കോട്ടയത്ത് കൊല്ലം-തേനി ദേശീയപാതയില്‍ പൊന്‍കുന്നത്തിന് സമീപം കടുക്കാമല വളവില്‍ ബസുകള്‍ കൂട്ടിയിടിച്ച് ആറ് പേര്‍ക്ക് പരിക്കേറ്റു. കെഎസ്ആര്‍ടിസി ബസും സ്വകാര്യ ബസും തമ്മിലാണ് കൂട്ടിയിടിച്ചത്.


പരിക്കേറ്റവരെ സമീപത്തെ ആശുപത്രികളില്‍ പ്രവേശിപ്പിച്ചു. കെഎസ്ആര്‍ടിസി ബസ് ഡ്രൈവര്‍ പുഞ്ചവയല്‍ സ്വദേശി പ്രമോദ് (45), വാഴൂര്‍ സ്വദേശികളായ വിജയകുമാര്‍, സുജാത, എലിസബത്ത്, കുമളി സ്വദേശിനി ബീന, ബിജോ ജോയി എന്നിവര്‍ക്കാണ് പരിക്കേറ്റത്.രാവിലെ 9.30 ഓടെയായിരുന്നു അപകടം നടന്നത്.

കുമളിയില്‍ നിന്നും കോട്ടയത്തേക്ക് പോയ കെഎസ്ആര്‍ടിസി ഫാസ്റ്റ് പാസഞ്ചറും ചങ്ങനാശേരിയില്‍ നിന്നും മുണ്ടക്കയത്തേക്ക് പോയ ഐശ്വര്യ ബസുമാണ് അപകടത്തില്‍പെട്ടത്.

അപകടത്തിന് പിന്നാലെ ദേശീയപാതയില്‍ അല്പനേരം ഗതാഗതം തടസപ്പെട്ടു. പൊന്‍കുന്നം പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.