കേരളത്തിലെ വികസന പദ്ധതികള്ക്ക് കേന്ദ്ര മന്ത്രി നിതിന് ഗഡ്കരിയുടെ പൂര്ണ പിന്തുണ; നിതിന് ഗഡ്കരിയുമായി നടത്തിയ കൂടിക്കാഴ്ചയ്ക്ക് ശേഷം വെളിപ്പെടുത്തലുമായി മന്ത്രി മുഹമ്മദ് റിയാസ്
കേരളത്തിലെ വികസന പദ്ധതികള്ക്ക് കേന്ദ്ര മന്ത്രി നിതിന് ഗഡ്കരി പൂര്ണ പിന്തുണ നല്കിയെന്ന് വ്യക്തമാക്കിക്കൊണ്ട് രംഗത്ത് എത്തിയിരിക്കുകയാണ് മന്ത്രി മുഹമ്മദ് റിയാസ്. നിതിന് ഗഡ്കരിയുമായി നടത്തിയ കൂടിക്കാഴ്ചയ്ക്ക് ശേഷം മാധ്യമങ്ങളോട് പ്രതികരിക്കവെയായിരുന്നു അദ്ദേഹം ഇത് വ്യക്തമാക്കിയത്.
അതോടൊപ്പം തന്നെ ദേശീയ പാതയിലെ അറ്റകുറ്റ പണികള് നടത്താന് അടിയന്തര ഇടപെടല് നടത്തുമെന്ന് കൂടിക്കാഴ്ചയില് കേന്ദ്ര മന്ത്രി ഉറപ്പ് നല്കിയിട്ടുണ്ടെന്നും അദ്ദേഹം ചൂണ്ടിക്കാട്ടി. ആറുവരിയായി പാത വികസിപ്പിക്കാന് കേരളത്തിലെ ദേശീയ പാതയുടെ സ്ഥലം നേരത്തെ ദേശീയപാത അതോറിറ്റിക്ക് വിട്ട് നല്കിയിരുന്നു. ഇതേ തുടര്ന്ന് ദേശീയപാതയിലെ അറ്റകുറ്റ പണികള് നടത്താന് പൊതുമരാമത്ത് വകുപ്പിന് സാധിച്ചിരുന്നില്ല.
കൂടാതെ ഉള്നാടന് ജലഗതാഗതം ഉള്പ്പടെ കേരളത്തിന്റെ ടൂറിസം സാധ്യതകളെ കുറിച്ചും കൂടിക്കാഴ്ചയില് ചര്ച്ച ചെയ്തു എന്ന് മന്ത്രി മുഹമ്മദ് റിയാസ് കൂട്ടിച്ചേര്ത്തു. വി ശിവദാസന് എംപി, എംവി ശ്രേയാംസ് കുമാര് എംപി എന്നിവരും മന്ത്രിക്കൊപ്പം കൂടിക്കാഴ്ചയില് പങ്കെടുത്തിരുന്നു.
https://www.facebook.com/Malayalivartha
