മുല്ലപ്പെരിയാര്‍ ഡാം പൊട്ടാവുന്ന വിധം അപകടാവസ്ഥയിലെന്ന് എംഎം മണി എംഎല്‍എ തുറന്നടിച്ചതോടെ മുഖ്യമന്ത്രി പിണറായി വിജയന് വായ തുറക്കാതിരിക്കാന്‍ പറ്റാതായിരിക്കുന്നു.



ശര്‍ക്കരയും ചുണ്ണാമ്പും ഉപയോഗിച്ച് നിര്‍മ്മിച്ച മുല്ലപ്പെരിയാര്‍ അണക്കെട്ടിന്റെ അകം കാലിയാണെന്നും സിമന്റും കമ്പിയും പൂശിയിട്ട് കാര്യമില്ലെന്നും മാത്രമല്ല അപകടാവസ്ഥയിലാണോന്ന് അറിയാന്‍ ഇനിയും തുരന്ന് നോക്കുന്നത് വിഡ്ഢിത്തമാണെന്നും എംഎം മണി തുറന്നടിച്ചിരിക്കുന്നു.

നെടുങ്കണ്ടത്ത് ഹൈറേഞ്ച് സംരക്ഷണ സമിതി സംഘടിപ്പിച്ച കര്‍ഷക ഉപവാസ സമരത്തില്‍ സംസാരിച്ച എംഎം മണിയുടെ മുന്നറിയിപ്പ് സംസ്ഥാന സര്‍ക്കാരിനുള്ള മുന്നറിയിപ്പുകൂടിയാണ്. മുല്ലപ്പെരിയാര്‍ അണക്കെട്ടിലെ ജലനിരപ്പ് 142 അടിയ്ക്കും മുകളിലെത്തിയതോടെ വണ്ടിപ്പെരായാറ്റിലും വള്ളക്കടവിലും വെള്ളപ്പൊക്കമുണ്ടായ ആശങ്കയുടെ സാഹചര്യത്തിലാണ് എംഎം മണി ധീരമായ നിലപാട് പുറത്തുവിട്ടിരിക്കുന്നത്.

വണ്ടിപ്പെരിയാറിന് മുകളില്‍ ജലബോംബായി മുല്ലപ്പെരിയാര്‍ നില്‍ക്കുകയാണ്. എന്തെങ്കിലും സംഭവിച്ചാല്‍ കേരളത്തിലുള്ളവര്‍ വെള്ളം കുടിച്ചും തമിഴ്‌നാട്ടുകാര്‍ വെള്ളം കുടിയ്ക്കാതെയും മരിക്കും. മുല്ലപ്പെരിയാര്‍ വിഷയത്തില്‍ തമിഴ്‌നാട് രാഷ്ട്രീയം കളിയ്ക്കുകയാണ്. ഇരു സംസ്ഥാനങ്ങളും ഒരുമിച്ച് തീരുമാനമെടുത്താല്‍ പ്രശ്‌നത്തിന് പരിഹാരം കാണാന്‍ സാധിക്കും.

പുതിയ അണക്കെട്ട് വേണമെന്നതാണ് സര്‍ക്കാര്‍ നിലപാട്. മുല്ലപ്പെരിയാര്‍ അണക്കെട്ടിലെ ജലനിരപ്പ് അനുവദനീയ സംഭരണ ശേഷിയായ 142 അടിയ്ക്കു മുകളിലെത്തിയതോടെ ജലനിരപ്പ് കുറക്കാന്‍ കൃത്യമായ മുന്നറിയിപ്പ് നല്‍കാതെ തമിഴ്‌നാട് വന്‍ തോതില്‍ വെള്ളം തുറന്നുവിട്ടതോടെ വിവിധ പ്രദേശങ്ങള്‍ വെള്ളത്തിലായിരിക്കുന്നത്. ഇതേത്തുടര്‍ന്ന് പെരിയാര്‍ നദിയില്‍ ജലനിരപ്പ് രണ്ടു മീറ്ററോളം ഉയര്‍ന്നിരിക്കുന്നു. പെരിയാര്‍ തീരത്തെ മഞ്ചുമല ആറ്റോരം ഭാഗങ്ങളില്‍ നിരവധി വീടുകളില്‍ വെള്ളം കയറുകയും ചെയ്തിരിക്കുന്നു.



