്തമാനങ്ങളാണെന്ന മുരളീധരന്റെ പ്രസ്താവനയാണ് വിവാദമായത്.
ഭരണിപ്പാട്ടുകാരിയാണ് മേയറെന്ന പ്രസ്താവന ഏറ്റവും നന്നായി ചേരുന്നത് മുരളീധരന് തന്നെയാണെന്ന് നാടിനറിയാമെന്ന് ആനാവൂര് വിമര്ശിച്ചു. അക്കാര്യം അദ്ദേഹത്തിന്റെ സുഹൃത്തുക്കള് തന്നെ പറഞ്ഞറിഞ്ഞിട്ടുണ്ട്. കെപിസിസി അധ്യക്ഷനായിരുന്ന കാലത്ത് ഇന്ദിരാഭവനില് മുരളീധരന് കാട്ടിക്കൂട്ടിയ ഭരണിപ്പാട്ടിന്റെ പ്രായോഗിക രൂപങ്ങളെ സംബന്ധിച്ച് അദ്ദേഹത്തിന്റെ സഹ എംപിയും കോണ്ഗ്രസ്സ് നേതാവുമായ രാജ്മോഹന് ഉണ്ണിത്താന് തന്നെ മാധ്യമങ്ങളോട് വെളിപ്പെടുത്തിയത് നാട് കണ്ടതാണെന്നും ആനാവൂര് പരിഹസിച്ചു.
മുരളീധരന്റെ രക്തത്തില് അലിഞ്ഞ് ചേര്ന്നതാണ് ഭരണി പാട്ടിന്റെ ഈരടികള്. ഇപ്പോഴും അദ്ദേഹം അത് തുടരുന്നുവെന്നാണ് ഈ പ്രസ്താവനയിലൂടെ മനസിലാകുന്നത്. എന്നാല് മേയര്ക്കെതിരെ ഭരണിപ്പാട്ട് പാടാന് വാ തുറക്കുന്നത് വളരെ കരുതലോടെയാവണം. നഗരത്തിലെ പ്രബുദ്ധരായ ജനങ്ങള് നിശ്ശബ്ദരായി നോക്കിയിരിക്കുമെന്ന് കരുതരുതെന്നും അദ്ദേഹം മുന്നറിയിപ്പ് നല്കി.
മുരളീധരനെ പോലെ ഒരു എംപി ഇത്രയും തരംതാണ പ്രസ്താവനകളുമായി വരുന്നത് അങ്ങേയറ്റം അപലപനീയമാണ്. കോണ്ഗ്രസ്സ് എന്ന പ്രസ്ഥാനത്തിന്റെ പേരിലാണ് മുരളീധരന് ഈ തെമ്മാടിത്തമൊക്കെ വിളമ്പുന്നത്. ഇക്കാര്യത്തില് കെപിസിസി അധ്യക്ഷന്റെ നിലപാട് എന്താണെന്ന് ചോദിക്കാന് കഴിയില്ല, കാരണം അദ്ദേഹത്തെ കുറിച്ച് കേള്ക്കുന്ന വാര്ത്തകള് ഇതിനേക്കാള് മോശമാണ്. ഇത് കോണ്ഗ്രസ്സിന്റെ സംസ്കാരമാണെന്ന് സാധാരണ കോണ്ഗ്രസ്സ് പ്രവര്ത്തകര് മനസിലാക്കുന്നത് നന്നായിരിക്കുമെന്നും അദ്ദേഹം പറഞ്ഞു.
ആര്യാ രാജേന്ദ്രനെതിരെ വിവാദ പരാമര്ശവുമായി കഴിഞ്ഞ ദിവസമാണ് കെ. മുരളീധരന് എം.പി. രംഗത്തെത്തിയത്. കാണാന് നല്ല സൗന്ദര്യമുണ്ട്. പക്ഷെ വായില്നിന്ന് പുറത്തുവരുന്നത് കൊടുങ്ങല്ലൂര് ഭരണിപ്പാട്ടിനേക്കാള് ഭയാനകമായ ചില വര്ത്തമാനങ്ങളാണെന്ന് മുരളീധരന് പറഞ്ഞു.
"
എം.പി. പത്മനാഭനെ പോലുള്ളവര് ഇരുന്ന കസേരയിലാണ് ആര്യാ രാജേന്ദ്രന് ഇരിക്കുന്നത്. അതുകൊണ്ട് അവരോട് ഒരു കാര്യം ഞാന് വിനയപൂര്വം പറയാം. ദയവായി അരക്കള്ളന് മുക്കാല്ക്കള്ളനിലെ കനക സിംഹാസനത്തില് എന്ന പാട്ട് ഞങ്ങളെ കൊണ്ട് പാടിക്കരുത് എന്നു മാത്രമാണ് അവരോടു പറയാനുള്ളത്. കാണാന് നല്ല സൗന്ദര്യമൊക്കെയുണ്ട് ശരിയാ. പക്ഷെ വായില്നിന്ന് വരുന്നത് കൊടുങ്ങല്ലൂര് ഭരണിപ്പാട്ടിനേക്കാള് ഭയാനകമായ ചില വര്ത്തമാനങ്ങളാണ്.
ഇതൊക്കെ ഒറ്റ മഴയത്തു മാത്രം കിളുത്തതാണ്. മഴയുടേത് കഴിയുമ്പോഴേക്കും സംഭവം തീരും. ഇങ്ങനെ ഉള്ള ഒരുപാടു പേരെ കണ്ടിട്ടുള്ള നഗരസഭയാണ് ഇത്. കോര്പറേഷനിലെ കൗണ്സിലര്മാര് സമരം നടത്തുന്നതും അതിനോട് അനുബന്ധിച്ചുള്ള സമരങ്ങളും മുഖ്യമന്ത്രി എന്നും കാണുന്നുണ്ട്. പക്ഷെ അദ്ദേഹം ഒരു വാക്കു പറയാന് ഇതുവരെ തയ്യാറായിട്ടില്ല എന്നും മുരളീധരന് വ്യക്തമാക്കി. മുരളീധരന്റെ പ്രസ്താവന വലിയ വിവാദമായി.
https://www.facebook.com/Malayalivartha
