ഇനി എങ്ങും ശരണം വിളിയുടെ നാളുകള്.... ഇന്ന് വൃശ്ചികം ഒന്ന് , വ്രതവിശുദ്ധിയുടെ ശരണാരവങ്ങളുമായി മണ്ഡല- മകരവിളക്ക് തീര്ത്ഥാടനത്തിന് ഇന്ന് തുടക്കം.... വെര്ച്വല് ക്യൂവില് മുന്കൂര് അനുമതി വാങ്ങിയവര്ക്ക് മാത്രം ദര്ശനത്തിന് അനുമതി
ഇനി എങ്ങും ശരണം വിളിയുടെ നാളുകള്.... ഇന്ന് വൃശ്ചികം ഒന്ന് , വ്രതവിശുദ്ധിയുടെ ശരണാരവങ്ങളുമായി മണ്ഡല- മകരവിളക്ക് തീര്ത്ഥാടനത്തിന് ഇന്ന് തുടക്കം.... വെര്ച്വല് ക്യൂവില് മുന്കൂര് അനുമതി വാങ്ങിയവര്ക്ക് മാത്രം ദര്ശനത്തിന് അനുമതി
വൃശ്ചിക മാസത്തിന്റെ ആദ്യപുലരിയില് വ്രതം ആരംഭിക്കുന്നു. വ്രതം അനുഷ്ഠിക്കുമ്പോള് ഭക്തര് അയ്യപ്പമുദ്രയുള്ള മാല കഴുത്തിലണിയും. ഈ മാല ക്ഷേത്രസന്നിധിയിലോ ഗുരുസ്വാമിയുടെ മുന്നിലോ പൂജിച്ചാണ് ധരിക്കാറ്. മാലയിടുന്നതോടെ വ്രതം ആരംഭിക്കയായി.
വ്രതവിശുദ്ധിയുടെ ശരണാരവങ്ങളുമായി മണ്ഡല- മകരവിളക്ക് തീര്ത്ഥാടനത്തിന് ഇന്ന് തുടക്കം. ഇന്നലെ വൈകിട്ട് 5ന് തന്ത്രി കണ്ഠരര് മഹേഷ് മോഹനരുടെ സാന്നിദ്ധ്യത്തില് മേല്ശാന്തി വി.കെ. ജയരാജ് പോറ്റി നടതുറന്ന് അയ്യപ്പസ്വാമിയെ ധ്യാനനിദ്രയില് നിന്നുണര്ത്തി ശ്രീകോവിലില് ദീപം തെളിച്ചു. ഉപദേവതാ ക്ഷേത്രങ്ങളിലും ദീപം പകര്ന്ന ശേഷം പതിനെട്ടാംപടിയിറങ്ങി ആഴി ജ്വലിപ്പിച്ചു.
ഇരുമുടിക്കെട്ടുമായി കാത്തുനിന്ന നിയുക്ത ശബരിമല മേല്ശാന്തി എന്. പരമേശ്വരന് നമ്പൂതിരിയെയും മാളികപ്പുറം മേല്ശാന്തി ശംഭു നമ്പൂതിരിയെയും കൈപിടിച്ച് പതിനെട്ടാംപടി കയറ്റി.
ഇന്നലെ വൈകിട്ട് ആറുമണിയോടെ ശ്രീകോവിലിന് മുന്നില് മേല്ശാന്തി എന്. പരമേശ്വരന് നമ്പൂതിരിയുടെ അവരോധന ചടങ്ങ് നടന്നു. കലശം പൂജിച്ച് മേല്ശാന്തിയെ അഭിഷേകം ചെയ്തശേഷം തന്ത്രി ശ്രീകോവിലിലേക്ക് കൂട്ടിക്കൊണ്ടുപോയി അയ്യപ്പസ്വാമിയുടെ മൂലമന്ത്രം പകര്ന്നുനല്കി. തുടര്ന്ന് മാളികപ്പുറം ക്ഷേത്രത്തില് മാളികപ്പുറം മേല്ശാന്തി ശംഭുനമ്പൂതിരിയുടെ അവരോധന ചടങ്ങും നടന്നു.
