എന്റെ പ്രിയപ്പെട്ട ശ്രീ കാപ്പാടൻ രമേശൻ നമ്മളിൽ നിന്ന് വിടപറഞ്ഞിട്ട് ഇന്നേക്ക് ഒരു വർഷം തികയുകയാണ്. കാപ്പാടൻ രമേശന്റെ ആകസ്മിക വേർപാട് എന്നിലുണ്ടാക്കിയ ആഘാതത്തിൽനിന്ന് ഞാനിന്നും മുക്തനായിട്ടില്ല അത്രത്തോളം അടുപ്പമുണ്ട് താനും രമേശനും തമ്മിലെന്ന് കെ സുധാകരൻ.

ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ; എന്റെ പ്രിയപ്പെട്ട ശ്രീ കാപ്പാടൻ രമേശൻ നമ്മളിൽ നിന്ന് വിടപറഞ്ഞിട്ട് ഇന്നേക്ക് ഒരു വർഷം തികയുകയാണ്. കാപ്പാടൻ രമേശന്റെ ആകസ്മിക വേർപാട് എന്നിലുണ്ടാക്കിയ ആഘാതത്തിൽനിന്ന് ഞാനിന്നും മുക്തനായിട്ടില്ല അത്രത്തോളം അടുപ്പമുണ്ട് ഞാനും രമേശനും തമ്മിൽ.

നാൽപത് വർഷത്തെ സുദീർഘമായ സൗഹൃദം. മരണത്തെ മുഖാമുഖം കണ്ട ഒരു രാഷ്ട്രീയ കാലഘട്ടമുണ്ടായിരുന്നു എനിക്ക്. വീട്ടിൽ നിന്നിറങ്ങിയാൽ തിരിച്ചുവരുമെന്ന പ്രതീക്ഷ പോലും ഇല്ലാത്ത ഒരു കാലഘട്ടം ആ കാലത്ത് ഒരു നിഴൽപോലെ , ഒരു സംരക്ഷകനായി, സഹപ്രവർത്തകനായി, കൈകാര്യകർത്താവായി എന്നോടൊപ്പം ഉണ്ടായിരുന്ന എന്റെ പ്രിയപ്പെട്ട സഹോദരനായിരുന്നു കാപ്പാടൻ.

കാപ്പാടന്റെ വേർപാട് എന്നെപ്പോലെ തന്നെ കോൺഗ്രസ്‌ പ്രസ്ഥാനത്തിനും എന്നും ഒരു തീരാ നഷ്ടമാണ്. ജില്ലക്കകത്തുനിന്നും, പുറത്തുനിന്നുമുള്ള സാധാരണ പ്രവർത്തകർക്ക് വേണ്ടിയുള്ള നിസ്വാർത്ഥ സേവനമായിരുന്നു. കാപ്പാടന്റെത് . സാധാരണ കോൺഗ്രസ് പ്രവർത്തകരുടെ പ്രശ്നങ്ങളും , ദുഃഖങ്ങളും പരിഹരിക്കുവാൻ രാത്രിയെന്നോ, പകലന്നോ ഇല്ലാതെ എന്റെയൊപ്പം നടക്കുമ്പോൾ സ്വന്തം പ്രശ്നങ്ങളും ദുഃഖങ്ങളും ഒരിക്കൽപോലും കാപ്പാടൻ പുറത്ത് കാണിച്ചിരുന്നില്ല.

കാപ്പാടൻ എന്നെ വിട്ടുപോയെന്ന് ഇന്നും ഞാൻ വിശ്വസിക്കുന്നില്ല . അങ്ങനെ വിശ്വസിക്കുവാൻ എന്റെ മനസ്സിന് ഒരിക്കലും കഴിയുകയുമില്ല. അദൃശ്യനായി എന്റെ നിഴലായി രമേശൻ എന്നും എന്നോടൊപ്പം തന്നെ ഉണ്ട് എന്ന് വിശ്വസിക്കുവാനാണ് എനിക്കിഷ്ടം.

അദ്ദേഹത്തിന്റെ ജ്വലിക്കുന്ന ഓർമ്മകൾ എന്നും നമ്മുടെ പ്രസ്ഥാനത്തിന് കരുത്തേകും. നിസ്വാർത്ഥമായ അദ്ദേഹത്തിന്റെ പൊതുപ്രവർത്തനം ഈ നാട്ടിലെ പൊതുപ്രവർത്തകർക്ക് എന്നും മാതൃകയാണ്. പ്രിയ കാപ്പാടൻ രമേശന്റെ ദീപ്തമായ ഓർമ്മകൾക്ക് മുന്നിൽ ആദരാഞ്ജലികൾ അർപ്പിച്ച് കൊണ്ട് ഒരു പിടി കണ്ണീർ പൂക്കൾ...