ഒരു വര്‍ഷത്തെ ജയില്‍ വാസത്തിനുശേഷം ജാമ്യം കിട്ടി ബിനീഷ് കോടിയേരി വീട്ടിലെത്തിയപ്പോള്‍ നടുക്കുന്ന ഓര്‍മ്മകളാണ് ബാക്കിയായിരുന്നത്. കഴിഞ്ഞ വര്‍ഷം ഇതേസമയത്ത് മരുതംകുഴിയിലെ ഈ വീടും പരിസരവും വലിയ വിവാദത്തിലായിരുന്നു. ഈ വീട്ടിലാണ് ഇഡി റെയ്ഡ് നടത്തിയത്. ബിനീഷിന്റെ ഭാര്യയും അമ്മായിയമ്മയും ഇഡിയെ വെട്ടിലാക്കിയതും കണ്ടതാണ്. അതേ വീട്ടില്‍ തന്നെ ഒരു വര്‍ഷത്തിന് ശേഷം സന്തോഷം അലയടിച്ചു.

ബിനീഷിനെ പിതാവും സി.പി.എം പോളിറ്റ് ബ്യൂറോ അംഗവുമായ കോടിയേരി ബാലകൃഷ്ണന്‍ ആശ്വാസത്തോടെ ആശ്ലേഷിച്ചു, മാതാവ് വിനോദിനി നിയന്ത്രണം വിട്ട് പൊട്ടിക്കരഞ്ഞു. ബംഗളൂരു പരപ്പന അഗ്രഹാര ജയിലില്‍ നിന്ന് ശനിയാഴ്ച രാത്രി എട്ടോടെ മോചിതനായ ബിനീഷ് ഇന്നലെ രാവിലെ 10.30നാണ് തലസ്ഥാനത്ത് എത്തിയത്. സഹോദരന്‍ ബിനോയ് കോടിയേരിയും ഒപ്പമുണ്ടായിരുന്നു. വിമാനത്താവളത്തില്‍ സുഹൃത്തുക്കള്‍ പുഷ്പഹാരങ്ങള്‍ അണിയിച്ചാണ് സ്വീകരിച്ചത്.

മരുതംകുഴിയിലെ വീട്ടില്‍ കോടിയേരി ബാലകൃഷ്ണന്‍ ഉള്‍പ്പെടെ കാത്തിരിക്കുകയായിരുന്നു. പതിനൊന്നോടെ ചുവന്ന ഇന്നോവ കാറില്‍ ബീനിഷ് എത്തി. കുശലാന്വേഷണങ്ങള്‍ക്കുശേഷം വീട്ടുകാര്‍ക്കൊപ്പം ഭക്ഷണം കഴിച്ചു. ലഹരി മരുന്ന് കേസിലെ കള്ളപ്പണ ബിനാമി ഇടപാടില്‍ കര്‍ണാടക ഹൈക്കോടതി കഴിഞ്ഞ ദിവസം ജാമ്യം അനുവദിച്ചതിനെ തുടര്‍ന്നാണ് ബിനിഷ് ജയില്‍ മോചിതനായത്.

'ഒരുപാട് കാര്യങ്ങള്‍ പറയാനുണ്ട്'തനിക്ക് ഒരുപാട് കാര്യങ്ങള്‍ പറയാനുണ്ടെന്നും പറയാനുള്ളതെല്ലാം കൃത്യമായി പറയുമെന്നും വിമാനത്താവളത്തില്‍വച്ച് ബിനീഷ് കോടിയേരി മാദ്ധ്യമങ്ങളോട് പറഞ്ഞു. ഭീഷണിയ്ക്ക് വഴങ്ങിക്കൊടുക്കാത്തതിന്റെ പേരിലുണ്ടായ കേസാണിത്. സത്യത്തെ കള്ളമാക്കാന്‍ പറ്റും. പക്ഷേ, കാലം എന്നൊന്ന് ഉണ്ടല്ലോ. അത് സത്യത്തോട് ചേര്‍ന്നു നില്ക്കും. നീതി പുലര്‍ത്തുകയും ചെയ്യും. ഇപ്പോള്‍ നന്ദി പറയാനുള്ളത് കോടതിയോടാണ്. വൈകിയാണെങ്കിലും തനിക്ക് നീതി കിട്ടി. പിന്തുണച്ചവര്‍ക്കെല്ലാം നന്ദിയെന്നും ബിനീഷ് പറഞ്ഞു.

ഒരു കൊല്ലത്തിന് ശേഷം മകനെ കണ്ടതിന്റെ ആശ്വാസമുണ്ടെന്ന് കോടിയേരി ബാലകൃഷ്ണന്‍ പ്രതികരിച്ചു. 'കേസ് കോടതിയിലായതിനാല്‍ പ്രതികരിക്കുന്നില്ല. ജാമ്യം ലഭിച്ചതില്‍ സന്തോഷം'കോടിയേരി മാദ്ധ്യമങ്ങളോട് പറഞ്ഞു.

ബിനീഷ് കോടിയേരിക്ക് ജാമ്യം ലഭിച്ച സാഹചര്യത്തില്‍ സി പി എം സംസ്ഥാന സെക്രട്ടറി സ്ഥാനത്തേക്ക് കോടിയേരി ബാലകൃഷ്ണന്‍ തിരിച്ചെത്തുമെന്ന രീതിയിലുള്ള റിപ്പോര്‍ട്ടുകള്‍ കഴിഞ്ഞ ദിവസം പുറത്തുവന്നിരുന്നു. ഈ റിപ്പോര്‍ട്ടുകളോടും കോടിയേരി പ്രതികരിച്ചു.

സി പി എം സംസ്ഥാന സെക്രട്ടറി സ്ഥാനം തിരിച്ചുനല്‍കണമോ എന്ന് തീരുമാനിക്കേണ്ടത് പാര്‍ട്ടിയാണ്. ധൃതിപിടിക്കേണ്ട വിഷയമല്ല ഇതെന്നും ആലോചിച്ച് തീരുമാനമെടുക്കുമെന്നും കോടിയേരി പ്രതികരിച്ചു.
ചികിത്സയ്ക്ക് വേണ്ടിയാണ് കോടിയേരി സെക്രട്ടറി സ്ഥാനമൊഴിയുന്നതെന്നായിരുന്നു പാര്‍ട്ടി അറിയിച്ചത്. എന്നാല്‍ കള്ളപ്പണക്കേസില്‍ മകന്‍ ബംഗളൂരുവില്‍ അറസ്റ്റിലായതുമായി ബന്ധപ്പെട്ടാണ് നടപടിയെന്ന് റിപ്പോര്‍ട്ടുകള്‍ ഉണ്ടായിരുന്നു.

ബിനീഷിന്റെ മോചനം കുടുംബത്തിന് വല്ലാത്ത ആശ്വാസമാണ് നല്‍കിയത്. ബിനീഷ് ജയിലിലായത് കാരണം വലിയ നഷ്ടമാണ് ഉണ്ടായത്. കോടിയേരി സെക്രട്ടറി സ്ഥാനത്തേയ്ക്ക് ഉടന്‍ തിരിച്ചെത്തുമെന്നാണ് സൂചന. ബിനീഷ് കോടിയേരിയാകട്ടെ പത്രസമ്മേളനം നടത്തി ഇഡിയെ പ്രതിരോധത്തിലാക്കും. ഇഡിയും നാര്‍ക്കോട്ടിക് സെല്ലും ബിനീഷിനെ ജാമ്യം റദ്ദാക്കാനുള്ള ശ്രമത്തിലുമാണ്.