പത്തനാപുരം എംഎൽഎ ഗണേഷ് കുമാറിനെ പരിഹസിച്ച് കോൺഗ്രസ് നേതാവ് രാഹുൽ മാങ്ങൂട്ടത്തിൽ രംഗത്ത്. ഫേസ്ബുക്ക് കുറിപ്പിലൂടെയാണ് തന്റെ വിമർശനം ഗണേഷിനെതിരെ രാഹുൽ നടത്തിയിരിക്കുന്നത്. അദ്ദേഹത്തിന്റെ ഫേസ്ബുക്ക് കുറുപ്പിന്റെ പൂർണ്ണ രൂപം ഇങ്ങനെ;

ചില മനുഷ്യരുണ്ട് നമ്മുക്കിടയിൽ, "പുര കത്തുമ്പോൾ വാഴ വെട്ടുക " എന്ന ചൊല്ലിനെ അന്വർത്ഥമാക്കുന്ന ചിലർ. ഒരു അപകടമുണ്ടായാലും, ദുരന്തമുണ്ടായാലും അവർ കണ്ണ് പാർത്തിരിക്കും സ്വന്തമായി പേരുണ്ടാക്കുവാനുള്ള ഊഴം കാത്ത്. അത്തരക്കാർ ജനപ്രതിനിധികളോ ഭരണാധികാരികളോ ആകുന്ന ദുരന്തക്കാഴ്ച്ചയാണ് പത്തനാപുരം MLA ഗണേഷ് കുമാറിൽ കണ്ടത്.

മഴ തോരാതെ പെയ്യുമ്പോൾ , ആശങ്കകളും ഭയവും കൊണ്ട് മനം തോരാതെ ഇരുണ്ടു കൂടി നില്ക്കുന്ന മനുഷ്യർക്കിടയിലാണ് ഗണേഷ് കുമാർ "കരുതൽ ഷൂട്ടിന് " ഇറങ്ങിത്തിരിച്ചത്. വെള്ളം കയറി കൂര തകരുമോ, അന്നം മുടങ്ങുമോ , ഉയിര് പോകുമോ, ഉറ്റവരറ്റ് പോകുമോയെന്ന ചിന്തകളിൽ വിറങ്ങലിച്ച് നില്ക്കുന്ന മനുഷ്യർക്കിടയിൽ അഭിനയിച്ച് നന്മ മരമാകുവാൻ ഇറങ്ങിത്തിരിച്ച ഗണേഷ് കുമാറിനെക്കാൾ ആർദ്രത അല്പം ജീവൻ മാത്രം തുടിക്കുന്ന മാംസം കൊത്തിവലിക്കുന്ന കഴുകനുണ്ട്... ഹാ കഷ്ടം!