നടന്‍ ജോജു ജോര്‍ജ് കോണ്‍ഗ്രസിന്റെ വഴിതടയല്‍ സമരത്തിനെതിരെ പ്രതികരിച്ചത് വലിയ വാര്‍ത്തയി. ഇതിന് പിന്നാലെ പണ്ട് വഴിതടയല്‍ സമരത്തിനെതിരെ പ്രതികരിച്ച വീട്ടമ്മയ്ക്ക് 5 ലക്ഷം രൂപ നല്‍കിയ പ്രമുഖ വ്യവസായി കൊച്ചൗസേപ്പ് ചിറ്റിലപ്പള്ളിയുടെ നടപടി വീണ്ടും ചര്‍ച്ചയാകുന്നു.

2013ല്‍ സോളാര്‍ കേസില്‍ മുഖ്യമന്ത്രി ഉമ്മന്‍ചാണ്ടിയുടെ രാജി ആവശ്യപ്പെട്ട് ഇടതുപക്ഷം നടത്തുന്ന കഌഫ് ഹൗസ് ഉപരോധത്തിനെതിരെ പ്രതികരിച്ച് ഹീറോയായി മാറിയ വീട്ടമ്മയായ സന്ധ്യയ്ക്ക് കൊച്ചൗസേപ്പ് ചിറ്റിലപ്പള്ളി അഞ്ചു ലക്ഷം രൂപ പാരിതോഷികം നല്‍കി. പ്രതികരിക്കാന്‍ കാണിച്ച ധൈര്യത്തിനും ധീരതയ്ക്കുമാണ് സന്ധ്യയ്ക്ക് പാരിതോഷികം നല്‍കുന്നതെന്ന് ചിറ്റിലപ്പള്ളി പറഞ്ഞു.

ചിറ്റിലപ്പള്ളിയെ പോലൊരാള്‍ തനിക്ക് പാരിതോഷികം പ്രഖ്യാപിച്ചതില്‍ സന്തോഷമുണ്ടെന്ന് സന്ധ്യയും പ്രതികരിച്ചു. ജനങ്ങളുടെ സഞ്ചാരസ്വാതന്ത്ര്യം തടസപ്പെടുത്തുന്ന ഒരു സമരത്തോടും അത് ഏത് രാഷ്ട്രീയ പാര്‍ട്ടി നടത്തിയാലും അതിനോട് യോജിക്കാനാവില്ലെന്ന് സന്ധ്യ പറഞ്ഞു. ഇത്തരം സമരങ്ങള്‍ക്കെതിരെ കൂടുതല്‍ പേര്‍ രംഗത്തു വരാന്‍ പ്രചോദനം നല്‍കുന്നതാണെന്നും തന്റെ നിലപാടെന്നും അവര്‍ പറഞ്ഞു.

അന്ന് കിട്ടിയ അടിക്ക് സഖാക്കള്‍ ഇപ്പോള്‍ പകരം വീട്ടുകയാണ്. പ്രതികരിച്ച ജോജോ ജോര്‍ജിനും ചിറ്റിലപ്പള്ളി 5 ലക്ഷം രൂപ നല്‍കണമെന്നാണ് സോഷ്യല്‍ മീഡിയ പറയുന്നത്.

ഇന്ധന വിലവര്‍ധനവിനെതിരെ കോണ്‍ഗ്രസ് നടത്തിയ പ്രതിഷേധത്തിനിടെ നടന്‍ ജോജു ജോര്‍ജിന്റെ വാഹനം തല്ലിത്തകര്‍ത്ത കേസില്‍ മുന്‍ കൊച്ചി മേയര്‍ ടോണി ചമ്മണിക്കെതിരെ എഫ്‌ഐആര്‍ ഇട്ടു. ജോജുവിന്റെ വാഹനത്തിന് 6 ലക്ഷം രൂപയുടെ നഷ്ടമുണ്ടായെന്നാണു വിവരം. വാഹനം തകര്‍ത്തവരെ ഉടന്‍ പിടികൂടുമെന്ന് പൊലീസ് വ്യക്തമാക്കി.

