വിമുക്തഭടന് മണല് മാഫിയയില് നിന്നും സംരക്ഷണം നല്കാന് കോടതി ഉത്തരവ്... നദിയില് നിന്ന് മണല്ഖനനം എതിര്ത്തതിന് മണല് മാഫിയ വധ ഭീഷണി ഉയര്ത്തുകയായിരുന്നു, ആര്യനാട് പോലീസിനോട് ഹൈക്കോടതി ഉത്തരവിട്ടത്
നദിയില് നിന്ന് മണല് ഖനനം എതിര്ത്ത 83 കാരനായ വിമുക്തഭടന് മണല് മാഫിയയില് നിന്നും സംരക്ഷണം നല്കാന് ഹൈക്കോടതി ഉത്തരവിട്ടു. കാട്ടാക്കട സബ് ഡിവിഷനില് പെട്ട ആര്യനാട് പോലീസിനോടാണ് ഹൈക്കോടതി ജസ്റ്റിസ് ദേവന് രാമചന്ദ്രന് ഉത്തരവിട്ടത്.
വിമുക്ത ഭടനായ ആര്യനാട് കുറ്റിച്ചല് കാര്യോട് കട്ടക്കല് വീട്ടില് കരുണാകരനാണ് തന്റെയും കുടുംബത്തിന്റെയും ജീവനും സ്വത്തിനും പോലീസ് സംരക്ഷണം തേടി ഹൈക്കോടതിയെ സമീപിച്ചത്.
കാര്യോട് അണിയിലക്കടവ് ആറ്റില് നിന്ന് മണല് വാരുന്നതിനെതിരെയാണ് സ്ഥലവാസിയായ വാദി പരാതിപ്പെട്ടത്. മണലൂറ്റ് നദിയോട് ചേര്ന്നുള്ള തന്റെ വീടിനും കുടുംബത്തിന്റെ ജീവനും ഹാനി വരുത്തുന്നുവെന്നാണ് പരാതി. മണല് മാഫിയ കണ്ണിയായ കാര്യോട് കൊക്കോട്ടേല സ്വദേശിനി ഹണി റോസ് എന്ന രേണു (33) വിന്റെ നേതൃത്വത്തില് കൂട്ടാളികളാണ് വന്തോതില് മണലൂറ്റ് നടക്കുന്നതെന്നും ഹൈക്കോടതിയില് ബോധിപ്പിച്ചു.
വിമുക്തഭടന്റെ പരാതിയില് മണല് ഊറ്റ് തടഞ്ഞ് ജില്ലാ കളക്ടര് ഉത്തരവിട്ടിരുന്നു. ഉത്തരവ് ലംഘിച്ച് വീണ്ടും മണല് ഖനനം തുടരുകയും പരാതിക്കാരനെയും ഭാര്യയെയും ഭീഷണിപ്പെടുത്തുകയായിരുന്നു. ആര്യനാട് സര്ക്കിള് ഇന്സ്പെക്ടര് വാദിയുടെ വാസ സ്ഥലത്ത് ക്രമസമാധാനം ഉറപ്പുവരുത്തണമെന്നും രേണുവിന്റെ സംഘാംഗങ്ങള് അടക്കം ആരാലും യാതൊരു നിയമ ലംഘനങ്ങളും അനുവദിക്കരുതെന്നും ഹൈക്കോടതി ഉത്തരവിട്ടു.
https://www.facebook.com/Malayalivartha