മുന്നറിയിപ്പില്ലാതെ മുല്ലപ്പെരിയാറില്‍ നിന്ന് ജലം തുറന്നുവിട്ടതില്‍ കേരളം തമിഴ് നാടിനെ പ്രതിഷേധം അറിയതിനു പിന്നാലെയാണ് എംഎം മണി അണക്കെട്ടിന്റെ അപകടാവസ്ഥ പുറത്തുവിട്ടത്. താന്‍ മുല്ലപ്പെരിയാര്‍ അണക്കെട്ടിനുള്ളില്‍ പല തവണ കയറിയിട്ടുണ്ടെന്നും അകം ഏറെ അപകടാവസ്ഥയിലാണെന്നതിന് സാക്ഷിയാണെന്നും മണി വ്യക്തമാക്കുന്നു.



അണക്കെട്ടിന്റെ ഉള്ളില്‍ നിന്നും ഉറവപോലെ വെള്ളം പുറംതള്ളിക്കൊണ്ടിരിക്കുന്നു. ഇതോടകം നടത്തിയ അറ്റകുറ്റപ്പണികളൊന്നും ഡാം സുരക്ഷിതമെന്നു പറയാന്‍ പ്രാപ്തമല്ല. തമിഴ് നാടിന് വെള്ളം വേണം, ഒപ്പം കേരളത്തിന് സുരക്ഷയും. ഈ സാഹചര്യത്തില്‍ അടിയന്തിരമായ പുതിയ അണക്കെട്ട് പണിയണമെന്നാണ് മണി വ്യക്തമാക്കിയിരിക്കുന്നത്.

അതേസമയം മുന്നറിയിപ്പില്ലാതെ രാത്രിയില്‍ മുല്ലപ്പെരിയാര്‍ ഡാമിന്റെ ഷട്ടറുകള്‍ തമിഴ്നാട് തുറന്ന സംഭവത്തിലുള്ള പ്രതിഷേധം കേന്ദ്ര ജല കമ്മീഷനെ അറിയിക്കുമെന്ന് സംസ്ഥാന ജലവിഭവ വകുപ്പ് മന്ത്രി റോഷി അഗസ്റ്റിന്‍ പറഞ്ഞു.മുല്ലപ്പെരിയാര്‍ ഡാമില്‍ ഇപ്പോള്‍ അനുവദനീയ സംഭരണ ശേഷിയായ 142 അടി വെള്ളമുണ്ട്.

ജലനിരപ്പ് കുറയ്ക്കാന്‍ മുന്നറിയിപ്പ് നല്‍കാതെ തമിഴ്നാട് ഡാമില്‍ നിന്നും വെള്ളം അഴിച്ചുവിട്ടിരുന്നു. അണക്കെട്ടിന്റെ ഒമ്പത് ഷട്ടറുകളാണ് തുറന്നത്. ഇതേത്തുടര്‍ന്ന് പെരിയാര്‍ പുഴയില്‍ രണ്ട് മീറ്ററോളം വെള്ളം ഉയര്‍ന്നു.



ഇതേത്തുടര്‍ന്ന് പെരിയാര്‍ തീരത്തെ അഞ്ചുമല ആറ്റോരം ഭാഗത്തെ അഞ്ച് വീടുകളില്‍ വെള്ളം കയറിതായും റോഷി വ്യക്തമാക്കി. ഭയാനകമായ സ്ഥിതിവിശേഷത്തിലും ഭീതിയിലുമാണ് മുല്ലപ്പെരിയാര്‍. അണക്കെട്ടിലെ ജലനിരപ്പ് 142 അടിയിലെത്തിയതോടെ വള്ളക്കടവ് വണ്ടിപ്പെരിയാര്‍ മുതല്‍ ജനങ്ങള്‍ ഭീതിയില്‍ കഴിയുകയാണ്.