സംഭവത്തില്‍ കോണ്‍ഗ്രസ് നേതാക്കള്‍ക്കെതിരെ ജാമ്യമില്ലാ കുറ്റങ്ങളാണു ചുമത്തിയിട്ടുള്ളത്. ടോണി ചമ്മണിയുടെ നേതൃത്വത്തിലുള്ള ഏഴംഗ സംഘമാണ് ജോജുവിന്റെ വാഹനം ആക്രമിച്ചതെന്നാണു എഫ്‌ഐആറിലുള്ളത്. വാഹനം തടഞ്ഞ്, ജോജുവിന്റെ ഷര്‍ട്ടിന് കുത്തിപ്പിടിച്ച് അസഭ്യം പറഞ്ഞു. വാഹനത്തിന്റെ ചില്ല് കല്ലുകൊണ്ട് ഇടിച്ചു തകര്‍ത്തതായും എഫ്‌ഐആറിലുണ്ട്.

നടന്റെ പരാതിയില്‍ മരട് പൊലീസാണ് കേസെടുത്തത്. കോണ്‍ഗ്രസിന്റെ വഴിതടയല്‍ സമരം ചോദ്യം ചെയ്തതിന് പിന്നാലെയാണ് ജോജുവിന്റെ വാഹനത്തിന് നേരെ ആക്രമണമുണ്ടായത്. വൈറ്റിലയിലായിരുന്നു തിങ്കളാഴ്ച രാവിലെ കോണ്‍ഗ്രസ് നേതാക്കളുടെ നേതൃത്വത്തില്‍ സമരം. റോഡില്‍ വന്‍ ഗതാഗതക്കുരുക്കുണ്ടായതു ചോദ്യം ചെയ്താണ് ജോജു അടക്കമുള്ള യാത്രക്കാര്‍ രംഗത്തെത്തിയത്.

ഗതാഗതക്കുരുക്കില്‍ കുടുങ്ങിയ കാന്‍സര്‍ രോഗിയുടെ അഭ്യര്‍ഥന കേട്ടാണ് നടന്‍ ജോജു ജോര്‍ജ് സമരത്തിലേക്ക് ഇറങ്ങിയതെന്ന് വാഹനത്തില്‍ ഒപ്പമുണ്ടായിരുന്ന സംവിധായകന്‍ എ.കെ.സാജന്‍ പറഞ്ഞു.

ഒരു മണിക്കൂറോളം ജോജു വാഹനത്തില്‍തന്നെ ഇരുന്നു. വലിയ വണ്ടിയാണ്. എസിയൊക്കെ ഇട്ട് നന്നായി ഇരിക്കാം. തൊട്ടടുത്തു കിടന്ന ഓട്ടോയില്‍ ഒരു അമ്മ ഉണ്ടായിരുന്നു. അവര്‍ കാന്‍സര്‍ രോഗിയാണ് കീമോ എടുക്കാന്‍ പോവുകയാണെന്ന് ജോജുവിനോട് പറഞ്ഞു. ഇന്നാണ് ഡേറ്റ് കിട്ടിയത്. സമയത്തു ചെന്നില്ലെങ്കില്‍ അടുത്ത ഡേറ്റ് പത്തോ പതിനഞ്ചോ ദിവസം കഴിഞ്ഞാകും ഇനി കിട്ടുക എന്നും പറഞ്ഞു. സാറ് പറഞ്ഞാല്‍ അവര്‍ കേട്ടാലോ, ഒന്ന് പറയുമോ എന്ന് ആ അമ്മ അഭ്യര്‍ഥിച്ചു.

ഇതോടെയാണ് ജോജു വാഹനത്തില്‍നിന്ന് ഇറങ്ങി സമരക്കാരോടു സംസാരിക്കാന്‍ പോയത്. പക്ഷേ, പ്രവര്‍ത്തകരുടെ പ്രതികരണം മറിച്ചായിരുന്നു. കോണ്‍ഗ്രസ് നേതാക്കളുടെ ഉള്‍പ്പെടെയുള്ള പ്രതികരണം ഞെട്ടിച്ചു. മുന്‍ എംഎല്‍എ അടക്കം ജോജുവിന്റെ വാഹനത്തിന്റെ ബോണറ്റില്‍ അടിച്ചു. കോണ്‍ഗ്രസിന്റെ സംസ്‌കാരത്തിനു ചേര്‍ന്നതല്ല ഇതെന്നും സാജന്‍ പറഞ്ഞു.