കേരളത്തില് സമാധാനം തകര്ന്നുവെന്ന് വരുത്തി തീര്ക്കാനുള്ള ശ്രമമാണ് കോണ്ഗ്രസ് നടത്തുന്നത്; കെപിസിസി അധ്യക്ഷന് കെ.സുധാകരനെതിരെ രൂക്ഷ വിമര്ശനവുമായി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്
ഇടുക്കി എന്ജിനിയറിങ് കോളേജില് എസ്എഫ്ഐ പ്രവര്ത്തകന് ധീരജ് രാജേന്ദ്രന് കൊല്ലപ്പെട്ട സംഭവത്തില് കെപിസിസി അധ്യക്ഷന് കെ.സുധാകരനെതിരെ രൂക്ഷ വിമര്ശനവുമായി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. സുധാകരന് അധ്യക്ഷ സ്ഥാനത്തെത്തിയതിന് ശേഷം സംസ്ഥാനത്ത് അക്രമരാഷ്ട്രിയമുണ്ടാകുന്നുവെന്നും പ്രകോപനം സൃഷ്ടിക്കുകയാണെന്നും കോടിയേരി പറഞ്ഞു.
"കേരളത്തില് സമാധാനം തകര്ന്നുവെന്ന് വരുത്തി തീര്ക്കാനുള്ള ശ്രമമാണ് കോണ്ഗ്രസ് നടത്തുന്നത്. സംസ്ഥാനത്ത് കഴിഞ്ഞ ആറ് കൊല്ലത്തിനിടെ 21 സിപിഎം പ്രവര്ത്തകരാണ് കൊല്ലപ്പെട്ടത്. ബിജെപി, എസ് ഡി പി ഐ, കോണ്ഗ്രസ് പ്രവര്ത്തകരാണ് ഇതിന് പിന്നില്. ഇനിയെങ്കിലും കൊലക്കത്തി താഴെ വയ്ക്കാന് ഇവര് തായാറാകാണം. കോണ്ഗ്രസിന്റെ സെമി കേഡര് രീതിയിതാണെങ്കില് കേരളത്തിന്റെ അവസ്ഥ എന്താകും," കോടിയേരി ചോദിച്ചു.
ധീരജ് രാജേന്ദ്രന്റെ കൊലപാതകം അങ്ങേയറ്റം ദുഃഖകരവും അപലപനീയവുമാണെന്ന് മുഖ്യമന്ത്രി പിണറായി വിജയന് പറഞ്ഞു. കലാലയങ്ങളില് കലാപം സൃഷ്ടിക്കാനുള്ള ശ്രമങ്ങള് ഒരു കാരണവശാലും അനുവദിക്കില്ല. ധീരജിന്റെ കൊലപാതകികളെ എത്രയും പെട്ടെന്ന് നിയമത്തിനു മുന്നില് കൊണ്ടുവരണമെന്ന നിര്ദ്ദേശം പോലീസിനു നല്കിയിട്ടുണ്ടെന്നും പിണറായി വിജയന് അറിയിച്ചു.
ധീരജിന്റെ കൊലപാതകത്തിന് പിന്നില് ആസൂത്രിതമായ നീക്കമാണ് നടന്നതെന്ന് എസ്എഫ്ഐ സംസ്ഥാന സെക്രട്ടറി കെ. എം. സച്ചിന്ദേവ് എംഎല്എ പറഞ്ഞു. ക്യാമ്ബസുകളില് കെ എസ് യു ഭീകരമാം വിധത്തില് അക്രമം അഴിച്ചു വിടുകയാണ്. ചൊവ്വാഴ്ച സംസ്ഥാന വ്യാപകമായി പഠിപ്പ് മുടക്കി സമരം നടത്തുമെന്നും സച്ചിന്ദേവ് പറഞ്ഞു. സംഭവത്തില് സമഗ്രമായ അന്വേഷണം വേണമെന്നും അദ്ദേഹം ആവശ്യപ്പെട്ടു.
"ധീരജ് എന്ന ഉശിരനായ വിദ്യാര്ത്ഥി നേതാവിനെയാണ് നഷ്ടമായത്. ചോരയിറ്റു വീഴുന്ന കത്തിയുമായി കാമ്ബസിലെത്തുന്ന ഈ കൊലയാളിക്കൂട്ടങ്ങളെ അറപ്പോടെ അകറ്റി നിര്ത്താന് വിദ്യാര്ത്ഥി സമൂഹം ഒന്നടങ്കം തീരുമാനിച്ചപ്പോള് കെ എസ് യുവിന്റെ വിജയങ്ങള് പഴങ്കഥയായി മാറി. കേരളീയ കലാലയങ്ങളുടെ മൂലയില് പോലും ഇടമില്ലാത്തവരായി ഇന്ന് കെ എസ് യു മാറിക്കഴിഞ്ഞു. എന്നിട്ടും കൊലക്കത്തി താഴെ വയ്ക്കാന് ഇവര് തയാറാകുന്നില്ല," സിപിഎം നേതാവ് എം. സ്വരാജ് പറഞ്ഞു.
ഇന്ന് ഉച്ചയോടെയാണ് കോളേജ് തിരഞ്ഞെടുപ്പിനിടെ ഉണ്ടായ സംഘര്ഷത്തില് മൂന്ന് വിദ്യാര്ഥികള്ക്ക് കുത്തേറ്റത്. നെഞ്ചിന് കുത്തേറ്റ ധീരജിനെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. പരിക്കേറ്റ രണ്ട് പേരുടെ നില ഗുരുതരമല്ല എന്നാണ് ലഭിക്കുന്ന വിവരം. സംഭവത്തില് ഒരു യൂത്ത് കോണ്ഗ്രസ് പ്രവര്ത്തകന് പിടിയിലായിട്ടുണ്ട്.
https://www.facebook.com/Malayalivartha
