ആരും കണ്ണുരുട്ടാനോ വിമര്‍ശിക്കാനോ ധൈര്യമില്ലാത്തതാണ് മുഖ്യമന്ത്രി പിണറായി വിജയന്‍ കൈകാര്യം ചെയ്യുന്ന ആഭ്യന്തര വകുപ്പ്. ഇപ്പോഴിതാ സ്വന്തം മുഹമ്മദ് റിയാസ് പോലീസുകാരെ പരസ്യമായി വിമര്‍ശിച്ചിരിക്കുകയാണ്. സര്‍ക്കാരിനൊപ്പം നിന്ന് സര്‍ക്കാരിന് അള്ളുവയ്ക്കുന്ന നടപടി അനുവദിക്കില്ലെന്നും ഒരു തരത്തിലും ഇത്തരം നടപടികള്‍ പ്രോത്സാഹിപ്പിക്കാനാകില്ലെന്നും മന്ത്രി മുഹമ്മദ് റിയാസ് പറഞ്ഞു.

പൊലീസ് സംവിധാനത്തില്‍ മാറ്റം വരേണ്ടതുണ്ട്. സര്‍ക്കാര്‍ നിലപാടിനു വിരുദ്ധമായാണോ നടന്നതെന്നു പരിശോധിക്കണം. മറ്റൊരു വകുപ്പുമായി ബന്ധപ്പെട്ട കാര്യമാണ്. വിഷയം വകുപ്പു മേധാവിയുടെ ശ്രദ്ധയില്‍പെടുത്തി. അന്വേഷണം നടത്തി നടപടി സ്വീകരിക്കും. നടന്നതു ദൗര്‍ഭാഗ്യകരമായ സംഭവമാണെന്നും ടൂറിസം മേഖലയെ തകര്‍ക്കുന്ന നടപടിയാണെന്നും റിയാസ് പറഞ്ഞു.

വിനോദസഞ്ചാര കേന്ദ്രങ്ങളില്‍ 'പൊളൈറ്റ് പൊലീസിങ്' സംവിധാനമാണ് വേണ്ടതെന്ന് മുഹമ്മദ് റിയാസ് പിന്നീടു കോഴിക്കോട്ടു പ്രതികരിച്ചു. കോവളത്തു നടന്നത് ഒറ്റപ്പെട്ട സംഭവമായിരിക്കാം. എന്നാല്‍ അത്തരത്തില്‍ ഒറ്റപ്പെട്ട സംഭവങ്ങള്‍ പോലും പാടില്ല. കോവിഡ് നിയന്ത്രണങ്ങള്‍ക്കുശേഷം വിദേശ വിനോദ സഞ്ചാരികള്‍ കേരളത്തിലേക്ക് ഒഴുകിയെത്തേണ്ട കാലമാണിത്. വിദേശ സഞ്ചാരികളോട് മാന്യമായി പെരുമാറാന്‍ പൊലീസ് തയാറാവണം. വിനയത്തോടെയാവണം വിദേശസഞ്ചാരികളോട് പെരുമാറേണ്ടത്. പൊതുജനങ്ങളും യുവജനസംഘടനകളും അതിഥി ദേവോ ഭവ എന്ന മനോഭാവത്തോടെ ഒരുമിച്ചു നില്‍ക്കണം.

അതിനിടെ വിദേശിക്ക് നേരെ തിരിഞ്ഞ എസ്‌ഐയെ സസ്‌പെന്‍ഡ് ചെയ്തതിനെതിരെ പോലീസ് അസോസിയേഷന്‍ രംഗത്തെത്തി. ഇതിനെതിരേയും റിയാസ് പ്രതികരിച്ചു. പൊലീസ് അസോസിയേഷന്റെ ആരോപണങ്ങളില്‍ താനല്ല മറുപടി പറയേണ്ടത്. വിദേശിയുടെ ഭാഗത്ത് തെറ്റുണ്ടോ, പൊലീസിനാണോ വീഴ്ച പറ്റിയത് തുടങ്ങിയ കാര്യങ്ങള്‍ അന്വേഷിച്ച് നടപടിയെടുക്കേണ്ടത് ആഭ്യന്തര വകുപ്പാണെന്നും മന്ത്രി റിയാസ് വ്യക്തമാക്കി. ബേപ്പൂര്‍ ഫെസ്റ്റില്‍ ഒരു പെറ്റിക്കേസ് പോലും പൊലീസ് എടുത്തിട്ടില്ല. വിനോദസഞ്ചാരികളോട് പൊലീസിന്റെ നല്ല പെരുമാറ്റത്തിന് ബേപ്പൂര്‍ മാതൃകയാണ്. ഈ ബേപ്പൂര്‍ മാതൃക എല്ലായിടത്തും നടപ്പാക്കണമെന്നും റിയാസ് പറഞ്ഞു.



