മുൻ ബ്രസീൽ ഫുട്‌ബോൾ താരം ബ്രിട്ടോ (86) അന്തരിച്ചു. ബ്രസീലിന്റെ 1970-ലെ ലോകകപ്പ് വിജയത്തിൽ നിർണായക പങ്ക് വഹിച്ച ഈ പ്രതിരോധ താരം തന്റെ കരിയറിലുടനീളം ദേശീയ ടീമിനായി മികച്ച പ്രകടനങ്ങൾ അദ്ദേഹം കാഴ്ചവെച്ചിട്ടുണ്ടായിരുന്നു. മെക്‌സിക്കോയിൽ നടന്ന 1970-ലെ ലോകകപ്പിൽ ബ്രസീൽ കിരീടം ചൂടിയപ്പോൾ പ്രതിരോധത്തിന്റെ നെടുംതൂണായിരുന്നു സെന്റർ ബാക്കായിരുന്ന ബ്രിട്ടോ.

ആ ടൂർണമെന്റിലെ എല്ലാ മത്സരങ്ങളിലും മുഴുവൻ സമയവും കളിച്ചു. വിൽസൺ പിയാസയുമായി ചേർന്ന് അദ്ദേഹം തീർത്ത കരുത്തുറ്റ പ്രതിരോധം പെലെ, ജെർസിഞ്ഞോ, റിവെലിനോ തുടങ്ങിയ മുന്നേറ്റ നിര താരങ്ങൾക്ക് ആത്മവിശ്വാസത്തോടെ കളിക്കാൻ അടിത്തറയൊരുക്കുകയും ചെയ്തു.

1964-നും 1972-നും ഇടയിൽ ബ്രസീലിനായി 61 മത്സരങ്ങളിൽ ബ്രിട്ടോ ബൂട്ടണിഞ്ഞിട്ടുണ്ട്. 1970-ന് പുറമെ 1966-ലെ ലോകകപ്പിലും ബ്രസീലിനെ പ്രതിനിധീകരിച്ചിട്ടുണ്ടായിരുന്നു. 1971-ലെ കോപ്പ റോക്ക, 1972-ലെ ടാക്ക ഇൻഡിപെൻഡൻസിയ എന്നീ കിരീടങ്ങൾ നേടുന്നതിലും അദ്ദേഹം പങ്കാളിയായി. ബ്രസീൽ ഫുട്‌ബോൾ ചരിത്രത്തിലെ ഏറ്റവും മികച്ച പ്രതിരോധ നിരക്കാരിൽ ഒരാളാണ് ബ്രിട്ടോ എന്ന് ബ്രസീൽ ഫുട്‌ബോൾ കോൺഫെഡറേഷൻ പ്രസിഡന്റ് സമീർ ഷൗദ് അനുസ്മരിക്കുകയും ചെയ്തു.