ശാലു ചൗരസിയയ്ക്ക് നേരെയുണ്ടായ അതിക്രമത്തില്‍ തെലുങ്ക് സിനിമാ ലോകം ഞെട്ടിയിരിക്കുകയാണ്. മോഷ്ടാക്കളുടെ ആക്രമണത്തില്‍ പ്രസിദ്ധ തെലുങ്ക് ചലച്ചിത്രതാരം ശാലു ചൗരസിയയ്ക്കാണ് പരിക്ക് പറ്റിയത്. കഴിഞ്ഞ ദിവസം രാത്രി ഹൈദരബാദിലെ ബഞ്ജാര ഹില്‍സിന് സമീപമുള്ള കെ ബി ആര്‍ പാര്‍ക്കില്‍ സായാഹ്ന സവാരിക്കിറങ്ങിയതായിരുന്നു ശാലു. രാത്രി 8.30 ഓടെ അപരിചിതനായ വ്യക്തി താരത്തെ ആക്രമിക്കുകയായിരുന്നുവെന്ന് പൊലീസ് അറിയിച്ചു.

പൊലീസ് പറയുന്നതനുസരിച്ച് പാര്‍ക്കിലൂടെ നടക്കുകയായിരുന്ന ശാലുവിനോട് മോഷ്ടാവ് പണവും കൈയിലുള്ള വിലപിടിപ്പുള്ള വസ്തുക്കളും നല്‍കാന്‍ ആവശ്യപ്പെട്ടു. നടി എതിര്‍ത്തതോടെ ആദ്യം മുഖത്ത് ശക്തിയായി ഇടിക്കുകയും അതിനു ശേഷം പാറക്കല്ല് കൊണ്ട് ആക്രമിക്കുകയുമായിരുന്നു. ആക്രമണത്തിനു ശേഷം നടിയുടെ കൈയിലുണ്ടായിരുന്ന ഫോണും തട്ടിപ്പറിച്ചുകൊണ്ട് പ്രതി രക്ഷപ്പെട്ടു. തലയിലും കണ്ണിന് താഴെയുമായി പരിക്കേറ്റ ശാലുവിനെ സമീപത്തുള്ള ഒരു സ്വകാര്യ ആശുപത്രിയില്‍ പ്രവേശിപ്പിച്ചു.

താരത്തിന്റെ പരാതിയെതുടര്‍ന്ന് ബഞ്ജാര ഹില്‍സ് പൊലീസ് മോഷ്ടാവിന് വേണ്ടി വ്യാപക തെരച്ചില്‍ ആരംഭിച്ചു. സമീപത്തുള്ള സി സി ടിവികളെല്ലാം പരിശോധിച്ച പൊലീസ് എത്രയും വേഗം പ്രതിയെ പിടികൂടുമെന്ന് അറിയിച്ചു. പ്രഭാത സവാരിക്കും സായാഹ്ന സവാരിക്കുമായി ഹൈദരാബാദിലെ ചലച്ചിത്ര മേഖലയിലുള്ളവരുടെ ഇഷ്ട സ്ഥലമാണ് കെ ബി ആര്‍ പാര്‍ക്ക്. ഇവിടെ ഇതിനു മുമ്പും മാല പൊട്ടിക്കല്‍ അടക്കമുള്ള സംഭവങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്.

അക്രമിയെ തിരിച്ചറിയാന്‍ പ്രദേശത്തെ സിസിടിവി ക്യാമറകളിലെ ദൃശ്യങ്ങള്‍ പരിശോധിച്ചു വരികയാണെന്നാണ് പോലീസ് പറയുന്നത്. വിശാലമായ കെബിആര്‍ പാര്‍ക്കില്‍ രാവിലെയോ വൈകുന്നേരമോ നടക്കാന്‍ സെലിബ്രിറ്റികളും വ്യവസായികളും രാഷ്ട്രീയ നേതാക്കളും പതിവായി എത്താറുണ്ട്.

