ചാവക്കാട് ബൈക്കിലെത്തിയ മൂന്നംഗസംഘം പട്ടാപ്പകല്‍ യുവാവിനെ കുത്തിക്കൊലപ്പെടുത്തി. മണത്തല ചാപ്പറമ്പ് നാഗയക്ഷി ക്ഷേത്രത്തിന് പിന്നില്‍ കൊപ്ര ചന്ദ്രന്റെ മകന്‍ ബിജുവാണ് (35) കുത്തേറ്റ് മരിച്ചത്.

ഇന്നലെ വൈകിട്ട് അഞ്ചോടെ ചാപ്പറമ്പ് സ്‌കൂളിന് കിഴക്കുഭാഗത്തെ റോഡിലായിരുന്നു സംഭവം നടന്നത്. വയറ്റില്‍ ആഴത്തില്‍ കുത്തേറ്റ ബിജുവിനെ നാട്ടുകാര്‍ ചാവക്കാട് ഹയാത്ത് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

പ്രവാസിയായ ബിജു മൂന്ന് മാസം മുമ്പാണ് നാട്ടിലെത്തിയത്. മറ്റൊരു ജോലിക്കായി വീണ്ടും വിദേശത്ത് പോകാന്‍ ശ്രമിക്കുന്നതിനിടെയായിരുന്നു സംഭവം. ആളുമാറിയാണ് ആക്രമണം നടന്നതെന്നാണ് പൊലീസിന്റെ പ്രാഥമിക നിഗമനം.

കൊലപാതകത്തിന് ശേഷം അക്രമികള്‍ ബ്ലാങ്ങാട് ബീച്ച് ഭാഗത്തേക്ക് വണ്ടിയോടിച്ച് പോയതായാണ് സൂചനകള്‍ . സംഭവം നടക്കുമ്പോള്‍ തൊട്ടടുത്ത മൈതാനത്ത് കുട്ടികള്‍ കളിക്കുന്നുണ്ടായിരുന്നു. വീട്ടില്‍ വളര്‍ത്തുന്ന പ്രാവുകളെ ബിജു ചാപ്പറമ്പ് സെന്ററില്‍ കൊണ്ടുവന്ന് വില്പന നടത്തിയിരുന്നു.

അതേസമയം മരിച്ച ബിജുവുമായി രൂപസാദൃശ്യമുള്ള ചാപ്പറമ്പ് ഓട്ടോ സ്റ്റാന്‍ഡിലെ ഡ്രൈവര്‍ സജീവനുമായി ഒരു സംഘം വൈകിട്ട് മൂന്നോടെ തര്‍ക്കമുണ്ടാക്കിയിരുന്നു. ഇവരാകാം ആക്രമണത്തിന് പിന്നിലെന്നാണ് പൊലീസ് നിഗമനം.