ആശ്വസിപ്പിക്കാനാകാതെ... എന്റെ മോള് കരളിന്റെ ഒരു ഭാഗം, ഞാനും പോകും എന്റെ മോളുടെ അടുത്തേക്ക്; വേദനയായി പിതാവിന്റെ ഫേസ്ബുക് പോസ്റ്റ്; ഗാര്ഹിക പീഡനം മൂലം ആത്മഹത്യ ചെയ്ത നിയമവിദ്യാര്ഥിനി മോഫിയ തീരാ വേദനയാകുന്നു
ഗാര്ഹിക പീഡനം മൂലം ആലുവയില് ആത്മഹത്യ ചെയ്ത നിയമവിദ്യാര്ഥിനി മോഫിയ പര്വീണിന്റെ വേര്പാടിന്റെ വേദനയിലാണ് നാട്ടുകാരും ബന്ധുക്കളും. അതിനിടെ മകളുടെ അകാല മരണത്തില് ഉള്ളുലഞ്ഞ പിതാവിന്റെ ഫേസ്ബുക് പോസ്റ്റ് മറ്റൊരു വേദനയായി. മോഫിയ പര്വീണിന്റെ പിതാവ് ദില്ഷാദാണു താന് മകള്ക്കൊപ്പം പോവുകയാണെന്നു കാണിച്ച് ഇന്നലെ ഫേസ്ബുക്കില് പോസ്റ്റിട്ടത്.
'എന്റെ മോള് കരളിന്റെ ഒരു ഭാഗം. ഞാനും പോകും എന്റെ മോളുടെ അടുത്തേക്ക്. മോള് ഇപ്പോള് ഒറ്റയ്ക്കാണ്. എന്നും എന്നും ഞാനായിരുന്നു മോള്ക്കു തുണ. എന്തു പ്രശ്നമുണ്ടെങ്കിലും മോള് പപ്പാ എന്നൊരു വിളിയാണ്. അവിടെയെത്തും ഞാന്. മോള്ക്കു സോള്വ് ചെയ്യാന് പറ്റാത്ത എന്തു പ്രശ്നത്തിനും എന്നെ വിളിക്കും. പക്ഷേ, ഇതിനു മാത്രം വിളിച്ചില്ല. പപ്പെടെ ജീവന് കൂടി വേണ്ടെന്നു വിചാരിച്ചിട്ടുണ്ടാവും. പക്ഷേ, ഞാന് വിട്ടുകൊടുക്കാന് തയാറല്ല. ദൈവമായിട്ടു പിടിപാട് കുറവാണ്. എന്നാലും ഒന്നു ട്രൈ ചെയ്തു നോക്കാം'. ദില്ഷാദിന്റെ ഫേസ്ബുക്ക് പോസ്റ്റ് കണ്ട് ഞെട്ടിത്തരിച്ചിരിക്കുകയാണ് ബന്ധുക്കള്. എങ്ങനെ പിതാവിനെ ആശ്വസിപ്പിക്കണമെന്നറിയാതെ പതറുകയാണവര്.
അതേസമയം മോഫിയ പര്വീന് ആത്മഹത്യ ചെയ്ത സംഭവത്തില് അറസ്റ്റിലായ ഭര്ത്താവ് മുഹമ്മദ് സുഹൈല്, സുഹൈലിന്റെ മാതാവ് റുഖിയ, പിതാവ് യൂസഫ് എന്നിവരെ ഇന്ന് കോടതിയില് ഹാജരാക്കും. പ്രതികളെ തെളിവെടുപ്പിനും, കൂടുതല് ചോദ്യം ചെയ്യലിനുമായി പൊലീസ് കസ്റ്റഡിയില് ആവശ്യപ്പെടും.