പാര്‍ക്കിന്റെ പരിസരത്ത് മുമ്പും സമാന സംഭവങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്. 2014ല്‍, അരബിന്ദോ ഫാര്‍മ എക്‌സിക്യൂട്ടീവ് കെ. നിത്യാനന്ദ റെഡ്ഡി പ്രഭാത നടത്തത്തിന് ശേഷം കാറില്‍ ഇരിക്കുമ്പോള്‍ എകെ 47 ഉപയോഗിച്ച് ഒരാള്‍ വെടിയുതിര്‍ത്തിരുന്നു. ഭാഗ്യവശാല്‍ റെഡ്ഡി പരിക്കേല്‍ക്കാതെ രക്ഷപ്പെട്ടു.

മാവോയിസ്റ്റ് വിരുദ്ധ സേനയായ ഗ്രേഹൗണ്ട്‌സില്‍ നിയമിക്കപ്പെട്ട ഒരു മുന്‍ പോലീസുകാരനെ പോലീസ് പിന്നീട് അറസ്റ്റ് ചെയ്തു, ഇദ്ദേഹം ഒരു റൈഫിള്‍ മോഷ്ടിച്ചതായും കൊള്ളയടിക്കുന്നതിനായി ആക്രമണം നടത്തിയതായും സമ്മതിച്ചു.

തമിഴ്, തെലുങ്ക് സിനിമാ വ്യവസായത്തില്‍ തിളങ്ങി നില്‍ക്കുന്ന താരമാണ് ശാലു ചൗരസ്യ. 1992 ഒക്ടോബര്‍ 21 ന് ജനിച്ച ശാലു മധ്യപ്രദേശിലാണ് വളര്‍ന്നത്. മധ്യപ്രദേശില്‍ സ്‌കൂള്‍ വിദ്യാഭ്യാസം പൂര്‍ത്തിയാക്കിയ അവര്‍ തെലങ്കാനയിലെ ഹൈദരാബാദില്‍ കോളേജ് ബിരുദം പൂര്‍ത്തിയാക്കി.

മോഡലിംഗില്‍ലാണ് തന്റെ കരിയര്‍ ആരംഭിച്ചത്. 2015ല്‍ തെലുങ്ക് ചിത്രമായ സൈലു എന്ന ചിത്രത്തിലൂടെ അഭിനയരംഗത്ത് അരങ്ങേറ്റം കുറിക്കുകയും ചെയ്തു. 2015ല്‍ ചില്‍ ചെസാഡു എന്ന തെലുങ്ക് ഷോര്‍ട്ട് ഫിലിമിലും 2017ല്‍ ഡോണ്ട് ട്രസ്റ്റ് ആരെന്ന കന്നഡ ത്രില്ലര്‍ ഷോര്‍ട്ട് ഫിലിമിലും അഭിനയിച്ചു. അരങ്ങേറ്റത്തിന് ശേഷം കൂടാതെ ഷോര്‍ട്ട് ഫിലിമുകളിലും, 2017ല്‍ പുറത്തിറങ്ങിയ ഓ പിള്ള നീ വല്ല, ആരണ്യംലോ എന്നീ തെലുങ്ക് സിനിമകളിലും 2019ല്‍ തെലുങ്ക് സിനിമ പെല്ലന്റെയിലുംസ്യശാലു പ്രത്യക്ഷപ്പെട്ടു.

രാം സേവ സംവിധാനം ചെയ്ത മഹേഷിനൊപ്പം 2019ല്‍ എന്‍ കാദലി സീന്‍ പോദ്ര എന്ന ചിത്രത്തിലൂടെ തമിഴ് സിനിമയില്‍ അരങ്ങേറ്റം കുറിച്ചു. ഏറെ ആരാധകരുള്ള നടിയാണ് ശാലു ചൗരസ്യ. ഇവര്‍ക്ക് നേരെയുണ്ടായ അതിക്രമത്തില്‍ സിനിമാ ലോകം പ്രതിഷേധം അറിയിച്ചിട്ടുണ്ട്. എത്രയും വേഗം കുറ്റവാളിയെ പിടികൂടണമെന്ന് അഭ്യര്‍ത്ഥിച്ചിട്ടുണ്ട്.