മക്കളെ വിദേശത്തേക്ക് അയക്കുന്നതിനു മുന്നേ എന്തൊക്കെ കാര്യങ്ങൾ ശ്രദ്ധിക്കണമെന്ന മുന്നറിയിപ്പ് നൽകിയിരിക്കുകയാണ് ഡോ.സുൽഫി നൂഹ്. വിമാനത്തിൽ വിദേശ രാജ്യത്തേക്ക് പറക്കും മുന്നേ നാഷണൽ മെഡിക്കൽ കമ്മീഷൻ ഇന്നലെ പുറത്തിറക്കിയ മാർഗരേഖ അറിഞ്ഞിരിക്കുക.ഡോ സുൽഫി നൂഹുവിന്റെ ഫേസ്ബുക്ക് കുറിപ്പ് ഇങ്ങനെ; പറപ്പിക്കും"മുമ്പ്!

മൈക്ക് ടെസ്റ്റിംഗ് ! മൈക്ക് ടെസ്റ്റിംഗ്!"ഹലോ "ഹലോ" "അമ്പലപ്പറമ്പിന്റെ വടക്കുഭാഗത്ത് മക്കളെ എംബിബിഎസ് പഠനത്തിന് വിദേശത്തയയ്ക്കാൻ കൂട്ടംകൂടി നിൽക്കുന്ന രക്ഷകർത്താക്കൾ കമ്മിറ്റി ഓഫീസിലെത്തി ഈ രേഖകൾ വാങ്ങി പോകണമെന്ന് ഉത്സവ കമ്മിറ്റിയുടെ പേരിൽ അഭ്യർത്ഥിക്കുന്നു"

ഇത് നാഷണൽ മെഡിക്കൽ കമ്മീഷൻ ഇന്നലെ പുറത്തിറക്കിയ മാർഗരേഖ വിമാനത്തിൽ വിദേശ രാജ്യത്തേക്ക് "പറക്കും" മുമ്പ് സോറി തെറ്റിപ്പോയി, "പറപ്പിക്കും മുമ്പ്" , അതെ മക്കളെ വിദേശ പഠനത്തിന് "പറപ്പിക്കും മുമ്പ് " ഇതൊക്കെ വിശദമായി പഠിച്ചു പോകുന്നതാണ് നല്ലത്. മക്കളുടെ നീറ്റ് റാങ്ക് നിങ്ങൾ അറിയുന്നതിനു മുൻപ് തന്നെ ചില ബ്രോക്കർ ചേട്ടൻമാർ വിദേശ പഠനത്തെക്കുറിച്ച് ഘോരഘോരം സംസാരിച്ച് നിങ്ങളെ സമീപിച്ചിട്ടുണ്ടാകും.

അവർ കേരളത്തിലെ സ്വകാര്യ മെഡിക്കൽ കോളേജുകളുടെ ഫീസിന്റെ മൂന്നിലൊന്ന് തുകക്ക് മക്കളെ ഡോക്ടറാക്കി തരാമെന്ന ഉറപ്പും തന്നിട്ടുണ്ടാകും. രേഖകൾ വിശദമായി പഠിക്കണം. അതിനുമുൻപ് വിദ്യാർഥിക്ക് ഡോക്ടറാകാൻ താൽപര്യമുണ്ടെന്നും ജീവിതകാലം മുഴുവൻ കഠിനാധ്വാനം ചെയ്യാനുള്ള സമ്മതമുണ്ടോയെന്നും ഉറപ്പാക്കണം അങ്ങനെയുണ്ടെങ്കിൽ , അങ്ങനെ ഉണ്ടെങ്കിൽ മാത്രം , വിദേശ പഠനത്തിൻറെ നിലവാരം കൃത്യമായി ഉറപ്പാക്കണം. ഭാരതത്തിലെ ചില മെഡിക്കൽ കോളേജുകളുടെ മെഡിക്കൽ വിദ്യാഭ്യാസ നിലവാരം

നേർപ്പിച്ച്
നേർപ്പിച്ച്
നേർപ്പിച്ച്
നേർപ്പിച്ച് വീണ്ടും
നേർപ്പിച്ച്
വീണ്ടും
നേർപ്പിച്ച "ആഴ്സനികം ആൽബം" പോലെയായിട്ടുണ്ട്. അപ്പൊ പിന്നെ കേട്ടുകേൾവിയില്ലാത്ത വിദേശ മെഡിക്കൽ കോളേജുകളുടെ നിലവാരം ഉറപ്പാക്കാൻ രക്ഷകർത്താക്കൾക്ക് ബാധ്യതയുണ്ട്,

ആയിരം വട്ടം.ഇനിയുള്ള കാലത്ത് നിലവാരമുള്ള മെഡിക്കൽ കോളേജുകളിൽ ഉയർന്ന മാർക്ക് വാങ്ങി വിജയിച്ചവർക്ക് മാത്രമായിരിക്കും തൊഴിൽ സാധ്യതയെന്ന് മനസ്സിലാക്കണംവിദേശ രാജ്യത്തും ഇവിടെയും ഹൗസ് സർജൻസി ചെയ്യുവാനും അതിനുമുൻപ് എക്സിറ്റ് പരീക്ഷ പാസാവാകുവാനും തയ്യാറാണെന്ന് ഉറപ്പാക്കണം.

ഇംഗ്ലീഷ് സംസാരിക്കുന്ന രാജ്യങ്ങളിൽ പഠിക്കുന്ന വിദ്യാർഥികൾക്കും ഇളവില്ലായെന്നുള്ളത് വളരെ പ്രാധാന്യമർഹിക്കുന്നു. അതുകൊണ്ട് ,"പറപ്പിക്കും മുമ്പ്" എൻഎംസി സൈറ്റിൽ പോയി ആ ഡോക്യുമെന്റ് ഡൗൺലോഡ് ചെയ്തു മുഴുവൻ വായിക്കുന്നത് വളരെ നല്ലത്.

ഉത്സവകമ്മിറ്റി ഈ വിവരം അറിയിച്ചു കൊണ്ട് മറ്റൊരു അനൗൺസ്മെൻറ് ചെയ്യുന്നതല്ലായെന്ന് പ്രത്യേകം പറയുന്നു "പറപ്പിക്കും മുമ്പ് " ഇതെല്ലാം വിശദമായി പഠിക്കണമെന്ന് കാവിലമ്മ സാക്ഷിയാക്കി ഒന്നുകൂടി അറിയിച്ചുകൊണ്ട് അനൗൺസ്മെൻറ് നിർത്തുന്നു . വണക്കം .ഡോ സുൽഫി നൂഹു.