നമ്മള് കണ്ട് പഠിക്കണം... നല്ല കാര്യം പറഞ്ഞിട്ടും ഭീഷണിപ്പെടുത്തിയിട്ടും നമ്മുടെ സംസ്ഥാനത്ത് വാക്സിനോട് വിമുഖത കാട്ടുന്ന പഠിപ്പും വിവരവുമുള്ള അധ്യാപകര് ആയിരക്കണക്കിന് വരും; പല കാരണം പറഞ്ഞ് വാക്സിന് എടുക്കാത്തവര്ക്ക് ശക്തമായ നടപടിയുമായി ഗള്ഫ് രാജ്യം; കോവിഡ് വാക്സിന് സ്വീകരിക്കാത്തവര്ക്ക് യാത്രാവിലക്ക്
സംസ്ഥാനത്ത് ഇനിയും വാക്സിനെടുക്കാത്ത പതിനായിരക്കണക്കിന് പേരുണ്ട്. ചിലര് അന്ധവിശ്വാസത്തിന്റെ പേരിലാണ് വാക്സിന് എടുക്കാത്തത്. അതില് തന്നെ ആയിരക്കണക്കിന് അധ്യാപകരും വരും. സര്ക്കാര് ഭീഷണിപ്പെടുത്തിയിട്ട് വരെ ഇനിയും ധാരാളം പേര് എടുക്കാനുണ്ട്.
അതൊക്കെ നമ്മുടെ നാട്ടില് നടക്കും. അങ്ങ് ഗള്ഫില് അങ്ങനെയല്ല. എടുക്കാന് പറഞ്ഞാല് എടുത്തിരിക്കും. അത് അവിടത്തെ പൗരനാണെങ്കിലും ശരി മലയാളിയാണെങ്കിലും ശരി. മലയാളികള് ഏറെയുള്ള യുഎഇയാണ് നിയന്ത്രണം ഏര്പ്പെടുത്തിയത്.
കോവിഡ് കേസുകള് വര്ദ്ധിക്കുന്ന പശ്ചാത്തലത്തില് യു.എ.ഇ പൗരന്മാര്ക്ക് യാത്രാ നിയന്ത്രണം പ്രഖ്യാപിച്ചു. കോവിഡ് വാക്സിന് സ്വീകരിക്കാത്ത പൗരന്മാര്ക്കാണ് യു.എ.ഇയില് വിദേശയാത്രാ വിലക്ക് ഏര്പ്പെടുത്തിയത്. ജനുവരി 10ന് നിരോധനം പ്രാബല്യത്തില് വരും.
പൂര്ണമായും വാക്സിന് സ്വീകരിച്ചവര് ബൂസ്റ്റര് ഡോസും എടുക്കണമെന്ന് നാഷണല് ക്രൈസിസ് ആന്ഡ് എമര്ജന്സി മാനേജ്മെന്റ് അതോറിട്ടിയും വിദേശകാര്യ അന്താരാഷ്ട്ര സഹകരണ മന്ത്രാലയവും അറിയിച്ചു. മെഡിക്കല് കാരണങ്ങളാല് ഒഴിവാക്കിയവര്, മാനുഷിക പരിഗണന അര്ഹിക്കുന്നവര്, ചികിത്സ ആവശ്യങ്ങള്ക്കായി യാത്ര ചെയ്യുന്നവര് എന്നിവര്ക്ക് വാക്സിന് എടുക്കുന്നതില് ഇളവുണ്ട്.
അതേ സമയം സംസ്ഥാനത്ത് 15 മുതല് 18 വയസുവരെയുള്ള കുട്ടികളുടെ കോവിഡ് വാക്സിനേഷന് നാളെ ആരംഭിക്കുകയാണ്. ഈ പശ്ചാത്തലത്തില് ആക്ഷന്പ്ലാന് രൂപീകരിച്ചതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. വകുപ്പുതല, ജില്ലാതല, സംസ്ഥാനതല മീറ്റിംഗുകള് ചേര്ന്ന ശേഷമാണ് ആക്ഷന് പ്ലാന് രൂപീകരിച്ചത്. മന്ത്രിയുടെ നേതൃത്വത്തില് നടന്ന ഉന്നതതല യോഗത്തിലാണ് ആക്ഷന് പ്ലാനിന് അന്തിമ രൂപം നല്കിയത്. നിലവിലെ 18 വയസിന് മുകളിലുള്ളവരുടെ വാക്സിനേഷന്, കുട്ടികളുടെ വാക്സിനേഷന് എന്നിവ ഫലപ്രദമായി നടപ്പിലാക്കാന് വേണ്ടിയാണ് ആക്ഷന് പ്ലാന് തയ്യാറാക്കിയത്. കുട്ടികള്ക്കും മുതിര്ന്നവര്ക്കുമുള്ള പ്രത്യേക വാക്സിനേഷന് ടീമിനെ തയ്യാറാക്കുന്നതാണ്. കുട്ടികള്ക്കുള്ള വാക്സിനേഷനുള്ള രജിസ്ട്രേഷന് ആരംഭിച്ചത്.
