സംസ്ഥാനത്ത് പുതുവര്‍ഷാഘോഷങ്ങളുടെ നിയന്ത്രണത്തിനും ഒമിക്രോണ്‍ വ്യാപന സാദ്ധ്യത കുറയ്‌ക്കുന്നതിനും പ്രഖ്യാപിച്ച രാത്രികാല നിയന്ത്രണങ്ങള്‍ നീട്ടില്ല. ഇപ്പോള്‍ നിലവിലുള‌ള നിയന്ത്രണങ്ങള്‍ തിങ്കളാഴ്‌ച പുലര്‍ച്ചെ അവസാനിക്കും. ഡിസംബര്‍ 30 മുതല്‍ ജനുവരി രണ്ട് വരെയാണ് രാത്രികാല നിയന്ത്രണങ്ങള്‍ ദുരന്തനിവാരണ വകുപ്പ് പ്രഖ്യാപിച്ചത്. രാത്രി 10 മുതല്‍ പുലര്‍ച്ചെ അഞ്ച് വരെയുള‌ള സമയങ്ങളിലാണ് നിയന്ത്രണം. 10 മണിയ്‌ക്ക് ശേഷം കടകള്‍ പ്രവര്‍ത്തിക്കാനോ,​ കൂട്ടംചേര്‍ന്ന് നില്‍ക്കാനോ അനുവദിച്ചിരുന്നില്ല.

സംസ്ഥാനത്തെ കൊവിഡ് സാഹചര്യം വിലയിരുത്തിയ ശേഷമാകും കൂടുതല്‍ നിയന്ത്രണങ്ങള്‍ ആവശ്യമാണോ എന്ന് തീരുമാനിക്കുക. ഇതിന് മുഖ്യമന്ത്രി അദ്ധ്യക്ഷനായി കൊവിഡ് അവലോകന യോഗം ചേരേണ്ടതുണ്ട്. അടുത്ത യോഗം എന്നാണെന്ന് തീരുമാനിച്ചിട്ടില്ല. ഇതിനിടെ ഇന്ന് 45 പേര്‍ക്ക് രോഗം സ്ഥിരീകരിച്ചതോടെ സംസ്ഥാനത്തെ ആകെ ഒമിക്രോണ്‍ രോഗികളുടെ എണ്ണം 150 പിന്നിട്ടു. ഇതുവരെ 152 പേ‌ര്‍ക്കാണ് രോഗം ബാധിച്ചതായി സ്ഥിരീകരിച്ചത്.