മുല്ലപ്പെരിയാര്‍ ബേബി ഡാമിന് സമീപം മരം മുറിക്കാന്‍ തമിഴ്‌നാടിന് അനുമതി നല്‍കിയ സംഭവം; ചീഫ് വൈല്‍ഡ് ലൈഫ് വാര്‍ഡന്‍ ബെന്നിച്ചന്‍ തോമസിന്റെ സസ്‌പെന്‍ഷന്‍ പിന്‍വലിച്ചു; സർക്കാർ നടപടി റിവ്യു കമ്മിറ്റി ശുപാർശയെ തുടർന്ന്
മുല്ലപ്പെരിയാര്‍ ബേബി ഡാമിന് സമീപം മരം മുറിക്കാന്‍ തമിഴ്‌നാടിന് അനുമതി നല്‍കിയ ചീഫ് വൈല്‍ഡ് ലൈഫ് വാര്‍ഡന്‍ ബെന്നിച്ചന്‍ തോമസിന്റെ സസ്‌പെന്‍ഷന്‍ പിന്‍വലിച്ചു. റിവ്യു കമ്മിറ്റി ശിപാര്‍ശ പ്രകാരമാണ് സസ്‌പെന്‍ഷന്‍ പിന്‍വലിച്ചത്.
മരം മുറി ഉത്തരവ് റദ്ദാക്കിയ സാഹചര്യത്തില്‍ സസ്‌പെന്‍ഷന്‍ തുടരേണ്ടതില്ല എന്നാണ് ശുപാര്‍ശ. ഇതനുസരിച്ചാണ് സസ്‌പെന്‍ഷന്‍ പിന്‍വലിച്ചത്. മുല്ലപ്പെരിയാറില്‍ ഇനി തീരുമാനങ്ങള്‍ വനം മേധാവിയുമായി ആലോചിച്ചു മാത്രം കൈക്കൊള്ളണം എന്നും നിര്‍ദേശമുണ്ട്. മരം മുറിയില്‍ കൂടുതല്‍ ഉദ്യോഗസ്ഥരുടെ പങ്കില്‍ അന്വേഷണം അവസാനിക്കും മുന്നേയാണ് സസ്‌പെന്‍ഷന്‍ പിന്‍വലിച്ചത്.
മുല്ലപ്പെരിയാറിലെ എല്ലാ തീരുമാനങ്ങളും സര്‍ക്കാരിനെ അറിയിക്കണമെന്ന് ബെന്നിച്ചന്‍ തോമസിന് നിര്‍ദേശം നല്‍കി. ബേബി ഡാമിന് സമീപമുള്ള 15 മരങ്ങള്‍ മുറിക്കാന്‍ അനുമതി നല്‍കിയത് വലിയ രാഷ്ട്രീയ വിവാദങ്ങളിലേക്ക് നയിച്ചിരുന്നു. ഇതിനെ തുടര്‍ന്ന് കഴിഞ്ഞ മാസം 11 നാണ് ബെന്നിച്ചന്‍ തോമസിനെതിരെ സര്‍ക്കാര്‍ നടപടിയെടുത്തത്. വിവാദ മരം മുറി ഉത്തരവ് നേരത്തെ സര്‍ക്കാര്‍ പിന്‍വലിച്ചിരുന്നു.
https://www.facebook.com/Malayalivartha
