കെ സുരേന്ദ്രൻ കേരളത്തിൽ പരസ്യമായി കലാപത്തിന് ആഹ്വാനം ചെയ്യുകയാണെന്ന് എസ്ഡിപിഐ. പാലക്കാട് മമ്പറത്ത് ആർഎസ്എസ് പ്രവർത്തകൻ വെട്ടേറ്റ് മരിച്ച സംഭവത്തിന്റെ മറവിലാണ് ഇത്തരത്തിലൊരു ആഹ്വാനം. കൊലപാതകത്തിന് അതേ നാണയത്തിൽ തിരിച്ചടിക്കുകയാണെന്ന പ്രസ്താവന നിയമവ്യവസ്ഥിതിയോടുള്ള വെല്ലുവിളിയാണെന്ന് എസ്ഡിപിഐ സംസ്ഥാന ജനറൽ സെക്രട്ടറി റോയ് അറയ്ക്കൽ ആരോപിച്ചു.

കൊലപാതകം ന‌ടന്നാൽ പ്രതികളെ പ്രഖ്യാപിക്കാനുള്ള ജോലി സുരേന്ദ്രൻ ഏറ്റെടുക്കേണ്ടതില്ല. അത് അന്വേഷിച്ച് കണ്ടെത്താൻ നിയമ സംവിധാനങ്ങളുണ്ടെന്നും അദ്ദേഹം വാർത്താ സമ്മേളനത്തിൽ പറഞ്ഞു. സംസ്ഥാനത്ത് ബിജെപി ക‌ടുത്ത ആഭ്യന്തര പ്രതിസന്ധിയിലാണ്.

ഓരോ സംഘർഷങ്ങളും പ്രശ്നങ്ങളും രാഷ്ട്രീയ നേട്ടത്തിനുള്ള ചവിട്ടു പടിയായാണ് ബിജെപി കാണുന്നത്. ലൗ ജിഹാദ്, നാർകോട്ടിക് ജിഹാദ്, ​ഹ​ലാൽ ജിഹാദ് തുടങ്ങി പലതും സംസ്ഥാനത്ത് ബിജെപിയുടെ വിദ്വേഷ രാഷ്ട്രീയത്തിന് വേണ്ടത്ര വേരോട്ടം ഉണ്ടാക്കിയില്ല.

അതിനാൽ സംഘർഷങ്ങളും കലാപങ്ങളും സൃഷ്ടിച്ചുള്ള ധ്രുവീകരണത്തിനാണ് അടുത്ത നോട്ടം. അത് തിരിച്ചറിയാനുള്ള വിവേകം കേരളത്തിലെ ജനങ്ങൾക്കുണ്ട്. വിദ്വേഷ പ്രചരണത്തിലൂടെ കലാപമുണ്ടാക്കി രാഷ്‌ട്രീയ നേട്ടം കൊയ്യാമെന്ന് ബിജെപിയുടെ വ്യാമോഹം നടക്കില്ലെന്നും റോയ് അറയ്ക്കൽ പറഞ്ഞു.