സംസ്ഥാനത്ത് ഷിഗെല്ല ബാധിച്ച് വീണ്ടും മരണം. മലപ്പുറം കീഴാറ്റൂർ സ്വദേശി സരോജിനിയാണ് മരിച്ചത്. സംസ്ഥാനത്തെ ഷിഗെല്ല കേസുകളിൽ വർധന രേഖപ്പെടുത്തി. ഈ വർഷം ഇതുവരെ 114 പേർക്കാണ് രോഗം സ്ഥിരീകരിച്ചിട്ടുള്ളത് .

മലപ്പുറത്ത് കടുത്ത വയറിളക്കത്തെ തുടർന്ന് ചികിത്സയിലിരിക്കെ ചൊവ്വാഴ്ച മരിച്ച കീഴാറ്റൂർ സ്വദേശി സരോജിനിക്കാണ് ഷിഗെല്ല സ്ഥിരീകരിച്ചത്. വയറിളക്കം കടുത്തതിനെ തുടർന്ന് തിങ്കളാഴ്ചയാണ് ഇവരെ ആദ്യം മഞ്ചേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്.

എന്നാൽ ആരോഗ്യനില അതീവ ഗുരുതരാവസ്ഥയിലായതിനെ തുടർന്ന് പിന്നീട് കോഴിക്കോട് മെഡിക്കൽ കോളജ് ആശുപത്രിയിലേക്ക് മാറ്റുകയായിരുന്നു.

അതേസമയം ഷിഗെല്ല എന്നറിയപ്പെടുന്ന ഒരു ബാക്ടീരിയ കുടുംബം മൂലമുണ്ടാകുന്ന അണുബാധയാണ് ഷിഗെല്ല അണുബാധ. ഈ ബാക്ടീരിയ കുടലുകളെ ബാധിക്കുന്നു, ഇത് വളരെ പകർച്ചവ്യാധിയാണ്. ഏത് പ്രായത്തിലും ഇത് സംഭവിക്കാം, ഇത് പലപ്പോഴും കുട്ടികളെ ബാധിക്കുന്നു.