ആരോഗ്യ വകുപ്പില്‍ നിന്നു് ഫയലുകള്‍ കാണാതായത് സംബന്ധിച്ച് നടക്കുന്ന അന്വേഷണം മുന്‍ ആരോഗ്യ മന്ത്രി കെ.കെ ഷൈലജ ടീച്ചറുടെ സല്‍പ്പേര് കളങ്കപ്പെടുത്താനുള്ള നീക്കത്തിന്റെ ഭാഗമാണെന്ന് സംശയിച്ച് സി പി എ മ്മിലെ ഒരു വിഭാഗം.

ഒരു ചാനല്‍ സംപ്രേക്ഷണ ചെയ്ത വാര്‍ത്തയുടെ ചുവടുപിടിച്ചാണ് ഇത് സംബന്ധിച്ച് അന്വേഷണങ്ങള്‍ തുടങ്ങിയത്. കോവിഡ് കാലത്ത് നടന്ന പര്‍ച്ചേസുകളില്‍ അഴിമതി നടന്നിരിക്കാനുള്ള സാധ്യതകള്‍ സര്‍ക്കാര്‍ പോലും തള്ളികളയുന്നില്ല. ടെന്റര്‍ വിളിച്ച പര്‍ച്ചേസ് നടത്താനുള്ള സാഹചര്യമല്ല എന്നുണ്ടായിരുന്നത്. സ്വാഭാവികമായും പര്‍ച്ചേസ് നടക്കുമ്പോള്‍ അഴിമതി നടക്കും. അന്നത്തെ സാഹചര്യത്തില്‍ മറ്റൊന്നും ചെയ്യാന്‍ കഴിയില്ലെന്ന് വകുപ്പു മന്ത്രി പോലും സമ്മതിച്ചിട്ടുള്ളതാണ്.

കെ കെ ഷൈലജ ക്കെതിരായ നീക്കങ്ങള്‍ അക്കാലത്ത് തന്നെ ആരംഭിച്ചതാണ് മികച്ച മന്ത്രിയെന്ന് പേരെടുത്ത ഷൈലജയെ മോശമാക്കി ചിത്രീകരിക്കാനുള്ള ശ്രമങ്ങള്‍ എന്നു തന്നെ തുടങ്ങിയിരുന്നു. ഷൈലജക്ക് നിയമസഭാ തെരഞ്ഞടുപ്പില്‍ സീറ്റ് നല്‍കാതിരിക്കാനുള്ള ശ്രമങ്ങള്‍ നടന്നു. തീരെ നിവൃത്തിയില്ലാതെ വന്നപ്പോള്‍ സീറ്റ് നല്‍കി. തോല്‍പ്പിക്കാനുള്ള ശ്രമങ്ങള്‍ പോലും ഉണ്ടായി. എല്ലാ പ്രതിസന്ധികളും അതിജീവിച്ച് ജയിച്ചു വന്നപ്പോള്‍ അവരെ മന്ത്രി സ്ഥാനത്ത് നിന്നും വെട്ടി. പിന്നീട്
ഷൈലജയും പിണറായിയും തമ്മിലുള്ള ലൈന്‍ പോലും തെറ്റി.

കെ. റയിലിനെ അനുകൂലിച്ച് രംഗത്തെത്തണമെന്ന പാര്‍ട്ടി ആവശ്യം ഷൈലജ അംഗീകരിച്ചില്ല. തോമസ് ഐസക് പോലും റയലിന് വേണ്ടി രംഗത്തെത്തി.ജി.സുധാകരനാണ് ആവശ്യം അംഗീകിക്കാത്ത മറ്റൊരു നേതാവ്. ഇത്തരത്തില്‍ പാര്‍ട്ടിയുമായി തെറ്റി നില്‍ക്കുന്ന ഷൈലജ യെ ഇല്ലാതാക്കാന്‍ പാര്‍ട്ടി തന്നെ ഓപ്പറേറ്റ് ചെയ്ത വാര്‍ത്തയാണ് കോവിഡ് കാലത്ത് ആരോഗ്യ വകുപ്പില്‍ നടന്ന അഴിമതി യെന്നറിയുന്നു. കാരണം ഓരോ പര്‍ച്ചേസിനും മന്ത്രിയുടെ അംഗീകാരമുണ്ട്.

