പെരുവന്താനം അമലഗിരിയില്‍ അയ്യപ്പ ഭക്തരുടെ ഇടയിലേക്ക് തീര്‍ഥാടകരുടെ തന്നെ ബസ് ഇടിച്ചു കയറി രണ്ട് പേര്‍ മരിച്ചു. ആന്ധ്ര സ്വദേശികളാണ് മരിച്ചത്. മൂന്നു തീര്‍ഥാടകര്‍ക്ക് പരുക്കേറ്റു. നിര്‍ത്തിയിട്ടിരുന്ന ട്രാവലറിന്‍റെ പുറകില്‍ നിന്നിരുന്നവരുടെ ഇടയിലേക്കാണ് ബസിടിച്ച്‌ കയറിയത്. ആന്ധ്രാപ്രദേശ് സ്വദേശികളായ ആദി നാരായണ നായിഡു (44), ഈശ്വര്‍ (42) എന്നിവരാണ് മരിച്ചത്. ആന്ധ്രാപ്രദേശില്‍നിന്നും ശബരിമലയിലേക്ക് പോകുകയായിരുന്നു തീര്‍ഥാടകര്‍.

ഇരു വാഹനങ്ങളും തീര്‍ഥാടകര്‍ സഞ്ചരിച്ചിരുന്നതാണ്. ഒരുകാറുമായി കൂട്ടിമുട്ടിയതിനെ തുടര്‍ന്ന് ട്രാവലര്‍ നിര്‍ത്തി, അതിലുണ്ടായിരുന്നവര്‍ പുറത്തിറങ്ങി നില്‍ക്കുകയായിരുന്നു. ഇവര്‍ക്കിടയിലേക്കാണ് ബസിടിച്ച്‌ കയറിയത്. എതിരെവന്ന ലോറിയെ ഇടിക്കാതിരിക്കാന്‍ ബസ് വെട്ടിക്കുന്നതിനിടെയാണ് അപകടമുണ്ടായത്. മൃതദേഹങ്ങള്‍ കാഞ്ഞിരപ്പള്ളി ജനറല്‍ ആശുപത്രിയില്‍ പ്രവേശിപ്പിച്ചു.