പൊലീസുകാരന്റെ വീടിന്റെ ജനല്‍ച്ചില്ലുകളും വാതിലും അടിച്ചുതകര്‍ത്ത് സാമൂഹികവിരുദ്ധരുടെ ആക്രമണം. വാതില്‍ക്കലില്‍ മലമൂത്രവിസര്‍ജനം നടത്തി. ചുമരില്‍ 'മിന്നല്‍ മുരളി ഒറിജിനല്‍' എന്നും എഴുതിയിട്ടുണ്ട്. കുമരകത്താണ് വീടിന് നേരേ ആക്രമണമുണ്ടായത്. ശൗചാലയം ഇവര്‍ തല്ലിത്തകര്‍ത്തു. വീട് ആക്രമിച്ച ആ 'മിന്നല്‍ മുരളി'യെ തേടുകയാണ് പൊലീസ്.

പൊലീസ് ഉദ്യോഗസ്ഥനായ ചെപ്പന്നൂക്കരി ചെമ്പിത്തറ ഷാജിയുടെ വീടാണ് ഇത്. കോട്ടയം റെയില്‍വേ സ്റ്റേഷനിലെ പൊലീസുകാരനായ ഷാജിയും കുടുംബവും വെച്ചൂരാണ് ഇപ്പോള്‍ താമസം. രണ്ട് ലക്ഷത്തോളം രൂപയുടെ നഷ്ടം സാമൂഹിക വിരുദ്ധരുടെ ആക്രമണം കാരണം വീടിനുണ്ടായിട്ടുണ്ടെന്നാണ് ഷാജി പറയുന്നത്.

രണ്ടാഴ്ച മുന്‍പ് ഇവിടെ മദ്യപിക്കാനെത്തിയ യുവാക്കളെ വീട്ടുടമ വിലക്കിയിരുന്നു. കഴിഞ്ഞരാത്രി കുമരകം പൊലീസ് പരിശോധന നടത്തുമ്പോള്‍ ഇവിടെ മദ്യപാനികളെ കണ്ടെത്തുകയും ഓടിക്കുകയും ചെയ്തിരുന്നു. ഇതിന്റെ പ്രതികാരമാണ് വീടാക്രമണമെന്നാണ് പൊലീസിന്റെ നിഗമനം. സംഭവസ്ഥലത്ത് ഇവരുടെ ബൈക്കുകള്‍ ഉണ്ടായിരുന്നെന്നും പ്രതികളെ കണ്ടെത്താനാകുമെന്നും കുമരകം പൊലീസ് പറയുന്നു.

അതേസമയം പ്രദേശത്ത് സാമൂഹ്യവിരുദ്ധരുടെ അഴിഞ്ഞാട്ടമാണ് നടക്കുന്നത് എന്ന് പ്രദേശവാസികള്‍ പരാതിപ്പെടുന്നു നാട്ടുകാര്‍ അറിയിച്ചതിനെ തുര്‍ന്നാണ് ഷാജി വിവരം അറിയുന്നത്. പുതുവര്‍ഷത്തലേന്ന് ഈ ഭാഗത്ത് പട്രോളിങ് നടത്തിയപ്പോള്‍ സംശയകരമായി കണ്ട ബൈക്കുകളുടെ നമ്ബര്‍ കുറിച്ചെടുത്തിരുന്നതായി പൊലീസ് പറഞ്ഞു. പരാതി ലഭിച്ചെന്നും പ്രതികളെക്കുറിച്ച്‌ അന്വേഷണം നടക്കുകയാണെന്നും എസ്‌ഐ എസ്.സുരേഷ് പറഞ്ഞു.

മലയാളികളുടെ ആദ്യ സൂപ്പര്‍ ഹീറോയായ മിന്നല്‍ മുരളി ജനഹൃദയം കീഴടക്കിയിരിക്കുകയാണ്. മിന്നലടിച്ച്‌ സൂപ്പര്‍ പവറുകള്‍ കിട്ടുന്ന രണ്ട് കഥാപാത്രങ്ങളുടെ കഥ പറയുന്ന സിനിമ ഇപ്പോള്‍ നവമാധ്യമങ്ങളില്‍ ഉള്‍പ്പെടെ ചര്‍ച്ചയായിക്കഴിഞ്ഞു. എന്നാല്‍ ശരിക്കും ഒരാള്‍ക്ക് മിന്നലടിച്ചാല്‍ എന്തായിരിക്കും അവസ്ഥ എന്നതുള്‍പ്പെടെ ചര്‍ച്ചകള്‍ക്കുണ്ട്. ഇതിനിടയിലാണ് കുമരകത്ത് മിന്നല്‍ മുരളിയുടെ ഒര്‍ജിനല്‍ ആക്രമണം.