സ്വപ്ന സുരേഷ് ജയിലില്‍ നിന്നിറങ്ങിയാല്‍ ഇവിടെ ഭൂകമ്പമുണ്ടാക്കുമെന്നും കേരളം എടുത്ത് മറിക്കുമെന്നും പറഞ്ഞവരാണ് ചാനലുകാര്‍. സ്വപ്നയുടെ നല്ലവായിലുള്ള വര്‍ത്തമാനം കേള്‍ക്കാനായി ജയിലിന് മുമ്പില്‍ തടിച്ചുകൂടി. എന്നാല്‍ ഒന്നും മിണ്ടാതെ അമ്മയുടെ കൈപിടിച്ച് എല്ലും തോലുമായ സ്വപ്ന വീട്ടിലേക്ക് പോയി. ചാനലുകളായ ചാനലുകള്‍ ബാലരാമപുരത്തെ വീട്ടില്‍ നിന്നും ലൈവ് തുടങ്ങി. ഏത് നിമിഷവും സ്വപ്ന ഭൂകമ്പമുണ്ടാക്കുമെന്ന്.

ജയിലില്‍ നിന്നും ഇറങ്ങിയിട്ട് ഇത്രയും നാളായിട്ടും ഒരു ചുക്കും സംഭവിച്ചില്ല. ആകെ കാണാനായത് മോഡേണായി മുടിയൊക്കെ സ്‌ട്രൈറ്റ് ചെയ്ത് മേക്കപ്പിട്ട സുന്ദരിയായ സ്വപ്നയേയാണ്. ഇപ്പോള്‍ സ്വപ്ന എല്ലാം പറയുമെന്ന് കരുതി ചാനലുകാര്‍ കയറിയിറങ്ങി. പക്ഷെ സ്വപ്ന ഒന്നും മിണ്ടിയില്ല.

അതേസമയം എല്ലാം മിണ്ടാനായി അനുപമ തലസ്ഥാനത്തുള്ളപ്പോള്‍ എല്ലാവരും അവരുടെ പുറകേയായി. സ്വപ്നയ്ക്ക് തലസ്ഥാനം വിടാമെന്ന വാര്‍ത്ത പലരും മൂലയ്‌ക്കൊതുക്കി. ചിലര്‍ അത് കൊടുത്തത് കൂടിയില്ല. അനുപമ ഇവിടെ കത്തിക്കയറുമ്പോള്‍ ഏത് സ്വപ്ന എന്ത് സ്വപ്ന.

നയതന്ത്ര ചാനല്‍ വഴി സ്വര്‍ണം കടത്താന്‍ ശ്രമിച്ച കേസിലെ പ്രതി സ്വപ്ന സുരേഷിന്റെ ജാമ്യവ്യവസ്ഥകളില്‍ ഇളവ് അനുവദിച്ചതാണ് വാര്‍ത്ത. എറണാകുളം ജില്ല വിട്ട് പുറത്തുപോകരുതെന്ന ജാമ്യവ്യവസ്ഥക്കാണ് ഇളവ് നല്‍കിയിരിക്കുന്നത്. എറണാകുളം പ്രിന്‍സിപ്പല്‍ സെഷന്‍സ് കോടതിയാണ് സ്വപ്നക്ക് ഇളവ് നല്‍കിയത്. എറണാകുളം ജില്ല വിട്ട് പോകാന്‍ അനുമതിയുണ്ടെങ്കിലും കേരളത്തിന് പുറത്ത് പോകരുതെന്ന് കോടതി നിര്‍ദ്ദേശിച്ചിട്ടുണ്ട്.



സ്വര്‍ണക്കടത്ത് കേസുമായി ബന്ധപ്പെട്ട കളളപ്പണ ഇടപാടില്‍ സ്വപ്‌നയ്ക്ക് നേരത്തെ തന്നെ ജാമ്യം കിട്ടിയിരുന്നു. മുന്‍കൂര്‍ അനുമതിയില്ലാതെ എറണാകുളം ജില്ല വിട്ടുപോകരുതെന്ന വ്യവസ്ഥയോടെയാണ് കോടതി ജാമ്യം അനുവദിച്ചിരുന്നത്.