ആരോഗ്യവകുപ്പ് ആസ്ഥാനത്തുനിന്ന് ഫയലുകള്‍ കാണാതായ സംഭവത്തില്‍ കന്റോണ്‍മെന്റ് പൊലീസ് അന്വേഷണം ആരംഭിച്ചു. ദിവസങ്ങളോളം ആസ്ഥാനത്ത് തിരച്ചില്‍ നടത്തിയെങ്കിലും കണ്ടെത്താന്‍ കഴിയാത്തതിനെ തുടര്‍ന്നാണ് പൊലീസില്‍ പരാതി നല്‍കിയത്. ഏതൊക്കെ ഫയലാണ് കാണാതായത് എന്നതു സംബന്ധിച്ചു വ്യക്തതയില്ല. വര്‍ഷങ്ങള്‍ക്കു മുന്‍പുള്ള ഫയലുകളാണ് കാണാതെ പോയതെന്നു ആരോഗ്യമന്ത്രി വീണാ ജോര്‍ജ് പ്രതികരിച്ചു. സാധാരണ ഗതിയില്‍ വിഷയത്തിന്റെ ഗൗരവം മനസിലാക്കാതെ വീണാ ജോര്‍ജ് നടത്തിയ പ്രതികരണമാണ് ഇതെന്ന് ഒറ്റനോട്ടത്തില്‍ കാണാമെങ്കിലും വാസ്തവം അതല്ല. ക്യത്യമായ കൂടിയാലോചനകള്‍ക്ക് ശേഷമുള്ള പ്രതികരണമാണ് ഇത്.

അഞ്ഞൂറോളം ഫയലുകള്‍ കാണാതായി എന്നാണ് പ്രാഥമിക നിഗമനം. മരുന്നു വാങ്ങല്‍ ഇടപാടുകളേത് അടക്കമുള്ള ഫയലുകള്‍ കൂട്ടത്തിലുണ്ടെന്നാണ് അധികൃതര്‍ സൂചിപ്പിക്കുന്നത്. ജീവനക്കാര്‍ അറിയാതെ ഫയലുകള്‍ മാറ്റാനാകില്ലെന്നാണ് പൊലീസിന്റെ നിഗമനം. മോഷണ സാധ്യതയില്ലെന്നും അവര്‍ വ്യക്തമാക്കുന്നു.

ആരോഗ്യവകുപ്പ് ആസ്ഥാനത്തെ നവീകരണവുമായി ബന്ധപ്പെട്ട് പ്രധാന ഫയലുകള്‍ സൂക്ഷിച്ചിരുന്ന അലമാരകള്‍ നേരത്തേ മറ്റൊരു ഭാഗത്തേക്കു മാറ്റിയിരുന്നു. ആ സമയത്തൊന്നും ഫയലുകള്‍ നഷ്ടപ്പെട്ടിട്ടില്ലെന്നാണ് ജീവനക്കാര്‍ പൊലീസിനെ അറിയിച്ചത്.

മെഡിക്കല്‍ സര്‍വീസസ് കോര്‍പറേഷനിലെ മരുന്നിടപാടുകളുടെ ഡിജിറ്റല്‍ ഫയലുകള്‍ നശിപ്പിച്ചതായി ആരോപണം ഉയര്‍ന്നതിനു പിന്നാലെയാണ് ഈ ഫയലുകള്‍ കാണാതായത്. സര്‍ക്കാര്‍ ആശുപത്രികള്‍ക്ക് ആവശ്യമായ മരുന്നുകളും മെഡിക്കല്‍ ഉപകരണങ്ങളും വാങ്ങുന്നത് മെഡിക്കല്‍ സര്‍വീസ് കോര്‍പറേഷന്‍ വഴിയാണ്.

വിഷയത്തില്‍ വിജിലന്‍സ് അന്വേഷണം വന്നാല്‍ സ്വാഭാവികമായും മുന്‍ മന്ത്രിയും മറുപടി പറയേണ്ടി വരും.പ്രതിസന്ധി കാലത്ത് തനിക്കൊപ്പം നിന്ന ഉദ്യോഗസ്ഥര്‍ക്കെതിരെയായിരിക്കും മന്ത്രിക്ക് പ്രതികരിക്കേണ്ടി വരിക. അത് മനസിലാക്കികൊണ്ടു തന്നെയാണ് സര്‍ക്കാര്‍ ഷൈലജയെ പ്രതിസന്ധിയിലാക്കിയത്.

ഇതേ ചാനലും ഇതേ ലേഖകനുമാണ് മുമ്പ് തോമസ് ചാണ്ടിയെ മന്ത്രി സ്ഥാനത്ത് നിന്നും പുറത്താക്കിയത്.