കുട്ടികള്ക്കുള്ള വാക്സിനേഷന്
വാക്സിന്റെ ലഭ്യതയ്ക്കനുസരിച്ച് 15 മുതല് 18 വയസുവരെയുള്ള കുട്ടികള്ക്കുള്ള വാക്സിനേഷന് എത്രയും വേഗം പൂര്ത്തിയാക്കുന്നതാണ്. കുട്ടികളുടെ പ്രത്യേക വാക്സിനേഷന് കേന്ദ്രങ്ങളില് കോവാക്സിന് മാത്രമാകും നല്കുക. ജനുവരി 10 വരെ ബുധനാഴ്ച ഒഴികെ ഞായറാഴ്ച ഉള്പ്പെടെ എല്ലാ ദിവസവും ജനറല്/ജില്ലാ/താലൂക്ക്/സിഎച്ച്സി എന്നിവിടങ്ങളില് കുട്ടികള്ക്കുള്ള വാക്സിനേഷന് ഉണ്ടായിരിക്കും. കുട്ടികളുടെ വാക്സിനേഷനായി പ്രത്യേക വാക്സിനേഷന് കേന്ദ്രങ്ങള് ഈ ആശുപത്രികളിലുണ്ടാകും. എല്ലാ പ്രാഥമികാരോഗ്യ കേന്ദ്രങ്ങളിലും കുടുംബാരോഗ്യ കേന്ദ്രങ്ങളിലും ബുധനാഴ്ചയൊഴികെ ഞായറാഴ്ച ഉള്പ്പെടെ 4 ദിവസങ്ങളില് കുട്ടികളുടെ വാക്സിനേഷന് കേന്ദ്രം പ്രവര്ത്തിക്കും.
കുട്ടികളുടെ വാക്സിനേഷന് കേന്ദ്രങ്ങള് പെട്ടെന്ന് തിരിച്ചറിയാനായി പിങ്ക് നിറത്തിലുള്ള ബോര്ഡ് പ്രദര്ശിപ്പിക്കുന്നതാണ്. ഈ ബോര്ഡുകള് വാക്സിനേഷന് കേന്ദ്രത്തിന്റെ പ്രവേശന കവാടം, രജിസ്ട്രേഷന് സ്ഥലം, വാക്സിനേഷന് സ്ഥലം എന്നിവിടങ്ങളില് പ്രദര്ശിപ്പിക്കും.
സ്മാര്ട്ട് ഫോണോ ഇന്റര്നെറ്റുള്ള കമ്പ്യൂട്ടര് ഉപയോഗിച്ചോ കോവിന് പോര്ട്ടലില് രജിസ്റ്റര് ചെയ്ത് വാക്സിനേഷനായി പോകുന്നതായിരിക്കും നല്ലത്. സ്വന്തമായി രജിസ്റ്റര് ചെയ്യാന് കഴിയാത്ത കുട്ടികളെ വിദ്യാഭ്യാസ വകുപ്പ് സഹായിക്കാമെന്നറിയിച്ചിട്ടുണ്ട്. ഭാവിയില് ഉണ്ടായേക്കാവുന്ന ബുദ്ധിമുട്ടുകള് ഒഴിവാക്കാന് രജിസ്റ്റര് ചെയ്യുമ്പോള് കൃത്യമായ വിവരങ്ങള് രേഖപ്പെടുത്തേണ്ടതാണ്.
മുതിര്ന്നവരുടെ വാക്സിനേഷന്
ബുധനാഴ്ചയും ഞായറാഴ്ചയും ഒഴികെയുള്ള എല്ലാ ദിവസവും ജനറല്/ജില്ലാ/താലൂക്ക്/സിഎച്ച്സി എന്നിവിടങ്ങളില് 18 വയസിന് മുകളിലുള്ളവര്ക്കായി പ്രത്യേക വാക്സിനേഷന് കേന്ദ്രം ഉണ്ടായിരിക്കുന്നതാണ്. എല്ലാ പ്രാഥമികാരോഗ്യ കേന്ദ്രങ്ങളിലും കുടുംബാരോഗ്യ കേന്ദ്രങ്ങളിലും തിങ്കള്, വ്യാഴം ദിവസങ്ങളില് ഇവര്ക്കുള്ള വാക്സിനേഷന് സെന്റര് പ്രവര്ത്തിക്കും. മുതിര്ന്നവരുടെ വാക്സിനേഷന് കേന്ദ്രം തിരിച്ചറിയാനായി നീല നിറത്തിലുള്ള ബോര്ഡായിരിക്കും സ്ഥാപിക്കുക.
https://www.facebook.com/Malayalivartha
