കുറച്ച് ദിവസങ്ങള്‍ക്ക് ശേഷം സോഷ്യല്‍ മീഡിയയ്ക്ക് നല്ലൊരു വിഷയം കിട്ടി, ജോജു ജോര്‍ജ് കോണ്‍ഗ്രസിനെ ഒതുക്കിയ കഥയാണ്. സോഷ്യല്‍ മീഡിയയില്‍ പല തരത്തിലുള്ള പ്രചാരണമാണ് നടക്കുന്നത്. അതിലൊന്നാണ് ഇന്റര്‍വ്യൂ നല്‍കുന്ന കോണ്‍ഗ്രസിലെ ചേച്ചിയോട് കോണ്‍ഗ്രസുകാരന്‍ വന്ന് ജോജോ കയറിപ്പിടിച്ചെന്ന് പറയ്... എന്ന് പറയുന്ന വീഡിയോ ക്യാപ്ഷനോടെ പ്രചരിക്കുന്നത്.

ഇന്ധനവില വര്‍ദ്ധനവില്‍ പ്രതിഷേധിച്ച് കൊച്ചിയില്‍ കോണ്‍ഗ്രസ് നടത്തിയ റോഡ് ഉപരോധത്തിനെതിരെ പ്രതിഷേധിച്ച നടന്‍ ജോജു ജോര്‍ജിനെ അനൂകൂലിച്ചും പ്രതികൂലിച്ചും സോഷ്യന്‍ മീഡിയയില്‍ ചര്‍ച്ചകള്‍ അരങ്ങേറുന്നതിനിടെ ഷാഫി പറമ്പില്‍ എം.എല്‍.എയ്ക്ക് പാരയായി പഴയ ഫേസ്ബുക്ക് പോസ്റ്റ്. സിപിഎം നേതാക്കളോട് വഴിതടയല്‍ സമരത്തിനെതിരെ ഇരുചക്ര വാഹനത്തിലെത്തിയ യുവതി പ്രതികരിച്ച സംഭവത്തില്‍ അദ്ദേഹം നടത്തിയ പ്രതികരണമാണ് വീണ്ടും ചര്‍ച്ചയായിരിക്കുന്നത്. അന്ന് ഇത്തരം സമരരീതികളെ വിമര്‍ശിച്ച് രംഗത്തെത്തിയ ഷാഫി യുവതിയെ പിന്തുണച്ചിരുന്നു.

ഇപ്പോഴത്തെ യൂത്ത് കോണ്‍ഗ്രസ് സംസ്ഥാന അദ്ധ്യക്ഷനും എം.എല്‍.എയുമായ ഷാഫി പറമ്പില്‍ 2013 ഡിസംബര്‍ 14നാണ് ഫേസ്ബുക്കില്‍ യുവതിയെ പിന്തുണച്ച് പോസ്റ്റിട്ടത്. പൊതു ജനങ്ങളെ വഴി തടഞ്ഞ സമരത്തെ ചങ്കൂറ്റത്തോടെ എതിര്‍ത്ത ഈ സഹോദരിക്ക് അഭിനന്ദനങ്ങള്‍, ആശംസകള്‍ എന്നും അദ്ദേഹം ഫേസ്ബുക്കില്‍ കുറിച്ചിരുന്നു.

ഈ ഫേസ്ബുക്ക് പോസ്റ്റ് ചൂണ്ടിക്കാട്ടി ഷാഫിയെ വിമര്‍ശിച്ചും പരിഹസിച്ചും നിരവധി പോസ്റ്റുകളും ട്രോളുകളുമാണ് സോഷ്യല്‍ മീഡിയയില്‍ പ്രചരിക്കുന്നത്. 'ജോജുവിന് അഭിനന്ദനങ്ങള്‍ ഇല്ലേ മിസ്റ്റര്‍ ഷാഫി? അതോ നട്ടെല്ലിന്റെ ഭാഗത്ത് വാഴപ്പിണ്ടിയോ?', തുടങ്ങി നിരവധി പ്രതികരണങ്ങളാണ് സോഷ്യല്‍ മീഡിയയില്‍ വന്നു കൊണ്ടിരിക്കുന്നത്. സഞ്ചാര സ്വാതന്ത്യം തടസപ്പെടുത്തിക്കൊണ്ട് കോണ്‍ഗ്രസ് നടത്തിയ സമരത്തിനെതിരെ പ്രതികരിച്ച ജോജുവിന്റെ വാഹനത്തിന്റെ ചില്ല് തകര്‍ത്തിരുന്നു.