അതിനിടെ വിദേശി താമസിക്കുന്ന കോവളത്ത് മന്ത്രി വി.ശിവന്‍കുട്ടി പറന്നെത്തി സ്‌കോര്‍ ചെയ്തു. മദ്യം ഒഴുക്കിക്കളയേണ്ടിവന്ന സ്വീഡിഷ് പൗരന്‍ മന്ത്രി വി.ശിവന്‍കുട്ടിയെ കണ്ടു. കോവളത്തു നടന്നതു തികച്ചും ഒറ്റപ്പെട്ട സംഭവമെന്നു മന്ത്രി വി.ശിവന്‍കുട്ടി പറഞ്ഞു. സംസ്ഥാനത്തു പൊലീസ് കാര്യക്ഷമമായി പ്രവര്‍ത്തിക്കുന്നുണ്ട്. സര്‍ക്കാരിനെ അള്ളുവയ്ക്കാന്‍ പൊലീസിലെ ചിലര്‍ ശ്രമിക്കുന്നുവെന്ന മന്ത്രി മുഹമ്മദ് റിയാസിന്റെ പ്രസ്താവന ശ്രദ്ധയില്‍പെട്ടിട്ടില്ലെന്നും ശിവന്‍കുട്ടി പറഞ്ഞു.

സംഭവത്തില്‍, കോവളം പൊലീസ് സ്‌റ്റേഷനിലെ ഗ്രേഡ് എസ്‌ഐ ഷാജിയെ സസ്‌പെന്‍ഡു ചെയ്തിരുന്നു. ഡിജിപി അനില്‍കാന്തിന്റെ നിര്‍ദേശത്തിലാണു നടപടി. സ്‌റ്റേഷന്‍ ഹൗസ് ഓഫിസര്‍ക്കു വീഴ്ച പറ്റിയിട്ടുണ്ടോ എന്നും പരിശോധിക്കും. സംഭവത്തില്‍ മുഖ്യമന്ത്രി പിണറായി വിജയന്‍ പൊലീസിനോട് റിപ്പോര്‍ട്ട് തേടിയിരുന്നു.


കഴിഞ്ഞ ദിവസം ഉച്ചയ്ക്ക് കോവളത്തുവച്ചാണു ബവ്‌കോ മദ്യവില്‍പന കേന്ദ്രത്തില്‍നിന്നു അനുവദനീയ അളവില്‍ വാങ്ങിയ മദ്യവുമായി പോയ സ്വീഡിഷ് പൗരന്‍ സ്റ്റീവനെ ബില്‍ ചോദിച്ച് പൊലീസ് തടഞ്ഞത്. ബില്‍ ഇല്ലാതെ മദ്യം കൊണ്ടുപോകാന്‍ കഴിയില്ലെന്നു പൊലീസ് പറഞ്ഞതോടെ സ്റ്റീവന്‍ രണ്ടു കുപ്പി മദ്യം റോഡില്‍ ഒഴുക്കി. തിരികെ പോയി ബില്ലുമായി വന്നശേഷമാണു മൂന്നാമത്തെ കുപ്പി കൊണ്ടു പോകാന്‍ പൊലീസ് അനുവദിച്ചത്.

അതേസമയം പാര്‍ട്ടി പറയുന്നവരെ പൊലീസിന്റെ തലപ്പത്തു വച്ചതിന്റെ ഗതികേടാണ് ഇപ്പോള്‍ നടക്കുന്നതെന്നു പ്രതിപക്ഷ നേതാവ് വി.ഡി.സതീശന്‍ ആരോപിച്ചു. പൊലീസിനു നിയന്ത്രണം നഷ്ടപ്പെട്ടിരിക്കുകയാണ്. ജില്ലാ സൂപ്രണ്ടുമാരെ നിയന്ത്രിക്കുന്നത് സിപിഎം ജില്ലാ കമ്മിറ്റികളാണെന്നും സതീശന്‍ പറഞ്ഞു.