തിരുവനന്തപുരത്തെ വീട്ടില്‍ പോകാന്‍ ഈ വ്യവസ്ഥ നീക്കണമെന്ന് സ്വപ്ന സുരേഷ് ആവശ്യപ്പെട്ടിരുന്നു. സ്വപ്ന തിരുവനന്തപുരത്തേക്ക് പോകുന്നതില്‍ എതിര്‍പ്പില്ലെന്നും എന്നാല്‍ കേരളം വിട്ടുപോകണമെങ്കില്‍ മുന്‍കൂര്‍ അനുമതി തേടണമെന്നും എന്‍ഫോഴ്‌സ്‌മെന്റും കഴിഞ്ഞ ദിവസം കോടതിയില്‍ ആവശ്യപ്പെട്ടിരുന്നു.



അതേസമയം നയതന്ത്ര ബാഗേജ് വഴിയുള്ള സ്വര്‍ണക്കടത്ത് കേസിലെ നാല് പ്രതികള്‍ കൂടി ഇന്ന് ജയില്‍ മോചിതരാകും. സ്വര്‍ണക്കടത്തിന്റെ മുഖ്യ ആസൂത്രകനെന്ന് അന്വേഷണ ഏജന്‍സികള്‍ ആരോപിക്കുന്ന സരിത് ഉള്‍പ്പെടെയാണ് ജയിലില്‍ നിന്നും ഇറങ്ങുന്നത്. എന്‍ഐഎ കേസില്‍ ഉള്‍പ്പെടെ എല്ലാ കേസുകളിലും ഇന്ന് പുറത്തിറങ്ങുന്ന സരിത്, റമീസ്, ജലാല്‍, മുഹമ്മദ് ഷാഫി എന്നീ നാല് പേര്‍ക്കും ജാമ്യം ലഭിച്ചിരുന്നു.

അറസ്റ്റിലായി ഒരു വര്‍ഷത്തിനു ശേഷമാണ് ജയില്‍ മോചനം. ജയിലിനുള്ളില്‍ വച്ച് മുഖ്യമന്ത്രിക്ക് അനുകൂലമായി മൊഴി നല്‍കാന്‍ ഉദ്യോഗസ്ഥര്‍ നിര്‍ബന്ധിക്കുന്നുവെന്ന് സരിത് കോടതിയ്ക്ക് പരാതി നല്‍കിയിരുന്നു. സരിത്തിന്റെ സുഹൃത്തുക്കളും കൂട്ടുപ്രതികളുമായ സ്വപ്ന, സന്ദീപ് നായര്‍ എന്നിവര്‍ നേരത്തെ ജയിലില്‍ നിന്നും ഇറങ്ങി. ഇതോടെ സ്വര്‍ണ കടത്തിലെ പ്രധാന പ്രതികളെല്ലാം ജയിലിന് പുറത്തായി.

കോഫെപോസ കാലാവധി അവസാനിച്ചതിനാലാണ് ഇവര്‍ ജയില്‍ മോചിതരാകുന്നത്. കേസിലെ മുഖ്യ ആസൂത്രകന്‍ സരിത്ത് ആണെന്നാണ് കസ്റ്റംസിന്റെയും എന്‍ ഐ എയുടെയും കണ്ടെത്തല്‍. സരിത്ത് കൂടി പുറത്തിറങ്ങിയതോടെ സ്വര്‍ണകടത്ത് കേസിലെ പ്രധാന പ്രതികളെല്ലാം ജയില്‍ മോചിതരായി കഴിഞ്ഞു.

സ്വപ്നയുടെ ഈ വാര്‍ത്തയ്ക്ക് അധികം പ്രാധാന്യം കിട്ടാതിരുന്നപ്പോള്‍ മറിച്ച് അനുപമയുടെ അവസ്ഥ അങ്ങനെയല്ല. എല്ലാ ചാനലുകളും രാവിലെ മുതല്‍ പാതിരാത്രി വരെ ലൈവോട് ലൈവാണ്. ഇനി സ്വപ്നയ്ക്ക് വാര്‍ത്താ പ്രാധാന്യം വരണമെങ്കില്‍ അനുപമയ്ക്ക് എത്രയും പെട്ടന്ന് കുഞ്ഞിനെ കിട്ടണം. എന്നാല്‍ കുഞ്ഞിനെ കിട്ടിയാലും സമരം തുടരുമെന്നാണ് അനുപമ പറയുന്നത്. അതോടെ സ്വപ്നയുടെ ആ പ്രതീക്ഷയും പോയി.