ബൈക്കും ആംബുലന്‍സും കൂട്ടിയിടിച്ച് റോഡിലേക്ക് തെറിച്ചുവീണ് ബൈക്കിലുണ്ടായിരുന്ന യുവാവിനും വിദ്യാര്‍ത്ഥിക്കും ദാരുണാന്ത്യം. എം.സി റോഡ് പുല്ലുവഴി കനാല്‍പാലത്തിന് സമീപമാണ് അപകടമുണ്ടായത്. യുവാവും വിദ്യാര്‍ത്ഥിയും തത്ക്ഷണം മരിച്ചു.

മണ്ണൂര്‍ കൂരിക്കമാരില്‍ സാജു മാധവന്റെയും പരേതയായ കാര്‍ത്ത്യായനിയുടെയും മകന്‍ സനല്‍സാജുവും (20), മണ്ണൂര്‍ മണപ്പാട്ട് പുത്തന്‍പുരയില്‍ സുനിലിന്റെയും രാജിയുടെയും ഏക മകന്‍ ഹരികൃഷ്ണനുമാണ് (17) മരിച്ചത്.

ഇന്നലെ വൈകിട്ട് കനത്ത മഴയ്ക്കിടെ 7.30 ഓടെയായിരുന്നു അപകടം. സനല്‍ സാജു ചുമട്ടുതൊഴിലാളിയും ഹരികൃഷ്ണന്‍ കീഴില്ലം സെന്റ് തോമസ് ഹയര്‍ സെക്കന്‍ഡറി സ്‌കൂളില്‍ പ്‌ളസ് ടു വിദ്യാര്‍ത്ഥിയുമാണ്.

പെരുമ്പാവൂരില്‍ നിന്ന് മൂവാറ്റുപുഴ ഭാഗത്തേക്ക് പോവുകയായിരുന്നു ആംബുലന്‍സ്. രോഗിയെ ഇറക്കിയശേഷം മടങ്ങുംവഴി പുല്ലുവഴി കനാല്‍ പാലത്തിനും തായിക്കാട്ട് ചിറക്കും ഇടയിലാണ് അപകടമുണ്ടായത്.

ബൈക്കിലുള്ളവര്‍ റോഡിലേക്ക് മറിഞ്ഞുവീഴുന്നത് കണ്ടവരുണ്ട്. ഒരാളെ റോഡില്‍ നിന്ന് കണ്ടെത്തിയെങ്കിലും രണ്ടാമനെ കണ്ടെത്തിയിരുന്നില്ല പിന്നീട് ഇരുഭാഗത്ത് നിന്നുമെത്തിയ വാഹനയാത്രക്കാര്‍ നടത്തിയ പരിശോധനയിലാണ് അപകടസ്ഥലത്തുനിന്ന് ഇരുന്നൂറ് മീറ്റര്‍ മാറ്റി നിറുത്തിയ എര്‍ട്ടിഗ കാറിനടിയില്‍ ഉടക്കിയ നിലയില്‍ ഹരികൃഷ്ണനെ കണ്ടെത്തിയത്.

പിന്നില്‍ വന്ന കാറിന്റെ അടിയിലേക്ക് വീണ് കുരുങ്ങുകയായിരുന്നു. കാര്‍ പൊക്കിയാണ് പുറത്തെടുത്തത്. മൃതദേഹങ്ങള്‍ പെരുമ്പാവൂര്‍ താലൂക്ക് ആശുപത്രി മോര്‍ച്ചറിയിലേക്ക് മാറ്റി.