ഇന്ധനവില വര്‍ദ്ധനവില്‍ പ്രതിഷേധിച്ച് കൊച്ചിയില്‍ കോണ്‍ഗ്രസ് നടത്തിയ റോഡ് ഉപരോധത്തിനെതിരെ പ്രതിഷേധിച്ച നടന്‍ ജോജു ജോര്‍ജ് മദ്യപിച്ചെന്ന കോണ്‍ഗ്രസ് പ്രവര്‍ത്തകരുടെ ആരോപണത്തെ പരിഹസിച്ച് പി.വി. അന്‍വര്‍ എം.എല്‍.എ.യും രംഗത്തെത്തി. ഉന്നത പൊലീസ് ഉദ്യോഗസ്ഥന്റെ സാന്നിദ്ധ്യത്തില്‍ പരസ്യമായി മദ്യപിക്കുന്ന ജോജു ജോര്‍ജിന്റെ രഹസ്യ ദൃശ്യങ്ങള്‍ സൈബര്‍ കോണ്‍ഗ്രസ് പുറത്തുവിട്ടു. പഴയ കോണ്‍ഗ്രസില്‍ നിന്ന് ഇന്നത്തെ കോണ്‍ഗ്രസ് ഒരല്‍പ്പം പോലും മാറിയിട്ടില്ല. അത് ഇനി യൂത്തനായാലും ശരി... മൂത്തനായാലും ശരി എന്നും അന്‍വര്‍ ഫേസ്ബുക്കില്‍ കുറിച്ചു.

കോണ്‍ഗ്രസ് പ്രവര്‍ത്തകരുടെ ആരോപണം തെറ്റാണെന്നും ജോജു മദ്യപിച്ചിരുന്നില്ലെന്നും പൊലീസ് പറഞ്ഞിരുന്നു. വൈദ്യ പരിശോധനയിലാണ് ഇക്കാര്യം വ്യക്തമായത്. വഴിതടഞ്ഞതിനും ജോജുവിന്റെ വാഹനം ആക്രമിച്ചതിനും കോണ്‍ഗ്രസ് പ്രവര്‍ത്തകര്‍ക്കെതിരെ പൊലീസ് കേസെടുത്തിട്ടുണ്ട്.

സമരത്തിനിടയിലേക്ക് ജോജു ഗുണ്ടയെപ്പോലെ ആക്രോശിച്ചെത്തി പ്രശ്‌നമുണ്ടാക്കിയതായി എറണാകുളം ഡി.സി.സി പ്രസിഡന്റ് മുഹമ്മദ് ഷിയാസ് പറഞ്ഞു. മഹിളാ കോണ്‍ഗ്രസ് പ്രവര്‍ത്തകരെ അധിക്ഷേപിച്ചു, കൈയേറ്റം ചെയ്തു. ജോജുവിന്റെ വാഹനത്തില്‍ മദ്യക്കുപ്പികള്‍ ഉണ്ടായിരുന്നു. പരാതിയില്‍ ഉറച്ച് നില്‍ക്കും. മദ്യപിച്ചിട്ടില്ലെങ്കില്‍ മറ്റെന്തെങ്കിലും ലഹരി ഉപയോഗിച്ചിരുന്നോ എന്ന് സംശയമുണ്ട് എന്നും മുഹമ്മദ് ഷിയാസ് പറയുന്നു.