ഉത്തർപ്രദേശിൽ ഒരു പൊതുവേദിയിൽ വച്ച് കർഷകൻ ഉന്നാവോ സദാർ എംഎൽഎയെ തല്ലിയെന്ന വിഡിയോ പ്രചരിക്കുന്നതിനിടെ വിശദീകരണവുമായി ആരോപിതനായ എംഎൽഎ പങ്കജ് ഗുപ്ത രംഗത്ത്. കർഷകൻ തന്റെ മുഖത്തടിച്ചു എന്ന തരത്തിൽ പ്രചരിക്കുന്ന വിഡിയോ തെറ്റാണെന്ന് അദ്ദേഹം പറഞ്ഞു. വിഡിയോയിൽ കാണുന്ന കർഷകൻ തൻ്റെ ചാച്ചയാണെന്നും പതിവായി ചെയ്യുന്നപോലെ അദ്ദേഹം തന്റെ കവിളിൽ തലോടിയതാണെന്നും എംഎൽഎ പറഞ്ഞു.

എംഎൽഎയെ തല്ലിയെന്ന് പറയപ്പെടുന്ന കർഷകനായ ഛത്രപാലിനെ അടുത്തിരുത്തി പ്രത്യേക വാർത്താ സമ്മേളനം വിളിച്ചാണ് അദ്ദേഹം ഇക്കാര്യം പറഞ്ഞത്. പ്രതിപക്ഷം കാര്യങ്ങൾ വളച്ചൊടിച്ച് തനിക്കെതിരെ വ്യാജ പ്രചാരണം നടത്തുകയാണെന്നും എംഎൽഎ പറഞ്ഞു. തെരഞ്ഞെടുപ്പിൽ മറ്റു കാര്യങ്ങളൊന്നും ഉയർത്തി കാണിക്കാനില്ലാത്തതു കൊണ്ടാണ് പ്രതിപക്ഷം ഇത്തരം ഗിമ്മിക്കുകളുമായി വരുന്നതെന്നും എംഎൽ‍എ ആരോപിച്ചു. 

  അതേസമയം എംഎൽഎയുമായി തനിക്ക് പ്രശ്നമൊന്നുമില്ലെന്ന് കർഷകനും വാദിച്ചു. എംഎൽഎ വേദിയിൽ ശാന്തനായി ഇരുന്നപ്പോൾ മുതിർന്ന ആളെന്ന രീതിയിൽ തട്ടുക മാത്രമാണ് ചെയ്തതെന്ന് ഛത്രപ്രാൽ വാദിച്ചു.  ജനക്കൂട്ടത്തെ നോക്കി വേദിയിലിരിക്കുന്ന എംഎൽഎയെ വടിയും കുത്തി വേദിയിലേക്ക് കയറി വന്ന വയോധികനായ ഒരാൾ കൈവീശി തല്ലുന്നതാണ് വിഡിയോയിൽ കാണാനാവുക.      സമീപത്തുള്ള പൊലീസുകാരും മറ്റു പ്രവർത്തകരും ചേർന്ന് കർഷകനെ പിടിച്ചു മാറ്റുന്നതും വിഡിയോയിൽ കാണാം. ചുരുങ്ങിയ സമയം കൊണ്ടാണ് വിഡിയോ സോഷ്യൽ മീഡിയയിൽ വൈറലായത്. യോഗി സർക്കാരിന്റെ നിലപാടുകളോടുള്ള ജനത്തിന്റെ പ്രതികരണമാണിതെന്ന് പറഞ്ഞാണ് വിഡിയോ ട്വീറ്റ് പ്രതിപക്ഷ പാർട്ടികൾ ട്വീറ്റ് ചെയ്തത്. ഇതിന് പിന്നാലെയാണ് പങ്കജ് ഗുപ്ത വിശദീകരണവുമായി എത്തിയത്.