കേസില് ആരോപണ വിധേയനായ സിഐ സിഎല് സുധീറിനെ സസ്പെന്ഡ് ചെയ്യണമെന്ന് ആവശ്യപ്പെട്ടുള്ള കോണ്ഗ്രസിന്റെ പൊലീസ് സ്റ്റേഷന് ഉപരോധം ഇപ്പോഴും തുടരുകയാണ്. സിഐയെ സസ്പെന്ഡ് ചെയ്യാതെ ഉപരോധം അവസാനിപ്പിക്കില്ലെന്ന നിലപാടിലാണ് കോണ്ഗ്രസ്. ഇതിന്റെ ഭാഗമായി ഇന്ന് രാവിലെ 11 മണിയോടെ എസ്പി ഓഫീസ് ഉപരോധിക്കും. അതേസമയം സിഐയോട് ഇന്ന് ഡിജിപിക്ക് മുന്നില് ഹാജരാകാനും നിര്ദേശിച്ചിട്ടുണ്ട്.
ആരോപണ വിധേയനായ ആലുവ സിഐ സിഎല് സുധീറിനെ സ്ഥലം മാറ്റുകയാണ് അധികൃതര് ചെയ്തത്. പൊലീസ് ആസ്ഥാനത്തേക്കാണ് സ്ഥലംമാറ്റം. ഡിഐജി തലത്തില് നടന്ന ചര്ച്ചയിലാണ് ധാരണയായത്. സിഐ സുധീറിനെ സസ്പെന്ഡ് ചെയ്യേണ്ടെന്ന തീരുമാനത്തിലാണ് ഉന്നത ഉദ്യോഗസ്ഥര്.
മോഫിയയുടെ ആത്മഹത്യയില് മനുഷ്യാവകാശ കമ്മിഷന് അന്വേഷണത്തിന് ഉത്തരവിട്ടു. നാലാഴ്ചയ്ക്കകം അന്വേഷണ റിപ്പോര്ട്ട് നല്കാന് ആലുവ റൂറല് എസ്പിക്ക് നിര്ദേശം നല്കി. കേസ് ഡിസംബര് 27ന് പരിഗണിക്കുമെന്ന് കമ്മിഷന് അധ്യക്ഷന് ജസ്റ്റിസ് ആന്റണി ഡൊമിനിക് അറിയിച്ചു.
ആലുവ സിഐ സിഎല് സുധീറിനെതിരെ പരാതിയുമായി കൂടുതല് പേര് രംഗത്തെത്തിയിരുന്നു. ഗാര്ഹിക പീഡന പരാതിയുമായി സമീപിച്ച യുവതിയെ സിഐ അപമാനിച്ചെന്നാണ് പരാതി. രാത്രി മുഴുവന് സ്റ്റേഷനില് ഇരിക്കേണ്ടിവന്നു. സിഐയുടേത് സ്ത്രീവിരുദ്ധ നിലപാടെന്നും പരാതിക്കാരി ആരോപിച്ചു. 'എടീ' എന്ന് വിളിച്ചാണ് പൊലീസ് ഉദ്യോഗസ്ഥന് ആക്രോശിച്ചു. ഗാര്ഹിക പീഡനവുമായി ബന്ധപ്പെട്ട് വനിതാ സെല്ലില് പരാതി നല്കിയിട്ടും നടപടി ഉണ്ടായിട്ടില്ലെന്നാണ് ആലുവ സ്വദേശിനിയുടെ ആരോപണം.
ഉത്ര കൊലക്കേസിന്റെ പ്രാഥമിക അന്വേഷണ ഉദ്യോഗസ്ഥനായിരുന്നു ആരോപണ വിധേയനായ സുധീര്. അന്വേഷണത്തില് വീഴ്ച വരുത്തിയെന്ന കണ്ടെത്തലിനെ തുടര്ന്നാണ് ഇദ്ദേഹത്തെ ആലുവയിലേക്ക് സ്ഥലം മാറ്റിയത്. അഞ്ചല് ഇടമുളയ്ക്കലില് മരിച്ച ദമ്പതിമാരുടെ ഇന്ക്വസ്റ്റ് റിപ്പോര്ട്ട് ഒപ്പിടാന് സ്വന്തം വീട്ടിലേക്ക് മൃതദ്ദേഹം എത്തിച്ച് ഇതിനു മുന്പും സുധീര് വിവാദം ഉണ്ടാക്കിയിട്ടുണ്ട്.
"
https://www.facebook.com/Malayalivartha
