ഏഷ്യാനെറ്റ് ചെയ്തത് മാധ്യമ ധര്മ്മമോ? ഏഷ്യാനെറ്റിന്റെ വഴി മറ്റുള്ളവരും പിന്തുടര്ന്നാല് മിമിക്രിക്കാരുടെ നാട്ടില് ആര്ക്ക് ആരെ വിശ്വസിക്കാനാവും
മലയാളത്തിലെ ദൃശ്യവാര്ത്താ മാധ്യമ രംഗത്ത് വളരെയേറെ വെല്ലുവിളികള് കൊണ്ടുവന്ന ചാനലാണ് ഏഷ്യാനെറ്റ്. കേരളത്തിലെ ഏറ്റവും പഴക്കമുള്ള സ്വകാര്യ ചാനല് എന്ന ഖ്യാതിയും ഏഷ്യാനെറ്റിനുണ്ട്. നാടിന്റെ നന്മയാക്കായി ഏഷ്യാനെറ്റ് കൊണ്ടു വന്ന പല ബ്രേക്കിംഗ് ന്യൂസുകളും നമ്മള് ഇരു കൈയ്യും നീട്ടി സ്വീകരിച്ചിരുന്നു. വാര്ത്താ ചാനലുകളുടെ ബ്രേക്കിംഗ് ന്യൂസുകള്ക്കിടയില് അന്വേഷണാത്മക പത്രപ്രവര്ത്തനം ഏറെ കൈയ്യടി നേടി. എങ്ങനേയും വാര്ത്തകള് സൃഷ്ടിക്കാനുള്ള ആവേശമായിരുന്നു പിന്നീട് കേരളത്തില്. പോലീസിന് കണ്ടു പിടിക്കാന് കഴിയാതിരുന്ന പല പിടികിട്ടാപ്പുള്ളികളേയും കണ്ടെത്താന് ചാനലിലെ വീരന്മാരായ റിപ്പോര്ട്ടര്മാര്ക്ക് കഴിഞ്ഞു. ഇടയ്ക്കൊക്കെ ചില വിമര്ശനങ്ങള് ഉയര്ന്നെങ്കിലും ലക്ഷ്യം നന്നായതിനാല് ആരും മാര്ഗം നോക്കിയില്ല.
സരിതാ വിഷയം ജനമധ്യത്തില് എത്തിക്കുന്നതില് മാധ്യമങ്ങള് പ്രത്യേകിച്ചും ഏഷ്യാനെറ്റ് വഹിച്ച പങ്ക് ചെറുതല്ല. എന്നാല് സോളാര് വിവാദം കൊടുമ്പിരി കൊണ്ടിരിക്കുന്ന സമയത്താണ് കഴിഞ്ഞ ദിവസം ഏഷ്യാനെറ്റ് വിവാദമായ ആ ടെലഫോണ് ഇന്റര്വ്യൂ നടത്തിയത്. മന്ത്രി എപി അനില് കുമാറിനെ ആര്യാടന് മുഹമ്മദിന്റെ പ്രൈവറ്റ് സെക്രട്ടറി എന്നു പറഞ്ഞാണ് ചാനല് റിപ്പോര്ട്ടര് വിളിച്ചത്. തെറ്റിദ്ധരിച്ച മന്ത്രി ചിലത് തുറന്നു പറയുകയും ചെയ്തു.
(3).jpg)
മാധ്യമ പ്രവര്ത്തകരെ എന്നും ബഹുമാനിക്കുന്ന മുഖ്യമന്ത്രി ഉമ്മന് ചാണ്ടിതന്നെ രംഗത്തെത്തിയിരിക്കുകയാണ്. ഏഷ്യാനെറ്റ് ന്യൂസ് ചാനലിനെതിരെ നിയമനടപടി സ്വീകരിക്കുമെന്ന് ഉമ്മന് ചാണ്ടി പറഞ്ഞു. പേഴ്സണല് സ്റ്റാഫെന്ന വ്യാജേന മന്ത്രി അനില് കുമാറിനെ ഫോണില് വിളിച്ചത് മാധ്യമസ്വാതന്ത്ര്യത്തിന്റെ പരിധിയില് വരുന്നതാണോയെന്ന് മുഖ്യമന്ത്രി ചോദിച്ചു.
സരിതയുടെ മൊഴിയില് വെള്ളം ചേര്ക്കാന് ഉന്നതന്മാര് ശ്രമിക്കുന്നു എന്ന വാര്ത്ത നിലനില്ക്കേയാണ് ചാനല് റിപ്പോര്ട്ടര് ഈ ഒരു സാഹസത്തിനു മുതിര്ന്നത്. ഇതിനെപ്പറ്റി ചൂടേറിയ ചര്ച്ചകള് നടന്നുവെങ്കിലും പൊതുജന മധ്യത്തില് ഇതൊരു ധാര്മ്മികതയുടെ പ്രശ്നമായി മാറി എന്നതാണ് വാസ്തവം. പ്രതിപക്ഷം പോലും ഇങ്ങനെയുള്ള പത്രപ്രവര്ത്തനത്തെ അനുകൂലിക്കുന്നില്ല. മറ്റു റിപ്പോര്ട്ടര്മാര് കൂടി ഇതുപോലെ ഫോണ് തന്ത്രത്തിന് പുറകേ പോയാല് നമ്മുടെ സ്ഥിതിയെന്താകും. അവരവരുടെ ശബ്ദത്തിനേക്കാള് ഭംഗിയായി ശബ്ദം അനുകരിക്കുന്ന മിമിക്രക്കാര് ധാരാളമുള്ള നാടാണിത്. ആര്ക്ക് ആരെ വേണമെങ്കിലും പറ്റിച്ച് വിളിക്കാനും കഴിയും. അപ്പോള് ആര്ക്ക് ആരെ വിശ്വസിക്കാന് പറ്റും എന്നതാണ് കുഴപ്പിക്കുന്ന ചോദ്യം.
https://www.facebook.com/Malayalivartha
