മലപ്പുറം കോട്ടക്കലില്‍ മുത്തലാഖ് ചൊല്ലണമെന്നാവശ്യപ്പെട്ട് നവവരനെ തട്ടിക്കൊണ്ടുപോയി മര്‍ദ്ദിച്ച സംഭവം മാറി മറിയുകയാണ്. ഈ കേസില്‍ ഉള്‍പ്പെട്ട പ്രതികളെ അടുത്ത ദിവസം അറസ്റ്റ് ചെയ്തതിന് പിന്നാലെയാണ് ട്വിസ്റ്റ് ഉണ്ടായിരിക്കുന്നത്.

ഭര്‍ത്താവ് പ്രകൃതി വിരുദ്ധമായി പീഡിപ്പിച്ചെന്നും സ്ത്രീധനമാവശ്യപെട്ട് ഉപദ്രവിച്ചെന്നും ഭാര്യ പരാതി നല്‍കി. ലൈംഗിക വൈകൃതത്തിന് അടിമയായ ഭര്‍ത്താവ് പ്രകൃതി വിരുദ്ധമായി നിരവധി തവണ പീഡിപ്പിച്ചു, എതിര്‍ത്തപ്പോള്‍ ക്രൂരമായി മര്‍ദ്ദിച്ചെന്നും മലപ്പുറം എസ് പിക്ക് നല്‍കിയ പരാതിയില്‍ പറയുന്നു.

ലൈംഗിക വൈകൃതത്തിന് അടിമയായ ഭര്‍ത്താവ് പ്രകൃതി വിരുദ്ധമായി നിരവധി തവണ പീഡിപ്പിച്ചു, എതിര്‍ത്തപ്പോള്‍ ക്രൂരമായി മര്‍ദ്ദിച്ചു, പരപുരഷ ബന്ധമാരോപിച്ച് അപമാനിച്ചു, പകയോടെ പെരുമാറി, ബന്ധു വീടുകളില്‍ പോകാനോ അവരുമായി സംസാരിക്കാനോ അനുവദിച്ചിരുന്നില്ല, സ്ത്രീധനം നല്‍കിയില്ലെന്നാരോപിച്ച് ഭര്‍ത്താവും മാതാപിതാക്കളും സഹോദരിയും പല തവണ ഉപദ്രവിച്ചു വിവാഹശേഷം ആവശ്യപെട്ട അഞ്ച് ലക്ഷം രൂപ നല്‍കാത്തതിനാല്‍ വിവാഹ സമയത്ത് ധരിച്ചിരുന്ന സ്വര്‍ണാഭരണങ്ങള്‍ പിടിച്ചുവച്ചു എന്നിങ്ങനെയുള്ള പരാതികളാണ് പെണ്‍കുട്ടി പൊലീസിന് നല്‍കിയിട്ടുള്ളത്. ദുരനുഭവങ്ങള്‍ വീട്ടില്‍ പറയരുതെന്ന് ഭര്‍ത്താവും വീട്ടുകാരും ഭീഷണിപെടുത്തിയിരുന്നുവെന്നും പെണ്‍കുട്ടി പരാതിയില്‍ പറയുന്നു.

ഭര്‍ത്താവ് ലഹരിക്ക് അടിമയാണെന്നും പല തവണ വീട്ടില്‍ വച്ച് മയക്കു മരുന്ന് ഉപയോഗിച്ചിട്ടുണ്ടെന്നും പരാതിയിലുണ്ട്. മര്‍ദ്ദനത്തിലും പീഡനത്തിലും പലപ്പോഴും ബോധം പോകുന്ന വിധം പരിക്കേറ്റിരുന്നെന്നും ആശുപത്രിയില്‍ ചികിത്സ തേടിയിരുന്നെന്നും പരാതിയിലുണ്ട്. ഭര്‍ത്താവിനും മാതാപിതാക്കള്‍ക്കും സഹോദരിക്കുമെതിരെ നടപടിയെടുക്കണെമന്നാവശ്യപെട്ടാണ് പെണ്‍കുട്ടി എസ് പിക്ക് പരാതി നല്‍കിയിട്ടുള്ളത്. ഇതിനിടെ തട്ടിക്കൊണ്ടുപോയി മര്‍ദ്ദിച്ചതില്‍ പരിക്കേറ്റ നവവരന്‍ ആശുപത്രിയില്‍ ചികിത്സയില്‍ തുടരുകയാണ്.


