തിരുവനന്തപുരത്ത് നവജാത ശിശുവിനെ മരിച്ച നിലയില്‍ കണ്ടെത്തി. വലിയതുറ പാലത്തിനടുത്തുള്ള ഗോഡൗണിന് സമീപമാണ് മൃതദേഹം കണ്ടെത്തിയത്.

വെള്ളിയാഴ്ച വൈകീട്ടോടെയാണ് കുഞ്ഞിന്റെ മൃതദേഹം ഉപേക്ഷിച്ച നിലയില്‍ കണ്ടെത്തിയത്. മൃതദേഹം കരിയിലക്കൂട്ടത്തിനുള്ളില്‍ ഉപേക്ഷിച്ച അമ്മയെന്നു സംശയിക്കുന്ന യുവതിയെ പോലീസ് കസ്റ്റഡിയിലെടുത്തെന്ന് സൂചന. ദുരിതാശ്വാസ ക്യാമ്പില്‍ മൂന്നുദിവസം സ്വന്തം കട്ടിലിനടിയില്‍ ബക്കറ്റില്‍ സൂക്ഷിച്ച മൃതദേഹം പിന്നീട് ഉപേക്ഷിക്കുകയായിരുന്നു.

നാട്ടുകാരാണ് കരിയിലക്കൂട്ടത്തിനിടയില്‍ നവജാത ശിശുവിന്റെ മൃതദേഹം കണ്ടെത്തിയത്.  പൂന്തുറ സ്വദേശിയുമായി നാലു വര്‍ഷം മുന്‍പ് വിവാഹിതയായ യുവതി ഒരു പെണ്‍കുഞ്ഞിന്റെ അമ്മയാണ്.

മറ്റൊരു യുവാവുമായി അടുപ്പത്തിലായെന്ന തര്‍ക്കത്തെ തുടര്‍ന്ന് ഭര്‍ത്താവ് അകന്നു കഴിയുകയായിരുന്നു.ദുരിതാശ്വാസ ക്യാമ്പായ വലിയതുറ ഗോഡൗണില്‍ മറ്റ് കുടുംബങ്ങള്‍ക്കൊപ്പമാണ് യുവതിയും അമ്മയും കഴിഞ്ഞിരുന്നത്. ഗര്‍ഭിണിയാണെന്ന കാര്യം ക്യാമ്പിലെ മറ്റ് ആളുകളോട് മറച്ചു വച്ചു

.

മൃതദേഹം ക്യാമ്പില്‍ മൂന്നുദിവസം സ്വന്തം കിടയ്ക്കടിയില്‍ സൂക്ഷിച്ചുവയ്ക്കുകയും ദുര്‍ഗന്ധം വന്നു തുടങ്ങിയപ്പോള്‍ കരിയിലക്കൂട്ടത്തിനുള്ളില്‍ ഉപേക്ഷിക്കുകയായിരുന്നുവെന്നാണ് സൂചന. വലിയതുറ പാലത്തിന് അടുത്തുള്ള ഗോഡൗണിന് സമീപമാണ് മൃതദേഹം കണ്ടെത്തിയത്.

യുവതിയെ പോലീസ് ആശുപത്രിയില്‍ പ്രവേശിപ്പിച്ചു. മൃതദേഹം തിരുവനന്തപുരം മെഡിക്കല്‍ കോളേജ് ആശുപത്രിയിലേക്ക് മാറ്റി. വലിയതുറ പൊലീസ് കേസില്‍ അന്വേഷണം തുടങ്ങി.