കഴിഞ്ഞ ഒരു വര്ഷം പുറപ്പെടാ മേല്ശാന്തിമാരായിരുന്ന ശബരിമല മേല്ശാന്തി വി. കെ. ജയരാജ് പോറ്റിയും മാളിപ്പുറം മേല്ശാന്തി രജിനമ്പൂതിരിയും രാത്രി ഒന്പത് മണിയോടെ നാട്ടിലേക്ക് മടങ്ങി. വൃശ്ചികം ഒന്നായ ഇന്ന് പുലര്ച്ചെ ഇരുക്ഷേത്രനടകളും പുതിയ മേല്ശാന്തിമാരാണ് തുറന്നത്.
അതേസമയം പതിനെട്ടാംപടി ചവിട്ടുന്നതിനു വ്രതനിഷ്ഠയിലും ഇത്രയും പടികള് താണ്ടണമെന്നു വിശ്വാസം. പഞ്ചേന്ദ്രിയങ്ങളായ കണ്ണ്, ചെവി, നാക്ക്, മൂക്ക്, ത്വക്ക്, അഷ്ടരാഗങ്ങളില്പെട്ട കാമം, ക്രോധം, ലോഭം, മോഹം, മദം, മാല്സര്യം, അഹങ്കാരം, അസൂയ, ത്രിഗുണങ്ങളായ സാത്വികം, രാജസം, താമസം തുടര്ന്നു വിദ്യ, അവിദ്യ എന്നിവയാണു മണ്ഡല വ്രതവേളയില് താണ്ടേണ്ട പടികള്. കടുത്ത വ്രതമനുഷ്ഠിച്ചാലേ ഇതിനു കഴിയൂ.
മണ്ഡലകാലം മുഴുവനും ബ്രഹ്മചര്യം അനുഷ്ഠിക്കണം. ദിവസവും രാവിലെയു വൈകിട്ടും കുളി നിര്ബന്ധം. സുഗന്ധവസ്തുക്കള്, വാസന സോപ്പ്, പൗഡര്, ഹെയര് ഓയില് തുടങ്ങിയവ ഒഴിവാക്കുന്നത് നന്ന്. ശരീരശുദ്ധിക്കു പുറമേ മാനസിക ശുദ്ധിയും അനിവാര്യം. സ്വാമിഭക്തര് എല്ലാ ദിവസവും ക്ഷേത്രദര്ശനം നടത്തണം.
കറുപ്പോ കാവിയോ നിറത്തിലുള്ള വസ്ത്രങ്ങളാണു വ്രതകാലയളവില് ഉചിതം. വ്രതം അനുഷ്ഠിക്കുമ്പോള് സസ്യാഹാരം, പഴവര്ഗങ്ങള് എന്നിവ മാത്രമേ കഴിക്കാവൂ.
അതേസമയം ശബരിമല ദര്ശനത്തിന് വെര്ച്വല് ക്യൂവില് മുന്കൂര് അനുമതി വാങ്ങിയവര്ക്ക് മാത്രം ദര്ശനത്തിന് അനുമതി. സ്പോട്ട് രജിസ്ട്രേഷന് താത്കാലകമായി നിറുത്തിവെച്ചു. പമ്പാനദിയില് സ്നാനം അനുവദിക്കില്ല.
കൊവിഡിന്റെ രണ്ട് വാക്സിന് എടുത്ത സര്ട്ടിഫിക്കറ്റോ 72 മണിക്കൂറിനുള്ളിലെടുത്ത ആര്.ടി.പി.സി.ആര് നെഗറ്റീവ് സര്ട്ടിഫിക്കറ്റോ ഹാജരാക്കേണ്ടതാണ്. നിലയ്ക്കലില് കൊവിഡ് പരിശോധനയ്ക്ക് സൗകര്യമുണ്ട്. ഭക്തര്ക്ക് രാത്രി 8 മണി വരെ മാത്രം സന്നിധാനത്ത് തങ്ങാം.
കൂടാതെ ഇത്തവണ എല്ലാ ദിവസവും പടിപൂജയുണ്ട്. മാസപൂജാ വേളകളില് നടത്തേണ്ടിയിരുന്ന നിരവധി പടിപൂജകള് കൊവിഡ് കാരണം മുടങ്ങിയതിനാലും രാത്രി എട്ടുമണിക്ക് മുമ്പായി തീര്ത്ഥാടകരുടെ പടികയറ്റം അവസാനിക്കുന്നതിനാലുമാണ് എല്ലാ ദിവസവും പടിപൂജയുള്ളത്.
https://www.facebook.com/Malayalivartha