അതേസമയംനവവരനെ തട്ടിക്കൊണ്ടുപോയി മര്‍ദിച്ച സംഭവത്തില്‍ ആറുപേര്‍ അറസ്റ്റില്‍. ചങ്കുവെട്ടി എടക്കണ്ടന്‍ അബ്ദുള്‍അസീസിന്റെ മകന്‍ അബ്ദുള്‍ഹസീബിനെ മര്‍ദിച്ച കേസില്‍ ഭാര്യാപിതാവും ബന്ധുക്കളുമുള്‍പ്പെടെ ആറുപേരെയാണ് അറസ്റ്റ് ചെയ്തത്.

ഹസീബിന്റെ ഭാര്യാപിതാവ് ഒതുക്കുങ്ങല്‍ മാണൂര്‍ കിഴക്കേപ്പറമ്പന്‍ ഷംസുദ്ദീന്‍, സഹോദരന്‍ കെ.പി. സഫീറലി (31), ഷംസുദ്ദീന്റെ ഭാര്യയുടെ ബന്ധുക്കളായ പറപ്പൂര്‍ ചോലപ്പുറത്ത് മജീദ് (38), ചോലപ്പുറത്ത് ഷെഫീഖ് (30), ചോലപ്പുറത്ത് അബ്ദുള്‍ജലീല്‍ (34), ചോലപ്പുറത്ത് മുസ്തഫ (62) എന്നിവരാണ് അറസ്റ്റിലായത്.

ഏഴാം പ്രതി കിഴക്കേപ്പറമ്പന്‍ ലത്തീഫ് ഒളിവിലാണ്. ഹസീബിന്റെ മൊഴിയനുസരിച്ച് തട്ടിക്കൊണ്ടുപോകല്‍, ആയുധം കാട്ടി ഭീഷണിപ്പെടുത്തല്‍, വധശ്രമം എന്നീ കുറ്റങ്ങള്‍ ചുമത്തിയാണ് കേസെടുത്തത്.

മര്‍ദനത്തില്‍ ജനനേന്ദ്രിയത്തിനും വാരിയെല്ലിനും പരിക്കേറ്റ ഹസീബ് ചങ്കുവെട്ടിയിലെ സ്വകാര്യ ആശുപത്രിയില്‍ ചികിത്സയിലാണ്. ആക്രമണത്തിനുപിന്നില്‍ ഹസീബും ഭാര്യയുടെ കുടുംബവും തമ്മിലുള്ള തര്‍ക്കം മാത്രമാണെന്ന് സ്‌റ്റേഷന്‍ ഇന്‍സ്‌പെക്ടര്‍ എം.കെ. ഷാജി പറഞ്ഞു.

കഴിഞ്ഞ ഏപ്രിലിലാണ് ഇവര്‍ വിവാഹിതരാകുന്നത്. ഇവര്‍ തമ്മിലുള്ള ബന്ധം വഷളായതിനെത്തുടര്‍ന്ന് ഹസീബിന്റെ ഭാര്യ സ്വന്തം വീട്ടിലേക്ക് തിരിച്ചുവന്നിരുന്നു. തിങ്കളാഴ്ച രാവിലെ 11.30ഓടെയാണ് കാറിലെത്തിയ സംഘം, കോട്ടയ്ക്കല്‍ മിനിറോഡില്‍ ഓട്ടോ കണ്‍സള്‍ട്ടന്‍സി നടത്തുന്ന ഹസീബിനെ തട്ടിക്കൊണ്ടുപോയി മര്‍ദിച്ചത്. വിവാഹമോചനം ആവശ്യപ്പെട്ടായിരുന്നു മര്‍ദനം.

ഹസീബിന്റെ സഹോദരന്‍ നല്‍കിയ വിവരത്തിന്റെ അടിസ്ഥാനത്തില്‍ കോട്ടയ്ക്കല്‍ പോലീസ് ഒതുക്കുങ്ങലിലെ ഭാര്യവീട്ടിലെത്തി ഹസീബിനെ മോചിപ്പിക്കുകയായിരുന്നു. ഷംസുദ്ദീന്‍ ഉള്‍പ്പെടെ ആറുപേരെയും കസ്റ്റഡിയിലെടുത്തു.