ഭാര്യയെയും മക്കളെയും കൊലപ്പെടുത്തിയ പൂക്കച്ചവടക്കാരന്‍ അടുപ്പക്കാര്‍ക്കെല്ലാം പ്രിയങ്കരന്‍.... പുതുവത്സരാശംസാ സന്ദേശങ്ങള്‍ക്ക് പിന്നാലെ ,വാട്ട്‌സ്ആപ്പില്‍ 'സോറി'... സാമ്പത്തിക പ്രതിസന്ധി ഇയാളെ ക്രൂരകൃത്യത്തിന് പ്രേരിപ്പിച്ചെന്ന് പോലീസ്....


പ്രണയിച്ച് വിവാഹിതരായവരാണ് തമിഴ്‌നാട്ടുകാരനായ പൂക്കച്ചവടക്കാരനും മലയാളിയായ ജോയമോളും. ഇവര്‍ക്ക് രണ്ടു ആണ്‍മക്കളാണ്. ലക്ഷ്മികാന്ത് നാരായണനും (8), അശ്വന്ത് നാരായണനും. പക്ഷെ സാമ്പത്തിക പ്രതിസന്ധി നാരായണനെ ഭാര്യയേയും രണ്ട് പിഞ്ചു കുഞ്ഞുങ്ങളേയും കൊലപ്പെടുത്താന്‍ പ്രേരിപ്പിച്ചു. ഉറക്കഗുളിക നല്‍കി മയക്കിയ ശേഷം കഴുത്തില്‍ ഷൂലേസ് ചുറ്റിമുറുക്കി ശ്വാസം മുട്ടിച്ചു കൊന്നു.

തുടര്‍ന്ന് ഞരമ്പ് മുറിച്ച് ആത്മഹത്യയ്ക്ക് ശ്രമിച്ച ഇയാള്‍ ഗുരുതരാവസ്ഥയിലായി. എറണാകുളം കടവന്ത്ര കെ.പി.വള്ളോന്‍ റോഡ് മട്ടമ്മല്‍ ടെമ്പിള്‍ ലൈനില്‍ വാടകയ്ക്ക് താമസിക്കുന്ന തമിഴ്‌നാട് കൃഷ്ണഗിരി ജില്ലക്കാരനായ നാരായണനാണ് (41) ഭാര്യ ജോയമോള്‍ (33), മക്കളായ ലക്ഷ്മികാന്ത് നാരായണന്‍ (8), അശ്വന്ത് നാരായണന്‍ (4) എന്നിവരെ കൊന്നത്. എറണാകുളം നഗരത്തിലെ പ്രമുഖ പൂമൊത്ത വ്യാപാര സ്ഥാപനമായ മാതാ ഫ്‌ളവറിസ്റ്റ് ഉടമയാണ് നാരായണന്‍.

ഇന്നലെ രാവിലെ ജോയമോളെ സഹോദരിയും ഭര്‍ത്താവും പലവട്ടം വിളിച്ചിട്ടും പ്രതികരണമില്ലാത്തതിനെ തുടര്‍ന്ന് നാരായണനെ ബന്ധപ്പെട്ടപ്പോള്‍ ജയ ഉറങ്ങുകയാണെന്നായിരുന്നു മറുപടി.

സംശയം തോന്നി ബന്ധു എത്തുമ്പോള്‍ കഴുത്തില്‍നിന്ന് രക്തം വാര്‍ന്ന നിലയില്‍ നാരായണന്‍ കസേരയിലിരിക്കുകയായിരുന്നു. ജോയമോളെയും മക്കളെയും മരിച്ച നിലയില്‍ കിടപ്പുമുറിയിലും കണ്ടെത്തി. മൃതദേഹങ്ങള്‍ കളമശേരി മെഡിക്കല്‍ കോളേജാശുപത്രി മോര്‍ച്ചറിയില്‍. പോസ്റ്റ്‌മോര്‍ട്ടം ഇന്ന് നടക്കും.

ബംഗളുരു, ഊട്ടി, മൂവാറ്റുപുഴ, പാലാ, ഏറ്റുമാനൂര്‍ എന്നിവിടങ്ങളില്‍ പൂക്കടകളുണ്ടായിരുന്ന നാരായണന്‍ കുറച്ചുനാളായി സാമ്പത്തിക പ്രതിസന്ധിയിലായിരുന്നു. ആറ് ലക്ഷം രൂപ കടബാദ്ധ്യതയുള്ളതായി നാരായണന്‍ പൊലീസിനോട് പറഞ്ഞു.


എറണാകുളത്തെ പലരില്‍ നിന്നും കടം വാങ്ങിയിട്ടുണ്ട്.കടവന്ത്ര ജംഗ്ഷനിലെ പൂക്കടയ്ക്ക് മാസവാടക അമ്പതിനായിരം രൂപയാണ്. വീട്ടുവാടക 14000 രൂപ. ജീവനക്കാരുടെ ശമ്പളം പുറമേ. കൊവിഡ് സാഹചര്യത്തില്‍ പൂക്കച്ചവടം കുറഞ്ഞതോടെ കടത്തിലായി ജീവിതം. ലോക്ക് ഡൗണിന് പിന്നാലെ കച്ചവടം പുനരാരംഭിച്ചെങ്കിലും കാര്യമായ മുന്നേറ്റമുണ്ടായില്ല.ലോട്ടറി ഏജന്‍സി തുടങ്ങിയെങ്കിലും അതിലും പരാജയപ്പെട്ടു. റിസോര്‍ട്ട് വാങ്ങാനും ശ്രമിച്ചിരുന്നു. ഇതാകും കടബാദ്ധ്യതയിലേക്ക് നയിച്ചതെന്ന ഊഹത്തിലാണ് സുഹൃത്തുക്കളും നാട്ടുകാരും.

ഭാര്യയുടെയും മക്കളുടെയും മരണം ഉറപ്പാക്കിയ ശേഷമാണ് നാരായണന്‍ ആത്മഹത്യാശ്രമം നടത്തിയത്. കഴുത്തിലും രണ്ട് കൈകളിലും ഇടതു കണങ്കാലിലുമുള്ള ഞരമ്പുകള്‍ ബ്‌ളേഡു കൊണ്ട് മുറിച്ച നിലയിലാണ്. മെഡിക്കല്‍ ട്രസ്റ്റ് ആശുപത്രിയില്‍ അടിയന്തരച ികിത്സയ്ക്കുശേഷം എറണാകുളം ജനറല്‍ ആശുപത്രിയിലേക്ക് മാറ്റി. കസ്റ്റഡിയിലുള്ള ഇയാള്‍ക്കെതിരെ കൊലക്കുറ്റത്തിന് പൊലീസ് കേസെടുത്തിട്ടുണ്ട്.

നാരായണന്‍ ഭാര്യയെയും മക്കളെയും കൊലപ്പെടുത്തിയെന്ന വാര്‍ത്ത കടവന്ത്രയെ നടുക്കി. പുതുവര്‍ഷരാവില്‍ സമീപത്തെ വീടുകളിലെ കുട്ടികള്‍ക്കൊപ്പം കളിച്ചിരുന്ന കുഞ്ഞുങ്ങള്‍ ഇനിയില്ലെന്ന സത്യം വിശ്വസിക്കാനാവാതെ കടവന്ത്രയിലെ നാട്ടുകാര്‍.